ცვლილება თავდაცვის კოდექსში: სტუდენტები, რომლებიც სრულად დისტანციურ რეჟიმში სწავლობენ, ჯარს ვერ გადაავადებენ

ცვლილება თავდაცვის კოდექსში

თავდაცვის კოდექსში მორიგი ცვლილებები იგეგმება, რომლის მიხედვით სტუდენტები, რომლებიც სრულად დისტანციურ რეჟიმში სწავლობენ, ჯარს ვერ გადაავადებენ. კანონპროექტის ინიციატორი საქართველოს მთავრობაა და მის დაჩქარებული წესით განხილვას მოითხოვს.

ცვლილებები, რომელიც სავალდებულო სამხედრო სამსახურის გადავადების წესების გამკაცრებას ეხება, ორ საკითხს გულისხმობს – სტუდენტებისთვის სამხედრო სავალდებულო სამსახურის გადავადებასა და ალტერნატიულ შრომით სამსახურს.

თავდაცვის ახალი კოდექსის შესახებ ვრცლად შეგიძლიათ წაიკითხოთ აქ.

რა იცვლება

● სტუდენტები, რომლებიც სრულად დისტანციურ რეჟიმში სწავლობენ, სამხედრო სამსახურის გადავადებას ვერ შეძლებენ. ცვლილებები ეხება მათაც, ვინც უცხო ქვეყნის უმაღლეს სასწავლებელში ჩააბარა, თუმცა გამგზავრების ვალდებულება არ აქვს და სწავლას დისტანციურ რეჟიმში ახორციელებს.

● კანონპროექტის ინიციატორები რეზერვის უმცროსი ოფიცრის ნებაყოფლობითი სამხედრო მომზადების პროგრამას ან სტუდენტების ნებაყოფლობითი სამხედრო მომზადების პროგრამას სთავაზობენ ან განსაზღვრული სამხედრო სამსახურის სახეებიდან ერთ-ერთის შერჩევის შესაძლებლობას.

● ვინც ვერ ისარგებლებს წვევამდელთა ეროვნულ სამხედრო სამსახურში გაწვევის გადავადების უფლებით სრულად დისტანციური სწავლების გამო, მისთვის კანონი დაადგენს წვევამდელთა ეროვნული სამხედრო სამსახურის გავლის მისაღები ფორმის შერჩევის შესაძლებლობას.

● რაც შეეხება არასამხედრო, ალტერნატიულ შრომით სამსახურს, ცვლილებების თანახმად, პირს უფლება აქვს ალტერნატიულ შრომით სამსახურში გაწვევაზე უარის თქმის შესახებ გადაწყვეტილება 15 კალენდარული დღის ვადაში გაასაჩივროს, თუმცა აღსანიშნავია ის, რომ გადაწყვეტილების გასაჩივრება არ აჩერებს მის მოქმედებას.

● არასამხედრო, ალტერნატიული შრომის შესახებ საქართველოს კანონის მიღების შემდეგ სასულიერო პირებს სამხედრო სავალდებულო სამსახურის გადავადება აღარ შეუძლიათ. სასულიერო პირებს მოუწევთ გაიარონ არასამხედრო, ალტერნატიული შრომითი სამსახური, რომელიც 12 თვე გაგრძელდება.

კანონპროექტის ინიციატორები ირწმუნებიან, რომ “ცვლილება უზრუნველყოფს არასამხედრო, ალტერნატიულ შრომით სამსახურის სრულფასოვან ფუნქციონირებას”.

● პრეზიდენტმა თავდაცვის ახალ კოდექსს ხელი მოაწერა. რა იცვლება?
● “განმტკიცდა გზა ევროატლანტიკური ინტეგრაციისკენ” – საქართველოს თავდაცვის მინისტრი ლოიდ ოსტინს შეხვდა
● კირბალში მომხდარის შემდეგ, ოპოზიცია მოუწოდებს მთავრობას, აამოქმედოს ოთხოზორია-ტატუნაშვილის სია

საქართველოს პრეზიდენტმა თავდაცვის ახალ კოდექსს ხელი 12 ნოემბერს მოაწერა. პრეზიდენტის მთავარმა მრჩეველმა სტრატეგიული დაგეგმვის საკითხებში, დავით თევზაძემ საგანგებო ბრიფინგზე განაცხადა, რომ ხარვეზების მიუხედავად, კანონი აწესრიგებს ერთ-ერთ მნიშვნელოვან პრობლემას. კერძოდ, ამიერიდან  სავალდებულო სამხედრო სამსახურს წვევამდელები მხოლოდ თავდაცვის ძალებში გაივლიან, რაც პრეზიდენტის მრჩევლის შეფასებით, “შეესაბამება სამხედრო სამსახურის არსს და ქვეყნის ინტერესს”. 

7-8 მარტს უცხოური გავლენის აგენტის კანონპროექტთან დაკავშირებული საპროტესტო აქციების შემდეგ, როდესაც მთავრობამ კანონის მიღება გადაიფიქრა, გადაიფიქრეს თავდაცვის კოდექსით გათვალისწინებული ერთ-ერთი აჟიოტაჟის გამომწვევი ცვლილებაც, რომლის მიხედვითაც სტუდენტის სტატუსი პირს სავალდებულო სამხედრო სამსახურის გადავადებაში აღარ დაეხმარებოდა და მათ შემთხვევითი პრინციპით გაიწვევდნენ.

ამის ნაცვლად, 23 წლამდე სტუდენტებს შეეძლებათ ნებაყოფლობით გაიარონ წვევამდელთა სამხედრო სამსახური ისე, რომ ვადა 4 წელზე, არდადეგებზე გადაანაწილონ, ან აკადემიური წელი აიღონ.

როგორც კანონპროექტის განმარტებით ბარათში წერია, სამხედრო მოსამსახურე სამინისტროსათვის სახელმწიფო ბიუჯეტიდან გამოყოფილი ასიგნებების ფარგლებში ისარგებლებს რკინიგზითა და მუნიციპალური ტრანსპორტით უფასო მგზავრობის უფლებით, ასევე სამხედრო მოსამსახურე გადაიხდის ელექტროენერგიის, ბუნებრივი გაზის, სასმელი წყლისა და დასუფთავების მომსახურების საფასურის 50%-ს, ხოლო დანარჩენი 50% ანაზღაურდება სახელმწიფო ბიუჯეტიდან, კერძოდ თავდაცვის სამინისტროსთვის გამოყოფილი ყოველწლიური ბიუჯეტიდან.

იგეგმება წვევამდელთათვის ანაზღაურების გაზრდაც, ასევე, ახალი კოდექსით, გაწვეულ პირებს სამუშაო ადგილი, დაწესებულების სამართლებრივი ფორმის მიუხედავად, შეუნარჩუნდებათ.