საქართველოს ყოფილმა პრემიერმა ბიძინა ივანიშვილმა შვეიცარიულ ბანკთან სასამართლო დავა წააგო
ივანიშვილის დავა შვეიცარიულ ბანკთან
მორიგი სასამართლო დავა ბიძინა ივანიშვილსა და შვეიცარიულ ბანკს, Credit Suisse-ს შორის ოლიგარქის დამარცხებით დასრულდა.
მმართველი პარტიის, “ქართული ოცნების” საპატიო თავმჯდომარე, ბიძინა ივანიშვილი Credit Suisse-ს ფულის გათეთრებაში სდებდა ბრალს.
როგორც გამოცემა Bloomberg-ი იუწყება, საქმეში, რომელიც წელიწადნახევარს გრძელდებოდა, ჟენევის მთავარი ფინანსური პროკურორის ივ ბერტოსას გამოძიებამ ვერ იპოვა ფულის გათეთრების რაიმე მტკიცებულება.
Bloomberg-ის ინფორმაციიდანვე ვიგებთ, რომ საქართველოს ყოფილი პრემიერი არ ეთანხმება გადაწყვეტილებას და მის გასაჩივრებას გეგმას. გამოცემა ივანიშვილის სპიკერს ციტირებს:
“კატეგორიულად არ ვეთანხმებით მსჯელობას, რომელიც აიგნორებს მტკიცებულებებს, რომლითაც ჩანს კლიენტებთან ურთიერთობის მენეჯერის მზადყოფნა, დამალოს და გაათეთროს მისი თაღლითობის შედეგად მიღებული შემოსავალი”, – ამბობს ის.
როგორც Bloomberg-ი წერს, ფულის გათეთრებაზე დავა შვეიცარიის უმსხვილესმა ბანკმა, UBS-მა Credit Suisse-ისგან მემკვიდრეობით მიიღო. გაკოტრების პირას მყოფი, ქვეყნის სიდიდით მეორე ბანკი Credit Suisse მიმდინარე წლის მარტში იყიდა UBS-მა.
___________________________________
ივანიშვილსა და Credit Suisse-ს შორის დავა ჯერ კიდევ 2011 წელს დაიწყო, როდესაც ივანიშვილი ამ ბანკის კლიენტი იყო კერძო საბანკო მომსახურების სფეროში.
სწორედ პერიოდში ცნობილი გახდა, რომ ბანკის ერთ-ერთი მენეჯერის, პატრის ლესკოდრონის თაღლითობის შესახებ – ლესკორდონი ბანკის კონფიდენციალური ანგარიშიდან ფულს იპარავდა. მათ შორის, ივანიშვილის ანგარიშიდანაც და ასევე რუსი ოლიგარქის, ივანიშვილის ბიზნეს-პარტნიორის, ვიტალი მალკინის ანგარიშიდან.
შვეიცარიის მარეგულირებელმა ფირმამ, Finma-მ გამოაქვეყნა ანგარიში, სადაც იკვეთება, რომ Credit Suisse-მა არაერთი გაფრთხილებისა და საეჭვო გარემოების მიუხედავად, არ მიიღო შესაბამისი ზომები.
ივანიშვილმა Credit Suisse-ს ბრალი დასდო იმაში, რომ მან ვერ შეძლო მისი ინვესტიციების დაცვა. ივანიშვილი ბანკისგან 800 მლნ დოლარს ითხოვდა და აცხადებდა, რომ ეს ის თანხაა, რომელიც მან ბანკის ყოფილი მენეჯერის, პატრის ლესკოდრონის მოქმედებების გამო დაკარგა.
Credit Suisse-ის სატრასტო განყოფილებამ განაცხადა, რომ ივანიშვილის მოთხოვნა გადაჭარბებულია და სასამართლოს მოსთხოვა მისი უარყოფა.
ლესკოდრონი 2018 წელს ის თაღლითობაში გაასამართლეს. სასამართლო პროცესამდე ორი წელი მან წინასწარ პატიმრობაში გაატარა. 2019 წელს გაათავისუფლეს, 2020 წლის ივლისში კი ლესკოდრონმა თავი მოიკლა. მანამდე ლესკადრონმა აღიარა, რომ 2008 წლის ფინანსური კრიზისის დროს, მისი მცდარი საინვესტიციო გადაწყვეტილებების შედეგად დაზარალებული კლიენტების ზარალს იგი ფარულად ფარავდა სხვა კლიენტების ანგარიშებიდან მოპარული თანხებით.
2022 წლის მარტში გამოცემა The Financial Times-მა გაავრცელა ინფორმაცია, რომ ბერმუდის სასამართლოს გადაწყვეტილებით, ბიძინა ივანიშვილმა შვეიცარიულ ბანკს, Credit Suisse-ს, სასამართლო დავა მოუგო და მისგან 500 მლნ დოლარზე მეტი მიიღო (Bloomberg-ი 607 მლნ დოლარს ასახელებს).
Credit Suisse-სთან ივანიშვილის დაპირისპირების მორიგი ეტაპი რუსეთის უკრაინაში შეჭრის შემდეგ დაიწყო. ივანიშვილს Credit Suisse-თან სხვა რამდენიმე სასამართლო დავაც ჰქონდა. ერთი შეეხებოდა შვეიცარიული ბანკის მიერ ოპერაციების შეფერხებას, რის გამოც ივანიშვილს ფინანსური ზარალი მიადგა. გავრცელდა ინფორმაცია, რომ ბანკმა ბიზნესმენის კუთვნილი 2.7 მილიარდი გირვანქა სტერლინგის ოდენობის ანგარიში გაყინა, საფუძვლით, რომ თანხები შესაძლოა, რუსული წარმოშობისა ყოფილიყო.
2022 წლის სექტემბერში ივანიშვილმა სინგაპურში სასამართლოზე განაცხადა, რომ Credit Suisse-მა არ მიმართა შესაბამის ზომებს, რის გამოც ივანიშვილმა 1,27 მილიარდი დოლარი დაკარგა.
2023 წლის თებერვალში Bloomberg-მა გაავრცელა ინფორმაცია, რომ Credit Suisse Group AG -მ მილიარდერ ბიზნესმენ ბიძინა ივანიშვილს ხანგრძლივი სასამართლო დავის ფარგლებში 210 მლნ დოლარი გადაუხადა.
