ევროკომისია რეკომენდაციას იძლევა, საქართველოს კანდიდატის სტატუსი მიენიჭოს. რა დათქმები მიიღო ქვეყანამ
ევროკომისიის დასკვნა სტატუსზე
8 ნოემბერს, 15 საათზე ბრიუსელში, სპეციალურ პრესკონფერენციაზე ევროკომისიის პრეზიდენტმა ურსულა ფონ დერ ლაიენმა გამოაცხადა, რომ ევროკომისია გასცემს რეკომენდაციას, დეკემბერში საქართველოს მიენიჭოს ევროკავშირის წევრობის კანდიდატის სტატუსი.
▇ ევროკომისია გამოდის რეკომენდაციით, საქართველოს მიენიჭოს ევროკავშირის წევრობის კანდიდატის სტატუსი – იმ დათქმით, რომ ქვეყანა გარკვეულ რეფორმებს განახორციელებს, თქვა ევროკომისიის პრეზიდენტმა.
ფონ დერ ლაიენის ეს განცხადება ეყრდნობა ევროკავშირის გაფართოების შესახებ ევროკომისიის ყოველწლიურ ანგარიშს, რომელიც ასევე დღეს გამოქვეყნდა. ანგარიშში შეფასებული იყო იმ ქვეყნების მიერ მიღწეული პროგრესი, რომლებიც ბლოკში გაერთიანებისკენ ისწრაფვიან. საუბარია ათ ქვეყანაზე, მათ შორის დოკუმენტში საქართველოს მიერ ევროკომისიის მიერ განსაზღვრული 12 პრიორიტეტის შესრულებაც შეფასდა.
ასევე, შეფასდა ევროინტეგრაციის გზაზე უკრაინის და მოლდოვას პროგრესი. ევროკავშირის ანგარიში ასევე რეკომენდაციას უწევს ევროკავშირს გაწევრიანების ოფიციალური მოლაპარაკებები დაიწყოს უკრაინასა და მოლდოვასთან.
უკრაინაში საომარი მოქმედებების დაწყების შემდეგ სამმა ქვეყანამ – უკრაინამ, მოლდოვამ და საქართველომ ევროკავშირის წევრობაზე განაცხადი გააკეთეს. 2022 წლის ივნისში ევროკავშირმა უკრაინასა და მოლდოვას ევროკავშირის წევრობის კანდიდატის სტატუსი მიანიჭა, საქართველოს კი სტატუსზე. უარი ეთქვა. სანაცვლოდ საქართველომ ევროპული პერსპექტივა მიღო და კანდიდატის სტატუსის მოსაპოვებლად 12-პუნქტიანი წინაპირობა დაუწესდა. ამგვარად, უკრაინამ და მოლდოვამ ერთი ნაბიჯით გაუსწრეს საქართველოს ევროინტეგრაციის გზაზე.
ევროკომისიის რეკომენდაცია მნიშვნელოვანია, თუმცა არა საბოლოო. მიიღებს თუ არა საქართველო ევროკავშირის წევრობის კანდიდატის სტატუსს, ეს საბოლოოდ გადაწყდება დეკემბერში. საბოლოო გადაწყვეტილება ევროკავშირის 27 წევრ სახელმწიფოზეა. მათი ერთსულოვანი თანხმობაა საჭირო, რომ საქართველომ სტატუსი მიიღოს. ერთი მათგანის უარის შემთხვევაშიც კი, საქართველო სტატუსს ვერ მიიღებს.
რა ითქვა პრესკონფერენციაზე
ფონ დერ ლაიენმა პრესკონფერენციაზე ხაზგასმით აღნიშნა, რომ ევროკავშირში განსაკუთრებით აფასებენ ქართველი ხალხის სწრაფვას ევროკავშირისკენ.
“ევროკავშირი სრულად უჭერს მხარს საქართველოს მოსახლეობის უდიდესი უმრავლესობის გულწრფელ სურვილს, გაწევრიანდეს ევროკავშირში“.
მისი თქმით, ევროკავშირისადმი ქართველი ხალხის ეს სწრაფვა “უკეთ უნდა აირეკლოს ხელისუფლებამ“.
ევროკომისიის პრეზიდენტის თქმით, საქართველომ ბოლო თვეების განმავლობაში „გადადგა ნაბიჯები ევროკავშირთან ჩართულობის გასაძლიერებლად და რეფორმების განსახორციელებლად“, მათ შორის მიიღო კანონები გენდერული თანასწორობის, ქალთა მიმართ ძალადობისა და ორგანიზებული დანაშაულის წინააღმდეგ საბრძოლველად.
ბრიუსელში გადაწყვეტილების გამოცხადებისთანავენ ბრიფინგი გამართა ევროკავშირის ელჩმა საქართველოში, პაველ ჰერჩინსკიმ.
“ჩემი გულითადი მილოცვა ყველა პოლიტიკურ ლიდერს, ხელისუფლებას, ოპოზიციას, პარლამენტს, პრეზიდენტს, არასამთავრობო სექტორს, მედიას, მაგრამ, პირველ რიგში, ჩემი მილოცვა ქართველ ხალხს, რომელიც ყოველთვის მტკიცედ და უპირობოდ უჭერს მხარს საქართველოს ევროპულ არჩევანს,” – განაცხადა ჰერჩინსკიმ.
მან ასევე ისაუბრა იმაზე, რომ საქართველოსთვის კანდიდატის სტატუსის მინიჭების რეკომენდაცია მნიშვნელოვან ნაბიჯებს მოითხოვს.
“ამ ნაბიჯების შესრულებაზე იქნება დამოკიდებული შემდეგ ეტაპზე გადასვლის საკითხი. ეს არის გაფართოების პროცესის ბუნება – მუდმივი რეფორმები, რომ თქვენი ქვეყანა მზად იყოს, როგორც ევროკავშირის სრულუფლებიანმა წევრმა, საკუთარი ადგილი დაიკავოს”, – თქვა ელჩმა და განმარტა, რომ საქართველოს სამუშაო აქვს მედიის თავისუფლების, სასამართლოს დამოუკიდებლობის, სამართლიანი არჩევნების მიმართულებებით და ასევე ანტიდასავლური პროპაგანდის წინააღმდეგ.
● დენიელ ფრიდი: საქართველო არასწორ ცხენზე დებს ფსონს, ევროპას არ სჭირდება კიდევ ერთი უნგრეთი
● პაატა ზაქარეიშვილის კომენტარი: ხელისუფლებაში ყველაფერს აკეთებენ, რათა კანდიდატის სტატუსის მიღების ყოველგვარი შანსი მოანგრიონ
● მოლდოვის ყოფილი პრორუსი პრეზიდენტი ქვეყანას მოუწოდებს, საქართველოს ხელისუფლებას მიბაძოს
რა დათქმები მიიღო საქართველომ
საქართველომ 12 რეკომენდაციიდან სრულად შეასრულა მხოლოდ სამი:
- აირჩია დამოუკიდებელი სახალხო დამცველი;
- გაატარა მნიშვნელოვანი ნაბიჯები გენდერული თანასწორობისა და ქალთა მიმართ ძალადობის წინააღმდეგ ბრძოლის მიმართულებით;
- გაითვალისწინა ევროპის ადამიანის უფლებათა სასამართლოს გადაწყვეტილებები.
თუმცა, მიუხედავად ამისა, ევროკომისიამ კონკრეტული დათქმებით გაუწია საქართველოს რეკომენდაცია ევროკავშირის წევრობის სტატუსის მისაღებად.
რეკომენდაცია სტატუსის მინიჭების თაობაზე ევროკომისიამ გასცა ცხრა მნიშვნელოვანი დათქმით.
დათქმებს შორის უმეტესობა ისეთია, რომლებიც საქართველოს უკვე ჰქონდა 12 პუნქტიან გეგმაში რეკომენდაციების სახით.
თუმცა, არის ახალი პუნქტებიც. მაგალითად, ერთ-ერთი მნიშვნელოვანი მოთხოვნაა ის, რომ საქართველომ თავისი საგარეო და უსაფრთხოების პოლიტიკა ევროკავშირისას დაუახლოოს. ასევე, ქვეყანამ უნდა გააქტიუროს ბრძოლა დეზინფორმაციასთან.
დათქმების ჩამონათვალი ასეთია:
- ბრძოლა ევროკავშირისა და მისი ღირებულებების შესახებ გავრცელებულ დეზინფორმაციასთან, უცხოურ საინფორმაციო მანიპულაციებთან და [უცხოურ] ჩარევასთან;
- საქართველოს საგარეო პოლიტიკა უფრო მეტად თანხვედრაში უნდა მოვიდეს ევროკავშირის საერთო საგარეო და უსაფრთხოების პოლიტიკასთან;
[ამჟამად ევროკავშირის საგარეო და უსაფრთხოების პოლიტიკასთან საქართველოს თანხვედრის მაჩვენებელი დაახლოებით 43%-ია, – როდესაც ორიოდე წლის წინ 60%-ს აჭარბებდა. გაცილებით მაღალია მოლდოვისა და უკრაინის მაჩვენებლები] - პოლიტიკური პოლარიზაციის დაძლევა. მათ შორის პარლამენტში ოპოზიციურ პარტიებთან მეტად მუშაობის გზით, განსაკუთრებით საქართველოს ევროინტეგრაციასთან დაკავშირებულ კანონმდებლობაზე;
- ქვეყანამ უნდა უზრუნველყოს თავისუფალი, სამართლიანი და კონკურენტუნარიანი საარჩევნო გარემო და საარჩევნო პროცესი. სრულად უნდა იყოს გათვალისწინებული ეუთოს დემოკრატიული ინსტიტუტებისა და ადამიანის უფლებების ოფისის რეკომენდაციები. საარჩევნო რეფორმების დასრულება, მათ შორის ამომრჩეველთა ადეკვატური წარმომადგენლობის უზრუნველყოფა არჩევნების დღემდე დიდი ხნით ადრე;
- საპარლამენტო ზედამხედველობის გაუმჯობესება – განსაკუთრებით უსაფრთხოების სამსახურებზე. ასევე საკვანძო ინსტიტუტების – საარჩევნო ადმინისტრაციის, ეროვნული ბანკისა და კომუნიკაციების მარეგულირებელი კომისიის ინსტიტუციური დამოუკიდებლობისა და მიუკერძოებლობის უზრუნველყოფა;
- სასამართლო რეფორმის დასრულება და განხორციელება, მათ შორის იუსტიციის უმაღლესი საბჭოსა და პროკურატურის რეფორმა, ვენეციის კომისიის რეკომენდაციების სრულად შესრულება;
- ანტიკორუფციული ბიუროს, სპეციალური საგამოძიებო სამსახურისა და პერსონალურ მონაცემთა დაცვის სამსახურის ეფექტურობისა და ინსტიტუციური დამოუკიდებლობისა და მიუკერძოებლობის უზრუნველყოფა.
- დეოლიგარქიზაციის შესახებ არსებული სამოქმედო გეგმის გაუმჯობესება, რათა დეოლიგარქიზაცია განხორციელდეს მრავალსექტორული, სისტემური მიდგომით, ვენეციის კომისიის რეკომენდაციების შესაბამისად, ოპოზიციური პარტიებისა და სამოქალაქო საზოგადოების ჩართულობით;
- ადამიანის უფლებების დაცვის სტანდარტების გაუმჯობესება, მათ შორის, ადამიანის უფლებების ამბიციური სტრატეგიის მიღებითა და შეკრებისა და გამოხატვის თავისუფლების უზრუნველყოფით. მოწყვლადი ჯგუფების, მედიაპროფესიონალებისა და სამოქალაქო აქტივისტების მიმართ მუქარის ფაქტებზე მიუკერძოებელი, ეფექტური და დროული გამოძიების დაწყება და ძალადობის ორგანიზატორებისა და დამნაშავეების პასუხისგებაში მიცემა. სამოქალაქო საზოგადოებასთან კონსულტაციების გამართვა, მათი ჩართულობის უზრუნველყოფა კანონშემოქმედებით და პოლიტიკის შემუშავების პროცესში და მათი თავისუფლად მუშაობის უზრუნველყოფა.
რა წერია ევროკომისიის დასკვნაში
დღესვე გასაჯაროვდა ევროკომისიის სამუშაო დოკუმენტი, სადაც მიმოხილულია საქართველოს პოლიტიკური მდგომარეობა, სასამართლო სისტემა, ადამიანის უფლებები და სხვა მნიშვნელოვანი საკითხები.
ანგარიშში წერია, რომ საქართველოში არსებული საკანონმდებლო ბაზა, ინსტიტუციური წყობა და აქტიური სამოქალაქო საზოგადოება იმის მანიშნებელია, რომ ქვეყანას აქვს მზაობა შემდგომი დემოკრატიული და კანონის უზენაესობის რეფორმებისთვის. თუმცა, ქვეყანაში არსებული ღრმა პოლიტიკური პოლარიზაცია ამ რეფორმებს აფერხებს.
ანგარიშში აღნიშნულია, რომ პოლიტიკურ პარტიებს შორის კონსტრუქციული ჩართულობის მიღწევა ეროვნული ინტერესების ძირითად საკითხებზეც ვერ ხერხდება.
პრობლემად არის მიჩნეული ის ფაქტი, რომ პარლამენტში ვერ ხერხდება კანონშემოქმედებით საქმიანობაში მრავალპარტიული მუშაობა – მმართველი პარტიის მიერ ოპოზიცია შეზღუდულადაა ჩართული სამუშაო პროცესში და ასევე თავის მხრივ ოპოზიციის ნაწილი პერიოდულად ბოიკოტის რეჟიმშია.
სამუშაო დოკუმენტში მიმოხილულია საქართველოს სასამართლო სისტემა. ყველაზე დიდ პრობლემად დასახელებულია ის, რომ ვერ მოხერხდა იუსტიციის უმაღლესი საბჭოს რეფორმირება.
რაც შეეხება კორუფციის წინააღმდეგ ბრძოლა, ევროკომისია წერს, რომ საქართველომ ამ მიმართულებით გარკვეულ პროგრესს მიაღწია. ასევე აღნიშნულია, რომ საჭიროა შემდგომი ნაბიჯები დეოლიგარქიზაციის სამოქმედო გეგმის შემდგომი დასრულებისთვისა და მისი განხორციელების დასაწყებად.
დასკვნაში წერია, რომ ფუნდამენტურ უფლებებთან დაკავშირებით, საქართველომ მოახდინა ადამიანის უფლებათა საერთაშორისო კონვენციებისა და დოკუმენტების უმეტესობის რატიფიცირება და, მთლიანობაში, ასრულებს ადამიანის უფლებათა საერთაშორისო კანონმდებლობით ნაკისრ ვალდებულებებს.
დასკვნაში საუბარია მედია გარემოზეც, რომელიც შეფასებულია, როგორც “ძირითადად პლურალისტურია, მაგრამ ასევე ძალზე პოლარიზებული”.
“ბიზნესისა და პოლიტიკური ინტერესების გადაკვეთა კვლავ აფერხებდა მედიის დამოუკიდებლობას. ადგილი ჰქონდა დაშინებებს, ასევე მედიის წარმომადგენლებზე ფიზიკური და სიტყვიერ თავდასხმებს, წინასაარჩევნო მიტინგებისა და დემონსტრაციების კონტექსტში. შემდგომი გამოძიებები ჯერჯერობით არაეფექტურია. მედიის მიმართ მძაფრი განცხადებები ასევე ხელისუფლების მაღალი რანგის წარმომადგენლებისგან მოდის. სასამართლო პროცესები და გამოძიება ოპოზიციური მედიის მფლობელების წინააღმდეგ გახშირდა. ბოლო განაჩენები მედიის კრიტიკულ გაშუქებაზე უარყოფითად მოქმედებს”, – ვკითხულობთ დოკუმენტში.
დოკუმენტში საუბარია, რომ საქართველოში კვლავ არსებობს პრობლემები შეკრების თავისუფლებასთან დაკავშირებით და მოყვანილია 2023 წლის 8 ივლისის მაგალითი, როდესაც ულტრა-მემარჯვენე რადიკალები Tbilisi Pride-ის მონაწილეებს დაესხნენ თავს.
რა უთხრეს უკრაინას და მოლდოვას
უკრაინა და მოლდოვა, რომლებმაც სტატუსი ჯერ კიდევ 17 თვის წინ მიიღეს, 2022 წლის ივნისში, დღეს ევროკავშირთან დაახლოების უკვე შემდგომ ეტაპზე გადავიდნენ ანუ საქართველოს ერთი ნაბიჯით უსწრებენ. ორივე ქვეყანა უკვე ევროკავშირის წევრობაზე მოლაპარაკებების ეტაპზე იმყოფება, თუმცა, აქაც დათქმებით.
ფონ დერ ლაიენის თქმით, უკრაინის გაწევრიანებაზე მოლაპარაკებები მაშინვე დაიწყება, როგორც კი კიევი შეასრულებს დამატებით პირობებს – პირველი ორი პირობა კორუფციის წინააღმდეგ ბრძოლას ეხება, მესამე – ლობისტური საქმიანობის ევროპულ სტანდარტებთან შესაბამისობაში მოყვანას და მეოთხე – ეროვნულ უმცირესობათა უფლებების დაცვას.
ევროკომისიის პრეზიდენტმა ურსულა ფონ დერ ლაიენმა შეაქო კიევი ბრიუსელის მიერ 2022 წლის ივნისში დადგენილ შვიდი რეფორმიდან „90%-ზე მეტის“ დაკმაყოფილებისთვის.
მოლდოვის სამი პირობა წაუყენეს – ესენია უზენაეს სასამართლოსა და პროკურატურის რეფორმირება, კორუფციასთან ბრძოლა და დეოლიგარქიზაცია.
ეს დავალებები უკრაინამ და მოლდოვამ 2024 წლის მარტამდე უნდა შეასრულონ. მარტში ევროკომისიას ახალი ანგარიში ექნება.
ხელისუფლების რეაქცია: “ეს “ქართული ოცნების” 11 წლიანი მმართველობის დამსახურებაა”
საქართველოს პრემიერ-მინისტრმა, ირაკლი ღარიბაშვილმა ბრიფინგი გამართა ევროკომისიის დასკვნის გამოცხადების შემდეგ. მათ თქვა, რომ ეს “ქართული ოცნების” მოღვაწეობის დამსახურებული შედეგია:
“დღევანდელი დღე არის ერთგვარი დამაგვირგვინებელი და შემაჯამებელი ჩვენი 11 წლიანი საქმიანობისა, რომელმაც მოიტანა მშვიდობა, სტაბილურობა, ის დიდი ტრანსფორმაცია და ცვლილება, ევროპეიზაციის 10 წელი, შეიძლება ასე ვუწოდოთ ამ მშვიდობიან, 10 წლიან პერიოდს. თუ ვინმემ, რომელიმე ხელისუფალმა და მმართველმა რამე გააკეთა ხელშესახები ევროინტეგრაციის გზაზე, ეს არის ქართული ოცნება,“ – თქვა ირაკლი ღარიბაშვილმა.
მან ამ გამოსვლისას ახსენა “ქართული ოცნების” დამფუძნებელი, ბიძინა ივანიშვილიც. ღარიბაშვილის შეფასებით ქვეყნის წინსვლა შეუძლებელი იქნებოდა “რომ არ მოეხდინა ისტორიული, გარდამტეხი ცვლილება ბიძინა ივანიშვილს და მის გუნდს, რომელიც აგრძელებს, ვაგრძელებთ ამ დიდ საქმეს.”
ღარიბაშვილმა დიდხანს ისაუბრა ოპოზიციაზე და თქვა, რომ “ოპოზიციას არაფერი გაუკეთებია ევროინტეგრაციისთვის”.
„თუ ვინმემ, რომელიმე ხელისუფალმა, მმართველმა, რაიმე ხელშესახები გააკეთა, ეს არის „ქართული ოცნების“ ხელისუფლება…” – აღნიშნა ღარიბაშვილმა.
ასევე, მან თქვა, რომ ანგარიშში ერთმნიშვნელოვნად და მკაფიოდ წერია, რომ რეკომენდაცია ეფუძნება მიღწეულ შედეგს და არა ხალხის ნების გამოხატულებას, როგორც ამის წარმოჩენას ოპოზიცია ცდილობს.
“მე მინდა გითხრათ, რომ ანგარიშში ერთმნიშვნელოვნად და მკაფიოდ წერია, რომ ეს რეკომენდაცია ეფუძნება მიღწეულ შედეგს. შედეგი ბუნებრივია დადო ხელისუფლებამ, მთავრობამ ანუ იმ ხელისუფლებამ, რომელიც არის არჩეული ქართველი ხალხის ამომრჩევლის მიერ. ასე რომ, ეს ყველა სპეკულაცია, რომ ეს ყველაფერი ხალხის ნების გამოხატულების გამო მიღებული გადაწყვეტილებაა, რა თქმა უნდა ძალიან გადაჭარბებული და მცდარია“, – განაცხადა პრემიერმა.
ევროკომისიის დასკვნას X-ზე გამოეხმაურა საქართველოს პრეზიდენტი სალომე ზურაბიშვილი:
“ქართველ ხალხთან ერთად მიხარია და მივესალმები ევროკომისიის პოზიტიურ რეკომენდაციას საქართველოსთვის კანდიდატის სტატუსის მინიჭების შესახებ. როგორც პრეზიდენტი, უფრო მეტად, ვიდრე ოდესმე გავაგრძელებ ჩემი როლის შესრულებას, როგორც პროევროპელი ლიდერი, რათა ხელი შევუწყო და გავაგრძელო ჯერ კიდევ საჭირო რეფორმები.” – წერს საქართველოს პრეზიდენტი.
I rejoice with the people of Georgia and welcome the positive recommendation of the EU Commission to grant ?? the Candidate status. As President, I will continue more than ever to play my role as a pro European leader to facilitate and push the still needed reforms.
— Salome Zourabichvili (@Zourabichvili_S) November 8, 2023
მმართველი პარტიის თავმჯდომარემ, ირაკლი კობახიძემ აღნიშნა, რომ 20 თვეზე მეტი გავიდა მას შემდეგ, რაც საქართველომ კანდიდატის სტატუსის მისაღებად განაცხადი შეიტანა და “ამ 20 თვის განმავლობაში, ქვეყანამ მრავალი სირთულე გამოიარა – სტატუსის მიღების საბოტაჟით დაწყებული, რევოლუციის მცდელობით დამთავრებული. დარწმუნებული ვარ, ევროპული საბჭოს 15 დეკემბრის საბოლოო გადაწყვეტილება საქართველოში პოლიტიკური პროცესების დერადიკალიზაციას შეუწყობს ხელს”.
ოპოზიციის რეაქცია
ოპოზიციონერი ლიდერების უმრავლესობა თანხმდება, რომ სტატუსთან დაკავშირებით დადებითი გადაწყვეტილება ქართველი ხალხის მონაპოვარია და ქვეყანამ ეს სტატუსი ხელისუფლების მცდელობების მიუხედავად და არა დამსახურებით მიიღო.
პარტია “ლელოს” ლიდერის, ბადრი ჯაფარიძის შეფასებით, ევროკავშირის კანდიდატის სტატუსის მინიჭებაზე დადებითი რეკომენდაცია ქართველმა ხალხმა დაიმსახურა.
ის აცხადებს, რომ “ქართული ოცნება” და რუსეთის ხელისუფლება ამ პროცესის საბოტაჟს ცდილობდნენ.
საქართველოს მესამე პრეზიდენტი, ამჟამად პატიმრობაში მყოფი მიხეილ სააკაშვილი წერს ფეისბუკზე, რომ “საქართველოსთვის კანდიდატის სტატუსის მინიჭება მნიშვნელოვანი ისტორიული მოვლენაა და ყველა ქართველს მისალოცად აქვს საქმე”. ხელისუფლების დამსახურება იმაშია, რომ ხალხის ზეწოლის ქვეშ შეიტანა განაცხადი და კიდევ კარგი უკან არ გაიტანა, აღნიშნავს სააკაშვილი.
“ჩვენ მთავარი ბრძოლა არის წინ – ოლიგარქის ხელისუფლების მოშორება და ეს ჩვენი გასაკეთებელია. სწორედ ამ ხელისუფლების მოშორება გაგვიხსნის გზას ევროკავშირის წევრობისკენ”, – წერს სააკაშვილი.
“მინდა მივუსამძიმრო “ქართულ ოცნებას” ევროკომისიის ეს გადაწყვეტილება. მიუხედავად მათი ყველა მცდელობისა, მათ მიერ განხორციელებული საბოტაჟისა, მიუხედავად იმისა, რომ მათ არ შეასრულეს რეკომენდაციების დიდი ნაწილი, ევროკომისიამ მაინც მიიღო გადაწყვეტილება ქვეყნისთვის ევროკავშირის კანდიდატის წევრობის სტატუსის მინიჭების შესახებ”, — განაცხადა ბადრი ჯაფარიძემ.
“ქართველმა ხალხმა პირველი რაუნდი მოუგო რუსულ ოცნებას, რუს ოლიგარქ ბიძინა ივანიშვილს. მიუხედავად მათი საბოტაჟისა, ქართველი ხალხის ურყევმა ნებამ და ევროპის სურვილმა, რომ საქართველო არ გახდეს რუსეთის გუბერნია, პირველ რაუნდში გაიმარჯვა”, – აცხადებს „ერთიანი ნაციონალური მოძრაობის“ თავმჯდომარე, ლევან ხაბეიშვილი.
განსხვავებული პოზიცია აქვს “ევროპული საქართველოს” ლიდერს, გიგა ბოკერიას. ის მიიჩნევს, რომ ქვეყნის და საზოგადოების ამოცანებისათვის დღევანდელი გადაწყვეტილებით არაფერი იცვლება და სტატუსზე “ზარ-ზეიმი” თავის მოტყუებაა.
მისი თქმით, “ევროკავშირის წევრობის კანდიდატის სტატუსის საბოლოოდ მიღების შემთხვევაშიც კი, ივანიშვილის რეჟიმის პირობებში ჩვენ, რეალურად კი არ ვუახლოვდებით, არამედ ვშორდებით ევროპას, დასავლეთს”.
მისი თქმით, ის ოპოზიციური პარტიები, პირველ რიგში, „ნაციონალური მოძრაობა“ და „ლელო“, ასევე სამოქალაქო ორგანიზაციების ლიდერები, რომლებიც “ზარ-ზეიმით ელოდებიან ევროკომისიის გადაწყვეტილებას”, “თავს იტყუებენ ან თვალთმაქცობენ და მოქალაქეებს ატყუებენ“.
„არცერთი მოქალაქე არ უნდა მოტყუვდეს, რომ კანდიდატის სტატუსის გამო ვითარება ნაკლებ საგანგაშოა, ვიდრე აქამდე იყო. ივანიშვილის რეჟიმის გადარჩევამდე დასავლეთისგან სრული იზოლაციის საფრთხე, მხოლოდ გაიზრდება და ამას დღეს მიღებული გადაწყვეტილება, სამწუხაროდ, ვერ შეცვლის”, – აღნიშნავს ბოკერია.
