"პოლიტიკური ვირეშმაკობაა" - გია ხუხაშვილის კომენტარი პრეზიდენტის იმპიჩმენტზე

გია ხუხაშვილის კომენტარი პრეზიდენტის იმპიჩმენტზე

პოლიტოლოგი გია ხუხაშვილი „ქართული ოცნების“ მიერ საქართველოს პრეზიდენტის წინააღმდეგ იმპიჩმენტის პროცესის დაწყების გადაწყვეტილებას ეხმაურება და ამბობს, რომ ეს “პოლიტიკური ვირეშმაკობაა.”

გია ხუხაშვილის განმარტებით, იმპიჩმენტის პროცედურას შინაარსობრივი მხარე არ აქვს და მას უფრო პოლიტიკური პროცესის განზომილება აქვს. მისივე თქმით, თუ „ქართული ოცნება“ ახლა ამ იმპიჩმენტის პროცესზე უარს იტყოდა, ეს შეიძლებოდა აღქმულიყო როგორც სისუსტის გამოვლინება და ამ შიშმა ისინი აიძულა, წასულიყვნენ იმპიჩმენტზე.

ხუხაშვილი ხაზს უსვამს, რომ მთავრობის მიერ საქართველოს პრეზიდენტისთვის ვიზიტების განხორციელების აკრძალვა თავის მხრივ იყო კონსტიტუციის დარღვევა, რადგან კონსტიტუციაში პირდაპირ არის მითითებული, რომ ყველა ინსტიტუტი ვალდებულია ყველაფერი გააკეთოს იმისთვის, რომ საქართველოს ევროკავშირში გაწევრიანებას ხელი შეუწყოს.

“ქართული ოცნება” საქართველოს პრეზიდენტის წინააღმდეგ იმპიჩმენტის პროცედურას იწყებს. ამის შესახებ ბრიფინგზე მმართველი პარტიის თავმჯდომარემ, ირაკლი კობახიძემ განაცხადა. კობახიძის განმარტებით, იმპიჩმენტის პროცედურა დაიწყება მიუხედავად იმისა, რომ მის აღსრულებას პარლამენტში ოპოზიციის მხარდაჭერაც სჭირდება.

გარდა ამისა, კობახიძის თქმით, პრეზიდენტის მიერ კონსტიტუციის დარღვევის ფაქტზე „ქართული ოცნება“ მიმართავს საკონსტიტუციო სასამართლოსაც.

საქართველოს პრეზიდენტის ადმინისტრაციამ 30 აგვისტოს გამოაქვეყნა განცხადება, რომლის მიხედვით, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად პრეზიდენტი სალომე ზურაბიშვილი ევროპელ ლიდერებთან შეხვედრებს იწყებს.

მალევე საქართველოს მთავრობა სალომე ზურაბიშვილის გერმანიაში დაგეგმილ ვიზიტს გამოეხმაურა და განმარტა, რომ პრეზიდენტს უარი გერმანიის გარდა, უკრაინაში ვიზიტზეც უარი ეთქვა. ზურაბიშვილს ასევე უარი ეთქვა შვეიცარიაში, პოლონეთში, ბელგიაში, დანიაში, არაბთა გაერთიანებულ საამიროებში, ბულგარეთში, ჩეხეთსა და ისრაელში დაგეგმილ შეხვედრებზეც.

გია ხუხაშვილი: “მე დიდ გზავნილს არ ვხედავ ამაში, ეს არის უბრალოდ დაპირისპირება. შინაარსობრივად ამ დავას აზრი არ აქვს. ცხადია, რომ 100 ხმას „ქართული ოცნება“ მარტივად ვერ აგროვებს ანუ თვითონ იმპიჩმენტის პროცედურის ბოლომდე მიყვანა მათთვის არის ძალიან პრობლემური, აქედან გამომდინარე, ამ ყველაფერს არ აქვს შინაარსობრივი, სახელმწიფოებრივი განზომილება.

ამ თემას უფრო აქვს პოლიტიკური პროცესის განზომილება, რაც, პირდაპირ გეტყვით, რომ მისასალმებელია. ოპოზიციის საზრუნავი იყო, რომ პოლიტიკური პროცესი გაეცოცხლებინათ და არა ხელისუფლების.

ხელისუფლება სულაც არ არის დღეს დაინტერესებული პოლიტიკური პროცესის გაცოცხლებით, მაგრამ მათ აიღეს ეს ტვირთი თავის თავზე და თვითონ მისცეს საზოგადოებას საკვები იმისთვის, რომ პოლიტიკური პროცესი გაცოცხლდეს და მორიგ სპირალში შევიდეთ, რაც მისასალმებელია. მთავარია თემაა ამ მორიგ ორთაბრძოლაში ვინ გაიმარჯვებს, იმიტომ, რომ, მე ვფიქრობ, რომ აქ ჩვენ საქმე გვაქვს კონსტიტუციურ კოლიზიასთან.

საქმე იმაშია, რომ სალომე ზურაბიშვილის განაცხადი იყო ლობირება საქართველოს ევროკავშირში გაწევრიანების, ეს არის კონსტიტუციური მოთხოვნა. კონსტიტუციაში პირდაპირ წერია, რომ ყველა ინსტიტუტი ვალდებულია, ყველაფერი გააკეთოს იმისთვის, რომ ჩვენ გავწევრიანდეთ ევროკავშირში. ეს ვიზიტები ემსახურებოდა სალომე ზურაბიშვილის კონსტიტუციური მოვალეობის შესრულებას.

ახლა, ხელისუფლება მას იგივე კონსტიტუციაზე აპელირებით ეუბნება, რომ შენ დაარღვიე კონსტიტუციაო ანუ, ფაქტობრივად, ჩვენ გვაქვს კონსტიტუციის ორ ნორმას შორის გარკვეულ პოლიტიკურ წინააღმდეგობასთან საქმე.

● პაატა ზაქარეიშვილის კომენტარი: ხელისუფლებაში ყველაფერს აკეთებენ, რათა კანდიდატის სტატუსის მიღების ყოველგვარი შანსი მოანგრიონ
● ევროკავშირში საქართველოს ყოფილი ელჩი: NATO-ს კონტექსტში უკრაინისგან დაშორება რთული სანახავია
● ზურაბ ბატიაშვილის მოსაზრება: საქართველო, რომელიც თავის დროზე რეფორმების მედროშე იყო, ახლა ყველაზე ჩამორჩენილ ჯგუფშია

რეალურად, საზოგადოებამ, საკონსტიტუციო სასამართლომ უნდა გადაწყვიტოს, რომელ ნორმას აქვს პრიორიტეტი. ხელისუფლება, რომელიც უბრალოდ უკრძალავს პრეზიდენტს კონსტიტუციური მოვალეობის შესრულებას, ის, ჩემი აზრით, თვითონ არღვევს კონსტიტუციას და თუ მას აქვს საკმარისი საფუძველი იმისთვის, რომ პრეზიდენტს აუკრძალოს წასვლა, ამ შემთხვევაში, ის ანგარიშვალდებულია ქართველ ხალხთან, აგვიხსნას, რატომ იღებს ამ გადაწყვეტილებას.

მათი უარის ეს სამოტივაციო ნაწილი არ განეკუთვნება საიდუმლო ინფორმაციის კატეგორიას. მთავრობას ჰქონდა ვალდებულება, რომ სამოტივაციო ნაწილში მიეთითებინა თუ რის საფუძველზე ეუბნებოდა უარს, მან ეს არ გააკეთა – გაასაიდუმლოვა მოტივაცია და მე ვფიქრობ, მათ ამით დაარღვიეს კონსტიტუცია, იმიტომ, რომ შეზღუდეს ინსტიტუციური ლიდერი საკუთარი კონსტიტუციური მოვალეობის განხორციელებაში, რაც სახელმწიფოს გრძელვადიან ინტერესებს ემსახურება.

ახლა ამ კოლიზიებთან დაკავშირებით უნდა იმსჯელოს მთელმა საზოგადოებამ – ვინ რეალურად ლობირებს ევროკავშირში გაწევრიანებას, ვინ საბოტირებს.

კობახიძემ თქვა, რომ ან ქულების დაწერა უნდა პრეზიდენტსო, ან საბოტაჟი უნდაო. ფაქტობრივად, მან გააკეთა ვირეშმაკული პოლიტიკური განცხადება, რომ თუ სტატუსი მივიღეთო, სალომე ზურაბიშვილი უბრალოდ ქულებს იწერს და მეტი არაფერი აინტერესებსო და თუ სტატუსი ვერ მივიღეთო, ეს სალომე ზურაბიშვილის ბრალი იქნებაო. ეს არის წმინდა წყლის პოლიტიკური ვირეშმაკული თამაში და არანაირი კავშირი ამას სახელმწიფო ინტერესთან არ აქვს.

თვითონ კობახიძის დღევანდელი განცხადება არის უკვე სახელმწიფო ინტერესებისთვის ზიანის მიყენება და იმის დადასტურება, რომ მათი ინტერესია მხოლოდ ის, რომ საკუთარ ტყავზე, საკუთარ პოლიტიკურ ინტერესზე იზრუნონ და არ უნდათ სხვისი გაკეთებული თუნდაც სასარგებლო საქმე, რომ ვიღაცამ ქულები არ დაიწეროს. ამ პრიზმაში უყურებენ სამყაროს და ეს არის ამ ქვეყნის უბედურება.“