"ღორმუცელაა, ბოსტნეული უყვარს, მაგრამ ყველაფერს მაინც ჭარხალი ურჩევნია" - 13 ივნისის წყალდიდობის გმირი, ბეგი თბილისის ზოოპარკიდან. ვიდეო
ბეჰემოტი ბეგი
დღის უმეტეს ნაწილს წყალში ატარებს. მომვლელის დავით კალანდაძის დანახვისას, უკვე ხვდება, რომ ჭამის დრო მოვიდა და მშრალ ტერიტორიაზე ინაცვლებს.
“ახალი ცოცხალი ბალახი ყველაზე მეტად უყვარს, ღორმუცელაა, მაგრამ, ჭარხალი მაინც ყველაფერს ურჩევნიაო”, – ამბობს მისი საყვარელი მომვლელი – “ხმაზე მცნობს, გვერდზე რომ გავიდე და დავილაპარაკო, მაშინვე მოვაო”.
როგორ ცხოვრობს თბილისის ზოოპარკი: ყველა ვიდეო ხანდახან, როცა გაბრაზებულია, ბეგი ვოლიერის ბოლოში, რკინას ღრღნის. ეს ხშირად არ ხდება, წელიწადში რამდენჯერმეა ასეთ ხასიათზე, ალბათ მარტოობით იწყენსო, – ამბობს დავითი.
ბეჰემოტი ბეგი თბილისის ზოოპარკის ყველაზე ცნობილი ბინადარია. 2015 წლის 13 ივნისის წყალდიდობისას ზოოპარკის დატბორილი ტერიტორიიდან გაქცეული და ქალაქის ქუჩებში მოსიარულე ბეჰემოტის ამბავი, მაშინ მთელს მსოფლიოში გავრცელდა. იმ წყალდიდობას ბევრი ცხოველი ემსხვერპლა. ბეგი გადარჩა. ახლა ის მშვიდად ცხოვრობს თბილისის ზოოპარკში.
მაშინ თბილისის ცენტრში მოსეირნე ბეგი ხელოვანებისა და მოხალისეებისთვის მუზად იქცა. სტიქიიდან 7 წლისთავზე, თბილისში, მზიურის პარკში, ბეჰემოთი ბეგის ქანდაკება დადგეს.
თბილისის ზოოპარკს არსებობის თითქმის ასწლიანი ისტორია აქვს. ის 1927 წლის 10 თებერვალს, კავკასიის ცხოველთა საკლიმატიზაციო საზოგადოების ბაზაზე დაარსდა. საზოგადოება XX საუკუნის დასაწყისიდან ინახავდა ველურ ცხოველებს, თუმცა ზოოპარკის სტატუსი არ ჰქონდა.
თავდაპირველად ზოოპარკი მდინარე ვერეს ხეობაში, 70 ჰექტარზე იყო გაშენებული. წლების განმავლობაში დედაქალაქის განვითარებამ, მოგვიანებით კი 2015 წლის 13 ივნისის წყალდიდობამ, ძველი ზოოპარკის ტერიტორია მნიშვნელოვნად შეამცირა. დღესდღეობით მას 5 ჰექტარი უკავია. ზოოპარკს 1500-მდე ბინადარი ჰყავს. ყველა ცხოველს საკუთარი ისტორია აქვს.
ბლოგების ამ სერიით თბილისის ზოოპარკის ბინადრებს გაგაცნობთ. მოგიყვებით როგორია მათი ერთი, რუტინული დღე, როგორ ურთიერთობენ სხვა ცხოველებთან და ადამიანებთან, როგორი იცვლება მათი ქცევები ამინდის და სეზონების მიხედვით. აქ ბევრ საინტერესო ამბავს გაიგებთ.
