იქ ყველაზე დალხენილად ბაყაყები არიან

აფხაზეთში მედიცინა უმძიმეს მდგომარეობაშია – როგორც სამოქალაქო, ისე – სამხედრო. მაგალითად, დღეს ძალიან ცუდი სანახავია აგუძერას სამხედრო ჰოსპიტალი, რომელიც თითქმის სრულიად  დანგრეულია.

პალატები საშინელ მდგომარეობაშია. არ არის გათბობა, და თუ ზაფხულში აქაურობა ასატანია, ზამთრის დადგომასთან ერთად ყველაფერი იყინება. ექიმებს, თუ ამის საშუალება აქვთ, ხშირად ელექტროღუმლები თან მოაქვთ.

არ არსებობს ხანძარსაწინააღმდეგო სისტემა, არადა სადენები ზოგან პირდაპირ წყალშია, და მოკლე ჩართვა ნებისმიერ დროს შეიძლება მოხდეს. აქ წყლის ნაკლებობას საერთოდ არ განიცდიან, რადგან ონკანების უმრავლესობა მოშლილია და არ იკეტება.

უკვე დიდი ხანია, არც ლიფტი აღარ მუშაობს.

ამ საავადმყოფოს ყველაზე დიდი პრობლემა სარდაფია, რომელიც წყლითა და ნაგვითაა სავსე. მის დასათვარიელებლად ჩასულებს ბაყაყები შემოგვახტნენ.

 ჰოსპიტალის ინფრასტრუქტურის ერთადერთი დადებითი მხარეა დიდი პარკი, რომელიც ასევე მოუვლელია.

 და მაინც, აგუძერას სამხედრო ჰოსპიტალში რამდენიმე ახალგაზრდა ექიმი ისევ მუშაობს. მათ ამ საავადმყოფოს დატოვება არ სურთ და მტკიცედ აქვთ გადაწყვეტილი, რომ ცვლილებებს მიაღწევენ.

ექიმი გურამ შოუა ამბობს, რომ საავადმყოფოს შენობა 90-იანი წლების ომის დროს დაიწვა და მას შემდეგ ასეთ მდგომარეობაშია. ეს კორპუსი შოუამ კოლეგების დახმარებით, საკუთარი ხელით გაწმინდა ნაგვისგან. ამბობს, რომ შესრულებული საქმის საზღაურად პური და კარაქი მიიღეს.

მცირე ხნის წინ ექიმებმა ფული შეაგროვეს და ახალი მოსაჭიმი ჭერილი დაამონტაჟეს – ყველაფერი საკუთარი სახსრებით.

‘ყველაფერს გავაკეთებთ, ოღონდ ომი ნუ იქნება. ჩვენ თვითონ ვღებავთ და ჩვენ თვითონვე ვაბათქაშებთ. ალბათ, ომის შემდგომი სინდრომია, მაგრამ რას იზამ! სიმართლე რომ ითქვას, ეს შენობა არაფრად ვარგა. უნდა დაინგრეს და ახალი აშენდეს. ამჟამად ჩვენს საავადმყოფოში 40 ექიმი მუშაობს და ყველაფერი შეგვიძლია ნეიროქირურგიის გარდა,’ – ამბობს ექიმი გურამ შოუა.

სწორედ ამ ჰოსპიტალში დამონტაჟდა აფხაზეთში პირველი კომპიუტერული ტომოგრაფი. სწორედ აქ დაიწყეს ლაზერული ოპერაციების კეთება უროლოგიისა და ენდოკრინოლოგიის სფეროებში.

მაგრამ ექიმის ხელფასი ათი ათასი რუბლია [$150]

ანრი არნაუტი ერთ-ერთი მათგანია. მან ინტერნატურა სამხედრო აკადემიაში გაიარა და სამხედრო ჰოსპიტალში მუშაობა მისთვის აუცილებელია.

‘ყოველ დღე გუდაუთიდან დავდივარ სამსახურში. ახლა ჩვენს განყოფილებაში მხოლოდ ექვსი პაციენტია და საშუალება გვაქვს, რომ ყველას დიდი ყურადღებით მოვეკიდოთ’, – ამბობს ანრი.

ლაშა კაკალია ჯერჯერობით სტაჟიორია და როსტოვის სახელმწიფო უნივერსიტეტში სწავლობს. იგი მომავალი ქირურგია. კიდევ ორ წელიწადს უნდა ისწავლოს. ‘რა თქმა უნდა, რთულია მუშაობა, მაგრამ ყველა მეხმარება. ასეთ პრაქტიკას რუსეთში სტუდენტი ნამდვილად ვერ გაივლის.’

წასვლისას კიბეზე საავადმყოფოს ფერშალი შეგვხვდა, რომელმაც გვკითხა: ‘ნამდვილად გადაიღეთ ყველაფერი ცუდი? იმედი გვაქვს, რომ ვინმე მაინც ნახავს და ჩვენს ჰოსპიტალს ბოლოსდაბოლოს დახმარებას აღმოუჩენენ.’

აგუძერას სამხედრო ჰოსპიტალი მრავალპროფილიანი საავადმყოფოა, რომელიც განკუთვნილია ძალოვანი სტრუქტურების, სასაზღვრო და საბაჟო სამსახურების და განსაკუთრებულ სიტუაციათა სამინისტროს თამნამშრომლებისთვის. განყოფილებებში არც ისე ცუდი აღჭურვილობა დგას, რომლებიც ჰოსპიტალს სხვადასხვა ორგანიზაციამ და ფიზიკურმა პირებმა საჩუქრად გადასცეს. აქ რთულ ოპერაციებს აკეთებენ, მუშაობს ამბულატორია და სამხედრო სამედიცინო ექსპერტიზის განყოფილება.

მაგრამ ამ ადგილას, წლებია, მხოლოდ ფრინველები ეწევიან სამშენებლო სამუშაოს –  ნახევრად დანგრეული სახურავების ქვეშ ბუდეებს იკეთებენ.

სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრს არ ემთხვეოდეს.

გამოქვეყნებულია: 27.04.2016