პაველ ჰერჩინსკი: ქართველი ხალხი არ უნდა დაისაჯოს, უვიზო რეჟიმის გაუქმების ალბათობა დაბალია
ჰერჩინსკი უვიზო რეჟიმის გაუქმებაზე
ევროკავშირის ელჩმა საქართველოში, პაველ ჰერჩინსკიმ სტუდენტებთან საუბრისას განაცხადა, რომ {უვიზო რეჟიმის შეჩერებით} ქართველი ხალხი არ უნდა დაისაჯოს და საფასური გადაიხადოს იმისთვის, რაც მათ არ გაუკეთებიათ. მისივე თქმით, უვიზო რეჟიმის გაუქმების ალბათობა დაბალია. ჰერჩინსკიმ ასევე აღნიშნა ევროკავშირის პოზიცია არ შეცვლილა და გაერთიანებაში ელიან, როდის დაიკავებს საქართველო “კუთვნილ სკამს მაგიდის გარშემო.”
კიდევ რა თქვა ევროკავშირის ელჩმა
“ჩვენი მხარდაჭერა აშკარაა, არც პოზიცია შეგვიცვლია, საქართველო კანდიდატი ქვეყანაა”
“რამდენად დიდია ჩვენი მხარდაჭერა? ჩვენი მხარდაჭერა აშკარაა და არც პოზიცია შეგვიცვლია. ჩვენ კოლექტიურად გადავწყვიტეთ, რომ საქართველოს კანდიდატის სტატუსი მივანიჭოთ. ყველა წევრს თავისი სკამი ეკუთვნის, თქვენთვისაცაა გამოყოფილი სკამი, რომელიც ამ დროისთვის ცარიელია და არ ვიცი, როდემდე დარჩება ეს სკამი ასე. ჩვენ გვინდა, რომ საქართველოს წარმომადგენელმა დაიკავოს ეს სკამი, იმავე უფლებებითა და ვალდებულებებით, რაც სხვა წევრებს გააჩნიათ.
ყველაზე შემაწუხებელი არის ის, რომ სხვა ქვეყნები, რომლებსაც ევროკავშირის წევრობა სურთ და კანდიდატები არიან, წინ მიიწევენ და არ უნდათ დროის დაკარგვა. დიდი გამოწვევა ისაა, რომ საქართველომ არ გამოტოვოს ეს შესაძლებლობა. ყველას სურს იხილოს გაფართოების მორიგი დიდი ტალღა. ჩვენ მივიჩნევთ, რომ ვალდებულები ვართ, გავიხსნათ, მივიღოთ ახალი წევრები. პირველია უკრაინა, ასევეა მოლდოვა, რომელმაც წარმოუდგენელ წინსვლას მიაღწია.
მხოლოდ ვიმედოვნებ, რომ ამ კანონის სახით სრულიად არასაჭირო დაბრკოლების ფონზე, საქართველო სხვა ქვეყნებს დაეწევა. რაც, როგორც ვთქვი, საქართველოს ეს თავისუფლად შეუძლია. თუ არსებობს ნება, მჯერა, რომ გამოსავალიც იქნება. ვიმედოვნებ, რომ მალევე, არჩევნების მერე, საქართველო დაუბრუნდება ევროპულ გზას. ჩვენი მხრიდან კი მინდა შეგახსენოთ, რომ არ ვნებდებით, იმედს არ ვკარგავთ – საქართველო ევროკავშირის წევრობის კანდიდატია.”
“ქართველი ხალხი არ უნდა დაისაჯოს, უვიზო რეჟიმის გაუქმების ალბათობა დაბალია”
ქართველი ხალხი არ უნდა დაისაჯოს და საფასური გადაიხადოს იმისთვის, რაც მათ არ გაუკეთებიათ. პირიქით, ისინი აპროტესტებდნენ [რუსულ კანონს] და ამ პროტესტს ჩვენ ახლაც ვხედავთ.
“აქედან გამომდინარე, უვიზო მიმოსვლის რეჟიმის გაუქმების ალბათობა არის, თუმცა დაბალი, სწორედ იმიტომ, რომ ეს, პირველ რიგში, ჩვეულებრივ მოქალაქეებს შეეხება.
რაც შეეხება ინდივიდუალურ სანქციებს, აქ თამასა მაღალია, გამომდინარე იქიდან, რომ ამ შემთხვევაში გადაწყვეტილება ევროკავშირის ქვეყნებმა კონსენსუსით უნდა მიიღონ. ასევე დიდი მნიშვნელობა აქვს სახელებს. ეს სახელები კი წევრმა სახელმწიფოებმა უნდა წარადგინონ, რომელსაც ყველა უნდა დათანხმდეს. მე თუ შემეკითხებით, ეს [ინდივიდუალური სანქციების დაწესება] ძნელი იქნება, მაგრამ არა შეუძლებელი.“
“რისკია, ფილოსოფიიდან “მეტი მეტისთვის” გადავიდეთ ფილოსოფიაზე “ნაკლები ნაკლებისთვის”
“ევროკავშირის მხრიდან საქართველოსთან მუშაობისას ყოველთვის მივდევდით ფილოსოფიას “მეტი მეტისთვის”. ეს ძალიან მნიშვნელოვანი პრინციპია. როდესაც პოზიტიურ ნიშნებს ვხედავთ, მაშინვე ვცდილობთ ისე გაკეთებას, რომ ეს პოზიტიური რეფორმები საქართველოში დაჯილდოებულ იქნას.
ყოველი პოზიტიური ნაბიჯი იქნება უფრო და უფრო მეტი ჩართულობა ჩვენი მხრიდან. და ეს იყო ფილოსოფია, რომელიც გასულ კვირამდე გამოიყენებოდა ჩვენს EU-საქართველოს ურთიერთობებში. და მე აღვნიშნე, რომ ეს იყო დიდი სინანული.
და ახლა რისკის ქვეშ ვდგავართ, რომ ფილოსოფიიდან “მეტი მეტისთვის” გადავიდეთ სრულიად სხვა ფილოსოფიაზე “ნაკლები ნაკლებისთვის”
ძირითადად არის რაღაცები, რაც არ მოგვწონს და ახლა ვუყურებთ, სად გავწყვეტთ, სად შევზღუდავთ, სად უკან დავიხევთ და სად გავართულებთ. და როგორც ევროკავშირის ელჩი საქართველოში ვამბობ, რომ ეს გულდასაწყვეტია, რადგან ძალიან ვცდილობდით შეგვენარჩუნებინა “მეტი მეტისთვის” დამოკიდებულება, მაგრამ ახლა გამოსავალი არ გვაქვს, რომ არ გადავიდეთ – “ნაკლები ნაკლებისთვის.”
● ლავროვის მოადგილე: დასავლეთს საქართველოში მაიდნის სცენარის განმეორება სურს
● რა შემთხვევაში დამარცხდება “ქართული ოცნება” არჩევნებში? ვახუშტი მენაბდის მოსაზრება
• საქართველოსა და ევროკავშირის ქვეყნებს შორის უვიზო მიმოსვლა 2017 წლის 28 მარტს ამოქმედდა. 2017 წლის მარტიდან დეკემბრის ჩათვლით ევროპაში უვიზოდ საქართველოს 170 ათასმა მოქალაქემ იმოგზაურა.
• ევროკავშირი უფლებას იტოვებს, რომ თუ საქართველო ვალდებულებებს არ შეასრულებს, ე.წ. “შეჩერების მექანიზმი” ამოქმედდება და ვიზალიბერალიზაცია გადაიხედება. საქართველოს ხელისუფლება აცხადებს, რომ პრობლემების მიუხედავად, ამ ეტაპზე ვიზალიბერალიზაციის გადახედვის საფრთხე არ დგას.
• ევროპაში თავშესაფრის მაძიებელი საქართველოს მოქალაქეები ყველაზე ხშირად ქვეყნიდან წასვლის მოტივად საქართველოში არსებულ უმუშევრობას ასახელებენ. ასევე ევროპაში საქართველოს ბევრი მოქალაქე ჯანმრთელობის მდგომარეობის გამო მიდის, რაც ქვეყნის ჯანდაცვის სისტემაში არსებულ პრობლემებზე მიუთითებს.
• მნიშვნელოვან პრობლემად რჩება ევროპაში ქართული კრიმინალი – როგორც ორგანიზებული, ისე წვრილმანი ქურდობები. ამ პრობლემაზე განსაკუთრებით ხშირად მიუთითებს გერმანია. ამ ქვეყნის წარმომადგენლები გასულ წელს თბილისშიც კი იყვნენ და საქართველოს შს მინისტრს ქმედითი ზომების გატარება მოსთხოვეს.
