ჟენევის მოლაპარაკებების 58-ე რაუნდი - მხარეთა შეფასებები

ჟენევის მოლაპარაკებები

ჟენევის საერთაშორისო მოლაპარაკებების 58-ე რაუნდს საქართველოს საგარეო საქმეთა სამინისტრო ოფიციალური განცხადებით ეხმაურება. უწყების ცნობით, მოლაპარაკებების ფარგლებში ქართულმა დელეგაციამ ძირითადი აქცენტი გააკეთა ჟენევის საერთაშორისო მოლაპარაკებების დღის წესრიგის მთავარ საკითხებზე: რუსეთის მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმებით ნაკისრი საერთაშორისო ვალდებულებების სრულად შესრულების აუცილებლობა და ოკუპირებული ტერიტორიებიდან იძულებით გადაადგილებული პირებისა და ლტოლვილების საკუთარ სახლში უსაფრთხო და ღირსეული დაბრუნება.  

სამინისტროს განცხადებით, რუსეთისა და მისი საოკუპაციო რეჟიმების წარმომადგენლების დესტრუქციული პოზიციის გამო, დისკუსია კვლავ  ვერ შედგა მოლაპარაკებების დღის წესრიგის ერთ-ერთ უმთავრეს საკითხზე – ოკუპირებული ტერიტორიებიდან ეთნიკური წმენდის შედეგად გამოდევნილი იძულებით გადაადგილებული პირებისა და ლტოლვილების საკუთარ სახლებში უსაფრთხო და ღირსეულ დაბრუნებაზე.

საკითხის განხილვის დაწყებისთანავე მონაწილეებმა მოსკოვიდან, სოხუმიდან და ცხინვალიდან მოლაპარაკებები დატოვეს.

“ქართულმა დელეგაციამ ასევე დააყენა ის მწვავე უსაფრთხოებისა და ჰუმანიტარული პრობლემები, რომლებიც რუსეთის ოკუპაციიდან მომდინარეობს, როგორიცაა უკანონო სამხედრო წვრთნები, საოკუპაციო ხაზზე მავთულხლართებისა და სხვა ხელოვნური ბარიერების აღმართვა, უკანონო დაკავებები და გატაცებები, ადამიანის უფლებების დარღვევები და ქართველთა ეთნიკური დისკრიმინაცია. ხაზი გაესვა მათი გადაჭრის აუცილებლობას”. – ნათქვამია სამინისტროს განცხადებაში.

რუსეთის საგარეო საქმეთა სამინისტროს განცხადება

“ამგვარი დოკუმენტის აქტუალობა განსაკუთრებით იზრდება ამიერკავკასიაში აშშ-სა და NATO-ს სამხედრო საწვრთნელი აქტივობებისა და ჩრდილო-ატლანტიკური ხელშეკრულების ორგანიზაციაში საქართველოს გაწევრიანების სურვილის ფონზე”. – ნათქვამია რუსეთის საგარეო უწყების განცხადებაში.

სოხუმის საგარეო საქმეთა სამინისტროს განცხადება

აფხაზეთის დე ფაქტო საგარეო უწყება განცხადებაში ხაზს ძალის გამოუყენებლობის შეთანხმების მნიშვნელობას უსვამს და ქართულ დელეგაციას “არაკონსტრუქციულობაში” ადანაშაულებს.

“ქართველი მონაწილეები კვლავ აგრძელებენ ძალის გამოუყენებლობის შესახებ დოკუმენტის ტექსტზე შეთანხმების წინადადებების დაბლოკვას. ეს საკითხი ღიად რჩება და მისი განხილვა მომდევნო რაუნდისთვის გადაიდო.” – ვკითხულობთ განცხადებაში.

ცხინვალის საგარეო საქმეთა სამინისტროს განცხადება

ცხინვალის დე ფაქტო საგარეო საქმეთა სამინისტრომ ქართული მხარე “თბილისის ქუჩებში არსებული ისტერიის” მოლაპარაკებების პლატფორმაზე გადატანის მცდელობაში დაადანაშაულა.

“შეხვედრის ატმოსფეროზე უარყოფითად იმოქმედა საქართველოში მიმდინარე ანტირუსულმა კამპანიამ, რომელსაც თან ახლავს აგრესიული რიტორიკა სამხრეთ ოსეთისა და აფხაზეთის წინააღმდეგ. თუმცა, წარუმატებლად დასრულდა ქართული დელეგაციის მცდელობა, რომ თბილისის ქუჩებში არსებული ისტერია ჟენევის პლატფორმაზე გადაეტანათ”.  – ნათქვამია განცხადებაში.

● გაიმართა აბაშიძე კარასინის ონლაინ შეხვედრა. საქართველო 3+3 ფორმატში მონაწილეობას არ განიხილავს
● საგარეო საქმეთა სამინისტრო: მიუღებელია მოსკოვის განცხადებები საოკუპაციო ხაზის დელიმიტაციაზე
● ქართულ-აფხაზური არაფორმალური დიალოგის მონაწილეთა წინადადება

რა არის ჟენევის ფორმატი

● 2008 წლის აგვისტოს ომის შემდეგ საქართველოსა და რუსეთს შორის შეწყდა ყველანაირი პირდაპირი დიალოგი. 2008 წლის 12 აგვისტოს ცეცხლის შეწყვეტის შეთანხმების შესაბამისად მიღებულ იქნა გადაწყვეტილება, რომ შექმნილიყო ჟენევის საერთაშორისო მოლაპარაკებების ფორმატი, სადაც რუსეთი და საქართველო სოხუმისა და ცხინვალის წარმომადგენლებთან და ასევე საერთაშორისო ორგანიზაციების წარმომადგენლებთან ერთად, სხვადასხვა ჰუმანიტარულ საკითხზე იმსჯელებდა.

● წლების განმავლობაში, ვიდრე “ქართული ოცნება” ქართულ-რუსული მოლაპარაკებების აბაშიძე-კარასინის ფორმატს აამოქმედებდა, ჟენევა იყო ერთადერთი ადგილი, სადაც თბილისი და მოსკოვი საუბრობდნენ.

● ჟენევაში წელიწადში 4 რაუნდი ტარდება.

● კონფლიქტის პოლიტიკურ ასპექტებს ჟენევის ფორმატი არ ეხება. ანუ, აქ არ მსჯელობენ აფხაზეთისა და სამხრეთ ოსეთის სტატუსზე და სხვა პოლიტიკურ საკითხებზე.

● ჟენევის საერთაშორისო მოლაპარაკებები მიმდინარეობს ორ პარალელურ სამუშაო ჯგუფში:

პირველ ჯგუფში განიხილავენ უსაფრთხოების საკითხებს (მაგალითად, რუსეთსა და საქართველოს შორის ძალის გამოუყენებლობის შესახებ შეთანხმების მიღწევას, საქართველოს ოკუპირებულ რეგიონებში უსაფრთხოების საერთაშორისო მექანიზმების შექმნას);

ხოლო მეორე ჯგუფში საუბარია დევნილების მდგომარეობაზე და მათი დაბრუნების საკითხზე. ასევე ეს ჯგუფი იხილავს მნიშვნელოვან ჰუმანიტარულ საკითხებს, რომლებიც ოკუპირებულ ტერიტორიებზე მცხოვრებ ადამიანებს ეხება (მაგალითად, მშობლიურ ენაზე განათლების მიღება, კულტურული მემკვიდრეობის დაცვა, საოკუპაციო ხაზზე ადამიანების თავისუფალი გადაადგილება, ოკუპირებულ ტერიტორიაზე მცხოვრებ ადამიანთა ჯანმრთელობა, კრიმინალური შემთხვევები, ადამიანის უფლებები და სხვა).

● საქართველოსა და რუსეთის გარდა, ჟენევის მოლაპარაკებებში მონაწილეობას იღებენ აშშ-ს წარმომადგენლები და თანათავმჯდომარეები ეუთოს, ევროკავშირის და გაეროს მხრიდან. დისკუსიებში ასევე ჩართულნი არიან ცხინვალის და სოხუმის წარმომადგენლები.