ევროკავშირის ელჩი საქართველოში პაველ ჰერჩინსკი მმართველი პარტიის მიერ რუსული კანონის ხელახლა ინიციირებასთან დაკავშირებით შეშფოთებას გამოთქვამს და აცხადებს, რომ ეს შეუთავსებელია ევროკავშირის ღირებულებებთან. მისივე თქმით, ეს კანონი არ არის კარგი და ხაზგასმით აღნიშნა, რომ ის არც ევროპულია და არც ამერიკული.
ჰერჩინსკიმ ასევე განაცხადა, რომ მედიის თავისუფლება განსაკუთრებით მნიშვნელოვანია ევროკავშირის კანდიდატი ქვეყნისათვის. ელჩი მიიჩნევს, რომ გამჭვირვალობის საბაბით არ უნდა მოხდეს სამოქალაქო საზოგადოების სტიგმატიზება.
რა თქვა პაველ ჰერჩინსკიმ
“სამწუხაროდ, უნდა ვაღიარო, რომ არსებობს რამდენიმე ღია საკითხი, რომელიც საჭიროებს შემდგომ დისკუსიას და საჭიროებს, რომ უკეთ იყოს გაგებული ევროკავშირსა და საქართველოს ხელისუფლებას შორის. ასევე, არსებობს კიდევ ერთი საკითხი – ბოლო დროს ინიციირებული კანონპროექტი უცხოური გავლენის შესახებ, რომელიც ჩვენი გადმოსახედიდან შეუთავსებელია ევროკავშირის ღირებულებებსა და სტანდარტებთან. ჯოზეფ ბორელმა ძალიან მკაფიოდ განმარტა განცხადებაში, რომელიც გამოქვეყნდა ამ კანონპროექტის ხელახლა ინიციირებიდან 24 საათის შემდეგ.
ჩვენ სერიოზულად გვაშფოთებს, არსებობს ლეგიტიმური შეშფოთება, რომ გამჭვირვალობა არ უნდა იყოს საბაბი, რომ შემცირდეს სივრცე და სამოქალაქო საზოგადოების სტიგმატიზება მოხდეს, სიტყვისა და მედიის თავისუფლება არსებითად მნიშვნელოვანია ყველა დემოკრატიისათვის, საქართველოს ჩათვლით. განსაკუთრებით, როგორც ევროკავშირის კანდიდატი ქვეყნისთვის.
მარტივად – ეს კანონი არ არის კარგი. ეს არ არის ევროპული კანონი, ეს არ არის ამერიკული კანონი, როგორც მოვისმინეთ მკაფიოდ და ხმამაღლა ამერიკის ელჩისგან გუშინ.
მესმის, რომ არსებობს შეშფოთება გამჭვირვალობის თაობაზე. ისიც მესმის, რომ არსებობს სხვა გზები გამჭვირვალობის უზრუნველსაყოფად. ჩვენ ყველა მხარეს ვეძებთ გამჭვირვალობას, მაგრამ ეს არ უნდა გაკეთდეს სამოქალაქო საზოგადოების შესაძლებლობების შეზღუდვის ხარჯზე. ისინი ძალიან მნიშვნელოვან, ძალიან კარგ საქმეს აკეთებენ საქართველოს მოსახლეობის სასარგებლოდ.
კვირას ვნახეთ უცხოური გავლენის შესახებ კანონპროექტის დაბრუნება. ერთი წლის წინ ის უპირობოდ გაიწვიეს. ევროკავშირმა სწრაფი რეაგირება მოახდინა, უმაღლესმა წარმომადგენელმა გამოხატა ჩვენი სერიოზული შეშფოთება ამ კანონპროექტის მიმართ მეორე დღესვე. ჩვენ, 27-ვე ქვეყნის ელჩები შევხვდით პრეზიდენტს, პრემიერმინისტრს, ყველა პოლიტიკური პარტიის წარმომადგენელსა და სამოქალაქო საზოგადოებას.
ყველამ გამოვთქვით შეშფოთება. სამოქალაქო საზოგადოებისთვის გარემოს შექმნა და შენარჩუნება, ასევე მედიის თავისუფლების უზრუნველყოფა ყველა დემოკრატიის საფუძველია. ის გადამწყვეტია ევროკავშირში გასაწევრიანებლად, მაგრამ გადაწყვეტილება თქვენ უნდა მიიღოთ.
კარი ღიაა, მაგრამ ამ კარში თქვენ უნდა გაიაროთ – ამის დრო ახლაა და ეს დროც იწურება, რადგან სხვები წინ მიდიან და გულით გირჩევთ, არ დაკარგოთ დრო. საქართველო არის კანდიდატი ქვეყანა, კარი ღიაა და გელოდებით. გთხოვთ, გამოიყენეთ ეს შესაძლებლობა.” – თქვა ჰერჩინსკიმ.
● 3 აპრილს ცნობილი გახდა, რომ არასამთავრობო ორგანიზაციების “ფინანსების გამჭვირვალობაზე” მმართველი პარტია რუსულ კანონს ხელახლა აინიციირებს. ამის შესახებ “ქართული ოცნების” ფრაქციის თავმჯდომარემ, მამუკა მდინარაძემ სპეციალურ ბრიფინგზე განაცხადა.
● ხელისუფლების მთავარი არგუმენტი მდგომარეობს იმაში, რომ საქართველოში მოქმედი არასამთავრობო ორგანიზაციების გამჭვირვალობა კითხვის ნიშნის ქვეშ დგას, რაც საფრთხეს უქმნის ქვეყნის უსაფრთხოებას. თუმცა, ამ არგუმენტის არც დამოუკიდებელ ექსპერტებს, არც ოპოზიციას და არც სამოქალაქო საზოგადოებას არ სჯერა. ექსპერტები აღნიშნავენ, რომ ამგვარად “ქართული ოცნება” ხელისუფლებაში ყოფნის გახანგრძლივებას ცდილობს და ნიადაგს იმზადებს 2024 წლის ოქტომბრის საპარლამენტო არჩევნებისთვის, რათა ალტერნატიული აზრი ქვეყანაში ჩაახშოს.
● ერთხელ ე.წ. უცხოელი აგენტების შესახებ კანონი საქართველოს მმართველმა პარტიამ უკვე დააინიციირა ზუსტად ერთი წლის წინ – გასული წლის მარტში. მაშინ კანონი პირველი მოსმენით პარლამენტში მიიღეს კიდეც, თუმცა “ოცნება” იძულებული გახდა კანონი გაეწვია, რადგან თბილისი მრავალათასიანმა პროტესტმა მოიცვა. ათასობით ადამიანი რამდენიმე დღის განმავლობაში აპროტესტებდა აღნიშნული კანონის მიღებას, რომელსაც საქართველოში “რუსული კანონი” უწოდეს, რადგან იგი რუსეთში მიღებული კანონის ანალოგია.
