"გირჩი" პარლამენტში ტელევიზიის შექმნას გეგმავს

ულტრალიბერალური პარტია “გირჩი”, რომელიც პარლამენტში სამი წევრით არის წარმოდგენილი, საკუთარი ტელევიზიის შექმნას აპირებს, რომელსაც “პარლამენტი TV” ერქმევა.

პარტიის ერთ-ერთი ლიდერის, იაგო ხვიჩიას თქმით, დეპუტატებს საშუალება ექნებათ ამ ტელევიზიის სტუდიაში განიხილონ აქტუალური საკითხები, მათ მიერ შემოთავაზებული კანონპროექტების ჩათვლით.

”წარმოიდგინეთ, რომ დეპუტატები პარლამენტს წარუდგენენ კანონპროექტს და ჩვენ მათთან ერთად განვიხილავთ სტუდიაში. ყველა საკითხის განხილვა არ პარლამენტის მიერ შემოთავაზებულ ფორმატში ვერ ხერხდება, ტელევიზიით კი ორი ადამიანი დაჯდება და სრულად განმარტავს თემას ერთ საათში. თუ ამას ყოველდღე გავაკეთებთ და ამით ხალხს ვესაუბრებით, მაშინ თითოეული დეპუტატი, რომელმაც კანონპროექტი წარადგინა, გარკვეულწილად აგებს პასუხს იმ შინაარსზე, რომელსაც საზოგადოებას უხსნის ”, – თქვა ხვიჩიამ.

“გირჩს” პარლამენტში იაგო ხვიჩია, ვახტანგ მეგრელიშვილი და სანდრო რაქვიაშვილი წარმოადგენს.

2020 წლის 31 ოქტომბერს ჩატარებულ საპარლამენტო არჩევნებში “გირჩმა” ხმების 2,89% მიიღო და პარლამენტში ოთხი ადგილი მოიპოვა. თუმცა, პარტიაში განხეთქილების შემდეგ, “გირჩი” ზურაბ ჯაფარიძემ დატოვა და ახალი პარტია “გირჩი – მეტი თავისუფლება” დააფუძნა.

აღსანიშნავია ისიც, რომ პარტიას უკვე აქვს საკუთარი ტელევიზია Girchi TV და ონლაინ პლატფორმა Girchi Portal, სადაც პოლიტიკოსები და აქტივისტები ყოველდღიურად განიხილავენ ქვეყანაში მიმდინარე აქტუალურ თემებს.

_______________________________

● ფიტნესკლუბი, რომელიც რეგულაციების დარღვევისთვის დააჯარიმეს, “გირჩის” ლიდერმა იქირავა
● “მინდა ახალი გირჩი იყოს მართლა გახსნილი” – ზურაბ ჯაფარიძემ ახალი გირჩი დააფუძნა
● NDI-ის კვლევა: 50 პროცენტი მიიჩნევს, რომ საქართველოს მთავრობა კარგად მუშაობს

________________________________

რა არის “გირჩი”?

მემარჯვენე-ლიბერტარიანული პარტია გირჩი 2016 წელს, ყოფილი მმართველი გუნდიდან „ნაციონალური მოძრაობიდან“ ოთხი დეპუტატის — ზურაბ ჯაფარიძის, პავლე კუბლაშვილის, გიორგი ხაჩიძისა და გიორგი მელაძის წამოსვლის შემდეგ შეიქმნა.

“ახალი პოლიტიკური ცენტრი – გირჩი” ასე გაეცნო ეს პარტია ამომრჩეველს. პარტიის სიმბოლიკის ნაწილია მწვანე გირჩი თეთრ ფონზე, როგორც სიახლის სიმბოლო.

2020 წლის საპარლამენტო არჩევნებში ამ პარტიამ 2.89 პროცენტი მიიღო.

„გირჩის“ ლიდერი ზურაბ ჯაფარიძე 2018 წლის საპრეზიდენტო არჩევნებში მონაწილეობდა და პირველ ტურში ამომრჩეველთა ხმების 2,26 პროცენტი მიიღო – ეს 36 034 ხმაა.

„გირჩის“ პოლიტიკური დღის წესრიგის ერთ-ერთი მთავარი მიმართულებაა თავისუფალი ბაზარი, დერეგულირებული ბიზნესი, შრომის ინსპექციის და სხვა სახელმწიფო მარეგულირებლების გაუქმება, ნარკოტიკების ლეგალიზაცია, საკონტრაქტო სამხედრო სამსახურზე გადასვლა და სავალდებულო სამხედრო გაწვევის გაუქმებაა. გაერთიანებაში ასევე გამოდიან სოციალური დახმარებებისა და სუბსიდიების გაუქმების მოთხოვნით და ეკონომიკაში სახელმწიფოს მინიმალური ჩარევის მომხრე არიან.

„გირჩი“ განსხვავდება ტრადიციული ქართული პარტიებისგან. მისი მხარდამჭერები, ძირითადად, ახალგაზრდები არიან, რომლებიც პარტიის ულტრალიბერალურ შეხედულებებს უჭერენ მხარს. “გირჩის” ლიდერები აქტიურები არიან სოციალურ ქსელებში და დროდადრო არაორდინარულ აქციებს მართავენ.

მაგალითად, 2016 წლის ახალი წლის ღამეს, „გირჩის“ აქტივისტებმა საკუთარი ოფისის ეზოში დემონსტრაციულად დათესეს კანაფი. რამდენიმე თვის წინ კი თბილისში მარიხუანის კოსტიუმირებული ფესტივალი გამართეს.

„გირჩის“ წარმომადგენლების სარჩელის დამსახურებით, 2018 წლის ივლისში საკონსტიტუციო სასამართლომ ფაქტობრივად დააკანონა ქვეყანაში მარიხუანის მოხმარება, როდესაც ადმინისტრაციული ჯარიმა გააუქმა.

2017 წლის აპრილში, „გირჩმა“ დაარეგისტრირა რელიგიური ორგანიზაცია, „საქართველოს ქრისტიანული, ევანგელისტური, პროტესტანტული ეკლესია – ბიბლიური თავისუფლება“.

ამით “გირჩმა” მოძებნა ახალგაზრდების სამხედრო სავალდებულო სამსახურიდან კანონიერად გათავისუფლების გზა – ორგანიზაციაში მიდის წვევამდელი, მას აძლევენ ცნობას, რომ ის სასულიერო პირია და სახელმწიფო მას ათავისუფლებს სამსახურისგან, რადგანაც, ქართული კანონმდებლობის თანახმად, სამხედრო სამსახურში გაწვევა შეიძლება გადავადდეს, თუ ადამიანი სასულიერო პირია ან სასულიერო სემინარიაში სწავლობს.