ველოსიპედით სომხეთიდან საქართველოში

სომხეთის სამ რაიონში – ლორეში, შირაქსა და თავუშში მცხოვრებმა 12-მა ველოსიპედისტმა სამდღიანი ტური მოაწყო საქართველოში. ისინი ვანაძორიდან ბორჯომში ჩავიდნენ. მთავარი, რაც ველოსიპედისტებმა შენიშნეს, ისაა, რომ სომხეთში ველოსპორტისათვის საჭირო პირობები  საერთოდ არ არის შექმნილი, საქართველოში კი პირიქით, ყველა პირობაა იმისთვის, რომ სპორტის ეს სახეობა განვითარდეს.

“საქართველოში მხოლოდ ნინოწმინდამდე მისასვლელი გზა იყო ცუდ მდგომარეობაში. ამის შემდეგ როგორც ბორჯომში, ისე მეზობელ სოფლებში, ძალიან კარგი, ველოტურებისათვის ადაპტირებული ტრასები დაგვხვდა. იმავე რეგიონში ტყის ველობილიკებიც აღმოვაჩინეთ. სომხეთთან შედარებაც კი არ შეიძლება, რადგან ჩვენს სამშობლოშ არსად მინახავს ადაპტირებული გზები და სხვა პირობები ველოსპორტის განვითარებისათვის”, – ამბობს ტურის მონაწილე სურენ არუთიუნიანი.

“სომხეთში ისეთი გზებია, რომ მათზე მხოლოდ ექსტრემალ ველოსიპედისტებს შეუძლიათ მოძრაობა. გზები არ არის, პატარა ქალაქებსა და სოფლებში კი საერთოდ საშინელი მდგომარეობაა”, – ადასტურებს ტურის კიდევ ერთი მონაწილე, 36 წლის დავიდ ვოსკანიანი.

სურენ არუთიუნიანმა, რომელიც, ამავდროულად ლორეს რაიონის სოფელ ძორაგიუხის მამასახლისია, განსაკუთრებით გაუსვა ხაზი მეზობელი ქვეყნის მოვლილობას: “ტყის ველობილიკებზეც კი ყოველ რამდენიმე მეტრში ნაგვის კონტეინერები დგას. მინდა, რომ ასეთი წესრიგი სომხეთშიც იყოს”.

ველოტურის ორგანიზატორია ვანაძორის საზოგადოებრივი ორგანიზაციის ცენტრი. ღონისძიების მიზანია ველოსპორტისა და საერთაშორისო აგროტურიზმის განვითარება. ერთთვიანი ვარჯიშის შემდეგ (რომელშიც 350 ადამიანი მონაწილეობდა) ორგანიზატორებმა გადაწყვიტეს, ამ მოსამზადებელი ღონისძიების შედეგად გამოვლენილი საუკეთესო სპორტსმენები ვანაძორი-ბორჯომის ტურში გამოეცადათ.

ამინდის ხშირი ცვალებადობის, ყინვის, მუდმივი თოვის, ძლიერი ქარისა და გზაზე შექმნილი მრავალი სხვა პრობლემის მიუხედავად, მონაწილეები დარწმუნებულნი არიან, რომ ცდამ გაამართლა და ყველასთვის მისაბაძი აღმოჩნდა.

“ველოსიპედებით სოფლებში რომ შევდიოდით, ადგილობრივი მოსახლეობა მოდიოდა და ჩვენი წამოწყებით ინტერესდებოდა. გვეუბნებოდნენ, რომ მათაც სურდათ მსგავს ღონისძიებებში მონაწილეობის მიღება. ახლა კი საშუალებების გამონახვას ვცდილობთ, რომ ამ პროექტში კიდევ უფრო მეტმა ადამიანმა შეძლოს მონაწილეობის მიღება”, – ამბობს დავიდი.

სურენი კი საკითხს სოფლის თემის თავკაცის პოზიციიდან აფასებს და აღნიშნავს, რომ ორ ქვეყანაში ველოსპორტის განვითარება და უფრო მეტი ველოტურის ჩატარება სასაზღვრო სოფლების განვითარებაზეც დადებითად აისახება.

გაზაფხულისთვის ცენტრი ვარჯიშების განახლებასა და ამ ღონისძიებაში მაქსიმალურად ბევრი ადამიანის ჩართვას გეგმავს.