20 სექტემბერს დღის პირველ ნახევარში ეროვნული ბანკის ზედიზედ ორმა ვიცე-პრეზიდენტმა დატოვა დაკავებული თანამდებობა. მოგვიანებით კი თანამდებობა დატოვა სებ-ის მესამე ვიცე-პრეზიდენტმა ნიკოლოზ გაგუამ და პრეზიდენტის მრჩეველმა გიორგი ბაქრაძემ.
ვიცე-პრეზიდენტები და მრჩეველი თანამდებობიდან მას შემდეგ გადადგნენ, რაც საქართველოს ეროვნულმა ბანკმა საერთაშორისო სანქციების ქვეშ მყოფ ყოფილ გენერალურ პროკურორს, ოთარ ფარცხალაძეს პირად საბანკო ანგარიშებზე წვდომა აღუდგინა.
„მეგობრებო და კოლეგებო, ვტოვებ ეროვნულ ბანკში ჩემ თანამდებობას“, – წერს მესტვირიშვილი სოციალურ ქსელში.
პაპუნა ლეჟავამ კი, გადადგომის შესახებ განცხადება მეილით გაუგზავნა ეროვნული ბანკის პრეზიდენტის მოვალეობის შემსრულებელს, ნათია თურნავას.
„პაპუნა ლეჟავამ ელექტრონული კომუნიკაციის საშუალებით მაცნობა, რომ განცხადება დაწერა გადადგომაზე. კარგი პროფესიონალია, ამდენი წელი მუშაობდა ეროვნულ ბანკში. მე იმის თქმა მინდა, რომ შეიძლება სხვადასხვა პიროვნებას, ჩემს კოლეგას თუ უკვე ყოფილ კოლეგას ჰქონდეს თავისი შეხედულებები ამა თუ იმ თემასთან დაკავშირებით. ჩემთვის ეჭვგარეშეა, რომ როცა საქმე ეხება ეროვნული ბანკის მიერ საქართველოს კონსტიტუციის აღსრულებას და მასთან შესაბამისობას და საქართველოს მოქალაქეების ფუნდამენტური უფლებების დაცვას, აქ ორი აზრი არ უნდა არსებობდეს. აქ ჩემი პოზიცია არის ნათელი და შეუქცევადი.” – განაცხადა თურნავამ.
საქართველოს ყოფილ გენერალურ პროკურორს, ოთარ ფარცხალაძეს ამერიკის შეერთებულმა შტატებმა სანქციები 14 სექტემბერს დაუწესა. ამერიკული მხარე აცხადებს, რომ სანქციების დაწესება ფარცხალაძის ბ რუსულ “ეფესბესთან” თანამშრომლობას და მის ბიზნესსაქმიანობას უკავშირდება. ამერიკულ მედიაში ფარცხალაძე მოხსენიებული იყო როგორც “ქართველი-რუსი ოლიგარქი”.
თავდაპირველად, ფარცხალაძის დასანქცირების შემდეგ, ეროვნულმა ბანკმა, სანქციების წესიდან გამომდინარე, ფარცხალაძეს პირად ანგარიშებზე წვდომა შეუზღუდა, თუმცა სებ-ის ამ გადაწყვეტილებას “ქართული ოცნების” ლიდერებმა ანტიკონსტიტუციური უწოდეს და მწვავედ გააკრიტიკეს. ამის შემდეგ სებ-მა კვლავ შეცვალა თავისი პოზიცია და ფარცხალაძეს ანგარიშებზე წვდომა აღუდგინა.
ქართველი პოლიტიკოსები და ექსპერტები მიიჩნევენ, რომ სებ-ის ქმედებების უკან ქვეყნის არაფორმალური მმართველი, ბიძინა ივანიშვილი დგას. ისინი ამბობენ, რომ საერთაშორისო სანქციების უგულებელყოფა და ასევე ეროვნულ ბანკზე პოლიტიკური ზეწოლა ქვეყნის პოლიტიკური და ეკონომიკური სტაბილურობისთვის დიდ რისკებს შეიცავს.
