"გერმანია საქართველოსთან ურთიერთობების ყოვლისმომცველი გადახედვის რეჟიმშია" - პიტერ ფიშერი
გერმანია საქართველოსთან ურთიერთობების გადახედვის რეჟიმშია
საქართველოში გერმანიის ელჩის, პიტერ ფიშერის განცხადებით, გერმანიამ საქართველოსთან ურთიერთობების ყოვლისმომცველი გადახედვის გადაწყვეტილება მიიღო, მათ შორის, გააუქმა ერთობლივი ფორუმი, უარი თქვა „ღირსეულ პარტნიორში“ მონაწილეობაზე და ახალი ფინანსური ვალდებულებების აღებაზე.
ელჩმა ასევე არ გამორიცხა ბერლინის მიერ საქართველოს სამხედრო დახმარების გადახედვაც, თუმცა მან კატეგორიულად უარყო ინფორმაცია, რომ გერმანია აუქმებს სტუდენტურ ვიზებს საქართველოს მოქალაქეებისთვის.
ჩვენ საქართველოსთან ურთიერთობის ყოვლისმომცველი გადახედვის რეჟიმში ვართ. როგორც მოგეხსენებათ, ჩვენ გვაქვს ძალიან ღრმა და ფართო ურთიერთობა. შეერთებულ შტატებთან ერთად, ჩვენ ვართ საქართველოს განვითარების თანამშრომლობის ერთ-ერთი უმსხვილესი დონორი. ჩვენ გადავწყვიტეთ, რომ ამ დროისთვის საქართველოს მიმართ რაიმე ახალი ფინანსური ვალდებულება არ ავიღოთ. გერმანიის სამხედროებმა ასევე გააუქმეს მონაწილეობა წვრთნებში „Noble Partner“. ჩვენ გავაუქმეთ დიდი იურიდიული ფორუმი, რომელიც გასულ წელს თბილისში გაიმართა და ამ ზაფხულს ბერლინში უნდა ჩატარებულიყო. განვიხილავთ შემდგომ მოქმედებებსაც, – განუცხადა ფიშერმა ჟურნალისტებს.
მისივე თქმით, საქართველოს ევროკავშირში გაწევრიანების პროცესი შეჩერებულია, მაშინ როდესაც ამ მიმართულებით სწრაფი პროგრესი შესაძლებელი იყო. როგორც ელჩი განმარტავს, საქართველოს მთავრობის მოქმედებიდან გამომდინარე, “საბჭომ რომელიც არის 27 სახელმწიფოს და მთავრობის მეთაურმა, “იმ ხალხმა ვინც რეალურად წყვეტს გაფართოებას”, 27 ივნისს მიიღო გადაწყვეტილება, რომ გაწევრიანების პროცესი შეჩერებულია.
“ჩვენ გვინდა წინსვლა, მაგრამ გაფართოების პროცესის სიჩქარე და ხარისხი კანდიდატი ქვეყნის ხელშია. ჩვენო მივესალმებოდით საქართველოს ევროკავშირში. მაგრამ თქვენ იცით პროცესი — თქვენ უნდა აკმაყოფილებდეთ ჩვენს სტანდარტს. და თუ არ აკმაყოფილებ, ვერ შეუერთდები [ევროკავშირს]. ასე რომ, საქართველოს მოქალაქეები უნდა დაფიქრდეთ, რამდენად მნიშვნელოვანია ევროკავშირი თქვენთვის, თქვენი შვილებისთვის, თქვენი შვილიშვილებისთვის. თქვენ უნდა დაუბრუნდეთ კურსს“, — განაცხადა ფიშერმა.
პიტერ ფიშერმა იმედი გამოთქვა, რომ საქართველო-გერმანიის ურთიერთობები დაუბრუნდება პოზიტიურ დინამიკას, რომელიც ორ ქვეყანას 30 წლის განმავლობაში ჰქონდა.
“ჩვენ მეგობრები და პარტნიორები ვართ, გვინდა საქართველოს ევროკავშირში გაწევრიანება. ეს არის ყველაზე დიდი მეგობრობის აქტი, რაც შეგვიძლია ქართველ ხალხს ვაჩვენო. ქართველი ხალხის წინააღმდეგ რამეს გაკეთება არ არის განზრახული“, — განაცხადა ფიშერმა.
ჟურნალისტებმა მას ჰკითხეს საქართველოს საგარეო საქმეთა მინისტრ ილია დარჩიაშვილის შეფასებაზე, რომ საქართველოს თავდაცვის სექტორისთვის ფინანსური დახმარების შეჩერება მიკრო გადაწყვეტილებაა, რაზედაც ელჩმა უპასუხა:
“გაწევრიანების პროცესი და ევროკავშირის პოლიტიკა ძალიან ადვილი გასაგებია. თქვენ მხოლოდ უნდა წაიკითხოთ ევროკავშირის ხელშეკრულებები და გაიგებთ რას წარმოადგენს ევროკავშირი. წაიკითხეთ კოპენჰაგენის კრიტერიუმები და გეცოდინებათ, რა არის საჭირო გასაწევრიანებლად. წაიკითხეთ კომისიის შეფასებები, წაიკითხეთ ევროპული საბჭოს გადაწყვეტილება.
ევროპული საბჭო დაკომპლექტებულია 27 სახელმწიფოს და მთავრობის მეთაურისგან, მათ შორისაა კანცლერი შოლცი, მაკრონი და სხვა ლიდერები. ისინი არიან პოლიტიკური ლიდერები. ისინი წყვეტენ ევროკავშირში გაწევრიანებას. ასე რომ, ყველას შეუძლია, თავად ნახოს, ეს [გადაწყვეტილების მიმღები] უმაღლესი დონეა.“
● აშშ-მა საქართველოსთან სამხედრო სწავლება განუსაზღვრელი ვადით გადადო
● რუსეთის საგარეო დაზვერვა ამტკიცებს, რომ აშშ საქართველოში გადატრიალებას გეგმავს. რას პასუხობს ვაშინგტონი
გამოხმაურება
საქართველოს პარლამენტის ვიცე-სპიკერი გია ვოლსკი ჟურნალისტებთან საუბრისას პიტერ ფიშერის განცხადებას გამოეხმაურა და აღნიშნა, რომ მისი ნათქვამი კითხვებს აჩენს, “მართლაც” ხომ არ არის ხელისუფლების შეცვლის იდეა.
“არ არის სწორი ბატონი ფიშერი ამ შემთხვევაში და საზოგადოებას უნდა ესმოდეს, რომ რიტორიკის შედეგი შეიძლება იყოს იმ რიტორიკაზე რეაგირება, რომელიც თუნდაც დღევანდელ ევროკომისარს, ესტონეთის ყოფილ პრემიერს ჰქონდა საქართველოს მიმართ. ასეთი განცხადების გაკეთება ყველაზე მცირე უსამართლობაა და გარკვეულ კითხვებს წარმოშობს, მართლაც ხომ არ არის ამ ნაბიჯების უკან რაღაც იდეა, რომ შეიცვალოს ეს ხელისუფლება და ლომჯარიამაგვარი ადამიანებით დაკომპლექტდეს ხელისუფლება, მაშინ, როდესაც არჩევნები არის სულ ახლო მომავალში.” – თქვა ვოლსკიმ.
წინაისტორია
საქართველოში ევროკავშირის ელჩის პაველ ჰერჩინსკის განცხადებით, ევროკავშირმა გაყინა 30 მილიონი ევროს დახმარება, რომლის გადმორიცხვა ევროპული სამშვიდობო ფონდიდან (EPF) იგეგმებოდა საქართველოს თავდაცვის ძალებისთვის.
პაველ ჰერჩინსკის თქმით, საქართველოს ევროკავშირში გაწევრიანების პროცესი ამჟამად გაჩერებულია. ეს ევროკავშირის ლიდერებმა ევროპული საბჭოს ბოლო სხდომაზე, 27 ივნისს, გადაწყვიტეს
ელჩი ამბობს, რომ სიტუაციის შემდგომი გაუარესების შემთხვევაში განიხილება სხვა ზომების მიღებაც:
“ამ დროისთვის ფული, რომლის გადარიცხვასაც ვგეგმავდით საქართველოს თავდაცვის სამინისტროსთვის და რომელიც 30 მილიონ ევროს შეადგენს, გაყინულია. ეს არის მხოლოდ პირველი ნაბიჯი, იქნება სხვა ნაბიჯებიც”.
ელჩის განცხადებით, ევროკავშირის პირდაპირი მხარდაჭერა საქართველოს მთავრობის მიმართ, შემცირდება და ფოკუსირებული იქნება სამოქალაქო საზოგადოებასა და მედიაზე.
საქართველოს საგარეო საქმეთა მინისტრმა ილია დარჩიაშვილმა ზემოაღნიშნულს „მიკრო დონეზე მიღებული გადაწყვეტილებები“ უწოდა.
ევროპული საბჭოს 27 ივნისის სხდომის დასკვნებში ნათქვამია, რომ „უცხოური გავლენის გამჭვირვალობის შესახებ“ მიღებული კანონი კანდიდატის სტატუსის მინიჭების შესახებ ევროკომისიის რეკომენდაციაში მითითებულ ნაბიჯებთან დაკავშირებით უკუსვლას წარმოადგენს.
