კაია კალასი: EU-ის საბჭო ქართული დიპლომატიური პასპორტებისთვის უვიზო მიმოსვლის შეჩერებაზე შეთანხმდა
დიპლომატიური პასპორტებისთვის უვიზოს შეჩერება
ევროკავშირის საბჭო ქართული დიპლომატიური პასპორტებისთვის უვიზო მიმოსვლის შეჩერებაზე შეთანხმდა. ამის შესახებ ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში, კაია კალასმა ევროკავშირის საგარეო მინისტრების შეხვედრის დასრულების შემდეგ განაცხადა.
კაია კალასი ასევე ამბობს, რომ ევროკავშირის საგარეო მინისტრების დღევანდელ საბჭოზე განიხილეს ქართველი მაღალჩინოსნების სანქცირების საკითხიც.
რა თქვა კაია კალასმა
“საქართველოში სიტუაცია მოსახლეობისთვის პოზიტიური მიმართულებით ნამდვილად არ ვითარდება. ხდება ოპოზიციაზე წნეხი, მედიის თავისუფლების შეზღუდვა. ჩვენ შევკვეცეთ დაფინანსება და პოლიტიკური კონტაქტები საქართველოს ხელისუფლებასთან.
დღეს შევთანხმდით, რომ დიპლომატიური პასპორტის მფლობელებს შევუწყვიტოთ უვიზო რეჟიმი და წელსვე იქნება საბჭოს მიერ გაკეთებული განცხადება ამასთან დაკავშირებით. ასევე განვიხილეთ, სანქციები შემოვიღოთ ხელისუფლების იმ წარმომადგენლების წინააღმდეგ, რომლებიც მშვიდობიანი პროტესტანტების წინააღმდეგ მოქმედებენ.
ჩვენ გავაგრძელებთ საქართველოს მოსახლეობის გვერდით დგომას, გადავამისამართებთ დახმარებას, რომელსაც ვუწევდით ხელისუფლებას და გადავცემთ ამ დახმარებას სამოქალაქო საზოგადოებას, დამოუკიდებელ მედიას
როგორც სირიაში, სირიელებმა უნდა გადაწყვიტონ, ისე საქართველოში – საქართველოს მოსახლეობამ უნდა გადაწყვიტოს, რა მომავალი ექნებათ მათ.” – თქვა მან.
მანამდე “რადიო თავისუფლებამ” გაავრცელა ინფორმაცია, რომ ევროკავშირის საბჭომ ევროკომისიას ოფიციალური წინადადების მომზადება დაავალა ქართული დიპლომატიური პასპორტებისთვის უვიზო მიმოსვლის გაუქმების შესახებ.
მათივე ცნობით, ევროკავშირის საბჭოში ამას მხარი დაუჭირა კვალიფიციურმა უმრავლესობამ, ევროკომისიამ კი უკვე დაიწყო საკითხზე მუშაობა და შესაბამის დოკუმენტს უახლოეს დღეებში მოამზადებს.
ევროკავშირის საგარეო საქმეთა მინისტრების დღევანდელ სხდომაზე ევროკავშირის წევრი სახელმწიფოების მინიმუმ 55%, რომლებიც წარმოადგენენ მოსახლეობის მინიმუმ 65%-ს, მხარი დაუჭირა ქართული დიპლომატიური პასპორტებისთვის უვიზო მიმოსვლის პროცედურის წამოწყებას.
გამოცემა Politico-ს თანახმად, აღნიშნულ გადაწყვეტილებას ლობირებდა ევროკავშირის უმაღლესი წარმომადგენელი საგარეო და უსაფრთხოების საკითხებში, კაია კალასიც, რომელიც ევროკავშირის საგარეო ურთიერთობათა საბჭოს თავმჯდომარეცაა.
თუმცა ამის წინააღმდეგი არიან უნგრეთი და სლოვაკეთი.
15 დეკემბერს ესტონეთმა “ქართული ოცნების” რეჟიმის დამატებით 14 პირს დაუწესა სანქციები. ესტონეთის საგარეო საქმეთა მინისტრის თქმით, სანქცირებულთა შორის არის პრემიერმინისტრი ირაკლი კობახიძე.
ასევე, ლიეტუვამ კიდევ 17 ქართველ პოლიტიკოსს, მათ შორის პრემიერ-მინისტრ ირაკლი კობახიძეს სანქციები დაუწესა, – ამის შესახებ ლიეტუვის საგარეო საქმეთა მინისტრი, კიასტუსის ბუდრისი სოციალურ პლატფორმა X-ზე წერს.
„ლიეტუვა ქართველი ხალხის და მათი ევროპული ოცნების გვერდით დგას. ესტონეთთან კოორდინაციით, ჩვენ გავაფართოვეთ სანქცირებული ქართველი პოლიტიკოსების სია კიდევ 17 პირის დამატებით, მათ შორისაა პრემიერ-მინისტრი ირაკლი კობახიძე“, – წერს ლიეტუვის საგარეო საქმეთა მინისტრი.
5 დეკემბერს კი უკრაინის პრეზიდენტმა ვოლოდიმირ ზელენსკიმ “ქართული ოცნების” ხელისუფლებისთვის სანქციების დაწესების ბრძანებას ხელი მოაწერა. ამის შესახებ ვოლოდიმირ ზელენსკიმ ვიდეომიმართვაში ისაუბრა. ზელენსკის თქმით, სანქციები მიმართულია ხელისუფლების იმ ნაწილის მიმართ, რომელიც “საქართველოს პუტინს გადასცემს”.
