ევროპული კურსის მხარდასაჭერად თბილისში ათი ათასობით ადამიანი შეიკრიბა. ფოტო
აქცია საქართველოს ევროპული კურსის მხარდასაჭერად
“შინ ევროპისკენ”, “წინ ევროპისკენ”, “ევროპა ჩვენი სახლია” – მსგავსი ტრანსფარანტებით საქართველოს დედაქალაქში ათი ათასობით ადამიანი შეიკრიბა. 20 ივნისს, კანდიდატის სტატუსის შესახებ ევროკომისიის პასუხამდე ოთხი დღით ადრე აქციის მონაწილეები საქართველოსა და ევროკავშირის დროშებს აფრიალებდნენ.
აქციის მონაწილეები საქართველოს ევროპული კურსის მხარდასაჭერად შეიკრიბნენ. ისინი ევროკომისიის მოთხოვნების შესრულებას და მათ შორის, “დეოლიგარქიზაციას” ითხოვდნენ.
ეს ბოლო პერიოდში გამართულ აქციებს შორის ერთ-ერთი, ყველაზე ხალხმრავალი და მასშტაბური აქციაა. გადაიკეტა რუსთაველის ქუჩა.
საპროტესტო აქცია სამოქალაქო მოძრაობა “სირცხვილიამ” დაგეგმა მას შემდეგ, რაც ევროკომისიამ საქართველოს კანდიდატის სტატუსის მიცემას რეკომენდაცია არ გაუწია.
- “ჩალის ფასი”, “ფეიკი”, “ომში ჩათრევა” – ხელისუფლება ევროპარლამენტის რეზოლუციაზე
- “ყველას ვაწყენინეთ, იზოლაციის საფრთხეში ვართ”- რა თქვა საქართველოს პრეზიდენტმა. მოკლედ
უზარმაზარი სცენიდან, რომელიც სპეციალურად ამ დღისთვის დამონტაჟდა, აქციის მონაწილეებს სამოქალაქო საზოგადოების წარმომადგენლებმა, ასევე უკრაინაში მყოფმა ქართველმა მებრძოლებმა, უკრაინის ხელისუფლებისა და ევროკავშირის წარმომადგენლებმა მიმართეს.
აქცია სამოქალაქო მოძრაობა “სირცხვილიას” ინიციატივით დაიგეგმა მას შემდეგ, რაც საქართველოს შესახებ ევროკომისიამ კანდიდატის სტატუსის მინიჭებაზე რეკომენდაცია არ გასცა.
ევროკომისიის გადაწყვეტილებაში, რომელიც 17 ივნისს გასაჯაროვდა, საქართველოს მთელი რიგი პირობები აქვს წაყენებული იქამდე, ვიდრე კანდიდატის სტატუსს მიიღებს.
ბევრ სხვა პირობას შორის, არის “დეოლიგარქიზაციის” მოთხოვნა.
“ეკონომიკურ, პოლიტიკურ და სოციალურ სფეროებში გადაჭარბებული გავლენების აღმოფხვრით განხორციელდეს “დეოლიგარქიზაციის” ვალდებულება“, – წერია კომისიის შეფასებაში.
სწორედ ამიტომ, ამ აქციაზე ბევრი ფიქრობდა, რომ პოლიტიკური მოთხოვნებიც უნდა გაჟღერებულიყო, მათ შორის – მოქმედი პრემიერის, ირაკლი ღარიბაშვილის გადადგომა, რომელიც, საზოგადოების დიდი ნაწილის აზრით, ოლიგარქ ივანიშვილის დავალებების შემსრულებელია და რიგგარეშე არჩევნები.
მას, ვისაც ეს მოთხოვნა აქვს, ფიქრობს, რომ სინამდვილეში ევროკომისიამ რეკომენდაციებით ხალხს მიმართა და არა ხელისუფლებას. მათი არგუმენტი ის არის, რომ ხელისუფლებას უკვე დეკლარირებულად პრორუსული კურსი აქვს და დარჩენილ 180 დღეში, არაფერს არ გააკეთებს (180 დღე – ზუსტად ეს დრო აქვს ხელისუფლებას იმისათვის, რომ ევროკავშირის რეკომენდაციები შეასრულოს და კანდიდატის სტატუსი მიიღოს_JAMnews).
საქართველომ ევროკავშირში გაწევრიანების განაცხადი 3 მარტს წარადგინა.
11 აპრილს ევროკავშირისგან თვითშეფასების კითხვარის პირველი ნაწილი მიიღო. 2 მაისს საქართველოს პრემიერ-მინისტრმა ირაკლი ღარიბაშვილმა საქართველოში ევროკავშირის ელჩს, კარლ ჰარცელს კითხვარის პირველი ნაწილის პასუხები გადასცა. 10 მაისს ასევე კარლ ჰარცელს გადასცეს შევსებული კითხვარის მეორე ნაწილი. 17 ივნისს, ცნობილი გახდა ევროკომისიის შეფასება საქართველოს განაცხადზე.
ახლა ბოლო ეტაპია დარჩენილი – 23-24 ივნისს, სამიტზე ევროკომისია წარმოადგენს მოსაზრებას საქართველოს, უკრაინისა და მოლდოვის წევრობის განაცხადების შესახებ. უკრაინას და მოლდოვას უკვე აქვთ ევროკომისიის დადებითი რეკომენდაცია და ევროპარლამენტის ასევე დადებითი რეზოლუცია. საქართველოს შემთხვევაში კი ორივე დოკუმენტი უარყოფითია.
აქცია საქართველოს ევროპული კურსის მხარდასაჭერად
