გარეჯში ივერი მელაშვილს და "მთავარის" გადამღებ ჯგუფს სასულიერო პირები თავს დაესხნენ

სიუჟეტის მოსამზადებლად დავითგარეჯში წასულ ე.წ. “კარტოგრაფების საქმის” მონაწილეს, ივერი მელაშვილს და ტელეკომპანია “მთავარის” გადამღებ ჯგუფს თავს სასულიერო პირები დაესხნენ. ივერი მელაშვილს დაზიანება არ აქვს, თუმცა ნაცემია ოპერატორი და დამტვრეულია მისი კამერა. ისინი “შაბათის მთავარისთვის” სიუჟეტს ამზადებდნენ. 

“სასულიერო პირები ფიზიკურად გაუსწორდნენ როგორც ივერი მელაშვილს, ისე ჟურნალისტებს. იყო სიტყვიერი დაპირისპირება, თუმცა, ივერისთან მიმართებაში არ ყოფილა ფიზიკური ძალადობა. ფიზიკურად შეეხნენ ჟურნალისტს და ოპერატორს” , – უთხრა “ფორმულას” ივერი მელაშვილის ადვოკატმა ედუარდ მარიკაშვილმა.

მისი თქმით, ისინი არიან ხელისუფლების იმ განცხადებების მსხვერპლები, რომლითაც მათ “მოღალატეებად” აცხადებენ. 

თავდასხმის შემდეგ, უკან გამობრუნებულ გადამღებ ჯგუფს გზა მოქალაქეებმაც გადაუკეტეს და სიტყვიერი შეურაცხყოფა მიაყენეს.

“საერთოდ რატომ ჩახვედი გარეჯში”, “პირველი და უკანასკნელი იყოს შენი მოსვლა დავითგარეჯში”, – ეუბნებოდნენ ისინი ივერი მელაშვილს.

შსს-მ გამოძიება სისხლის სამართლის კოდექსის 126-ე, ძალადობის მუხლით დაიწყო, თუმცა გამოძიება ჯერჯერობით დაწყებული არ არის ჟურნალისტების საქმიანობაში ხელის შეშლის ფაქტზე. 

თავდასხმას გამოეხმაურა ჟურნალისტური ეთიკის ქარტიაც. ქარტია მოუწოდებს ხელისუფლებას, დაიცვას ჟურნალისტთა უსაფრთხოება და პროფესიული საქმიანობის შესრულებისას მედიას შეუქმნას შესაბამისი სამუშაო პირობები, რათა მოქალაქეებს ჰქონდეთ შესაძლებლობა, მიიღონ ინფორმაცია მიმდინარე პროცესებთან დაკავშირებით. 

მათი თქმით, ბოლო პერიოდში ჟურნალისტებზე გახშირებულ თავდასხმებს ხელისუფლების აგრესიული რიტორიკა და სამართალდამცავი უწყებების მხრიდან არასათანადო რეაგირება განაპირობებს, ამიტომ, მნიშვნელოვანია, თითოეული ფაქტი სათანადოდ იყოს გამოძიებული.

თავად ივერი მელაშვილის თქმით, სასულიერო პირებიც და ის მოქალაქეებიც, რომლებიც დღეს თავს დაესხნენ, შეცდომაში არიან შეყვანილები და ეს ხელისუფლების ბრალია. 

“ზოგი შეიძლება იყოს პროვოკატორი, მაგრამ ისინი ჩვეულებრივი ადამიანები არიან. ვიღაცამ ჩაუდო თავში, რომ მელაშვილი გამყიდველია, მან რაღაც გადასცა და გაყიდა. სინამდვილეში ამდაგვარი არაფერი მომხდარა.

შეცდომაში შეყვანილები არიან ხელისუფლების, ამ პროვოკატორების მიერ. ხელისუფლებას ვადანაშაულებ ამაში, პროკურატურას და მართლმსაჯულებას. 

წარმოიდგინეთ, სულ ალალმართალ კაცს ჩვეულებრივი ადამიანი მიპირისპირდება, მეძახის მოღალატეს, მაგინებს, შეურაცხყოფას მაყენებს”, – ამბობს მელაშვილი.

___________________________

● კარტოგრაფების საქმე, გიორგი რურუა და სასამართლო კლანი – საქართველო სახდეპის ანგარიშში
● სამი არგუმენტი, რატომ არის კარტოგრაფების საქმე პოლიტიკური. არასამთავრობოების პოზიცია
● უძველესმა სამონასტრო კომპლექსმა შესაძლოა საქართველო და აზერბაიჯანი ერთმანეთს დაუპირისპიროს

_______________________________

კარტოგრაფების საქმე

საპარლამენტო არჩევნებამდე ერთი თვით ადრე საქართველოს ხელისუფლებამ სკანდალური გამოძიება დაიწყო – აღიძრა სისხლის სამართლის საქმე, რომელიც ეხება საქართველოს ტერიტორიების უკანონო დათმობას აზერბაიჯანის სასარგებლოდ.

დააკავეს ორი ადამიანი – სახელმწიფო კომისიის ყოფილი წევრები – ივერი მელაშვილი და ნატალია ილიჩოვა, რომლებიც შემდეგ გირაოთი გაათავისუფლეს.

საქმის მასალებს წინა ხელისუფლებამდე, კერძოდ კი მიხეილ სააკაშვილამდე მივყავართ.

მოკლედ საქმის არსი შემდეგშია: გამოძიების თანახმად, სააკაშვილის დროს მომუშავე საქართველო-აზერბაიჯანის დელიმიტაცია-დემარკაციის სახელმწიფო კომისიამ გადამალა მნიშვნელოვანი რუკა, რის შედეგადაც ტერიტორიების გარკვეული ნაწილი, რომლებიც წესით საქართველოს კუთვნილებაა, აზერბაიჯანულ მხარეს უნდა გადასცემოდა.

ამ საქმეს საქართველოში ოპოზიციის და ექსპერტების ერთი ნაწილი პოლიტიკურად მოტივირებულად მიიჩნევს, რომლის მიზანია არჩევნებამდე 24 დღით ადრე ოპოზიციის ლიდერის, მიხეილ სააკაშვილის დისკრედიტირება.

ხელისუფლებას ასევე აკრიტიკებენ იმის გამო, რომ აღნიშნული ბუნდოვანი გამოძიება ყარაბაღის ომის ფონზე მიმდინარეობს.

ასევე, ხელისუფლების ოპონენტები ყურადღებას ამახვილებენ კიდევ ერთ დეტალზე – რუკა, რომლის საფუძველზეც გამოძიება დაიწყო, პროკურატურას რუსეთში მოღვაწე, “ქართულ ოცნებასთან” დაახლოებულმა ქართველმა ბიზნესმენმა გადასცა.