ცნობილი გახდა იუსტიციის საბჭოს წევრობის ხუთი კანდიდატი

იუსტიციის საბჭოს კანდიდატები

ცნობილია იმ ხუთი კანდიდატის ვინაობა, ვინც საქართველოს იუსტიციის უმაღლესი საბჭოს წევრობის კონკურსში მონაწილეობის სურვილი გამოთქვა და საქართველოს პრეზიდენტის ადმინისტრაციაში განაცხადი შეიტანა.

პრეზიდენტის ადმინისტრაციის ცნობით, იუსტიციის უმაღლესი საბჭოს არამოსამართლე წევრის კანდიდატურის შესარჩევი კონკურსის მონაწილეები არიან: გიორგი ბურჯანაძე, დიმიტრი გაბუნია, მანუჩარ კაკოჩაშვილი, კახა წიქარიშვილი და თამარ ალფაიძე.

კანდიდატებს გაესაუბრება კომისია, რომლის შემადგენლობა ასეთია:

• გურო იმნაძე (“სოციალური სამართლიანობის ცენტრი”);
• ქეთევან ერემაძე (ილიაუნის პროფესორი, საკონსტიტუციო სასამართლოს ყოფილი მოსამართლე);
• ბესიკ ლოლაძე (სეუ-ს პროფესორი);
• ნონა ქურდოვანიძე (საიას თავმჯდომარე);
• თამარ ლალიაშვილი („ნიუ ვიჟენ უნივერსიტეტის“ პროფესორი);
• გიორგი დავითური („ინფორმაციის თავისუფლების განვითარების ინსტიტუტი“);
• ზურაბ ვარდიაშვილი („პუბლიკის“ დირექტორი).

დღეს, 5 ივლისს, შესარჩევი კომისიის მორიგი სხდომა გაიმართა. კომისია ამ ეტაპზე კანდიდატების მიერ წარდგენილი დოკუმენტაციის კანონმდებლობასთან შესაბამისობას ამოწმებს.

კომისიის წევრის, თამარ ლალიაშვილის განცხადებით, კონკურსანტების შეფასების მთავარი კრიტერიუმები უკვე გაწერილია. ეს კრიტერიუმები ემთხვევა „საერთო სასამართლოების შესახებ“ კანონში მოსამართლეთა თანამდებობებზე განწესების კრიტერიუმებს.

ერთ-ერთი არის კეთილსინდისიერების კრიტერიუმი, რომელიც ასევე მოხვდა ევროკავშირის გაფართოების ანგარიშში მოსამართლესთან დაკავშირებით. მეორე კრიტერიუმი არის კონკურსანტის პროფესიონალიზმი, ანუ კვალიფიკაცია.

“ეს ორივე კრიტერიუმი ძალიან მნიშვნელოვანია. განსაკუთრებით ხაზს გავუსვამ ამ პროცესში შეფასებისას გამოყენებულ კეთილსინდისიერების კრიტერიუმს. ასევე მნიშვნელოვანია მედეგობა, ზეწოლებზე გამძლეობა, დამოუკიდებლობა“, – აცხადებს ლალიაშვილი.

კომისიის კიდევ ერთი წევრის, „სოციალური სამართლიანობის ცენტრის“ წარმომადგენლის გურამ იმნაძის განცხადებით, კარგია, რომ ამ პროცესს დააკვირდებიან ეუთო/ოდირის წარმომადგენლები:

“ეს მეტ სანდოობას შესძენს პროცესს. ჩვენ დიდი იმედი გვაქვს, რომ საბოლოოდ, საბჭოში თუნდაც პრეზიდენტის მიერ დანიშნული ერთი წევრი იქნება ისეთი პირი, რომელიც გამოირჩევა როგორც პროფესიული უნარებით, ისე კეთილსინდისიერების მაღალი პრინციპებით“.

იუსტიციის უმაღლესი საბჭო არის სასამართლო ხელისუფლების უმნიშვნელოვანესი რგოლი. საბჭო ნიშნავს მოსამართლეებს საქალაქო და სააპელაციო სასამართლოებში, ასევე არჩევს და პარლამენტს დასამტკიცებლად უგზავნის უზენაესი სასამართლოს მოსამართლეობის კანდიდატურებსაც.

იუსტიციის უმაღლეს საბჭოში15 წევრია, მათგან ექვსი არ არის მოსამართლე. ამ ექვსიდან ერთს პრეზიდენტი ნიშნავს, ხუთს კი პარლამენტი ამტკიცებს.

საქართველოს პრეზიდენტის დანიშნულ წევრს უფლებამოსილების ვადა 2024 წლის 22 ივლისს ეწურება.

იუსტიციის საბჭოს კანდიდატები