CNN: საქართველოში დემოკრატიის ნგრევის ფონზე, რუსეთი, ჩინეთი და ირანი ახალ შესაძლებლობას აწყდებიან
CNN-ის სტატია საქართველოზე
საქართველოში დემოკრატიის ნგრევის ფონზე, რუსეთი, ჩინეთი და ირანი ახალ შესაძლებლობას აწყდებიან – ამ სათაურით სტატიას გავლენიანი მედია CNN აქვეყნებს. სტატიის მიხედვით, დღეს საქართველოში დემოკრატია იშლება. ამის ფონზე კი ამერიკელი კონგრესმენები “მეგობარი აქტის” მიღებას ცდილობენ.
სტატიაში საუბარია ჩინეთის გაზრდილ გავლენაზე საქართველოში, ასევე ნახსენებია კობახიძის ჩასვლა ირანში და მისი დასწრება ებრაჰიმ რაისის დაკრძალვაზე, სადაც “ქართული ოცნების” პრემიერი ჰამასისა და ჰეზბოლას ლიდერებთან ერთად იმყოფებოდა
ამასთან, CNN Civic IDEA- ზე დაყრდნობით წერს, რომ ირანელი ბიზნესმენები საქართველოს სტრატეგიულ სატრანზიტო პუნქტად იყენებენ საერთაშორისო სანქციებისგან თავის დასაღწევად და თანხების ირანის ისლამურ რესპუბლიკაში დასაბრუნებლად.
სტატიაში ნათქვამია, რომ მიუხედავად “ოცნების” რუსეთთან ახლო კავშირებისა, ქართველი ხალხი მტკიცედ უჭერს მხარს დასავლეთთან ინტეგრაციას.
რა წერია სტატიაში
“დღეს დემოკრატია საქართველოში – პატარა, მაგრამ სტრატეგიულად მდებარე ქვეყანაში, რომლის მოსახლეობა 3.7 მილიონია – იშლება. კაპიტოლიუმის ბორცვზე, ორპარტიული ძალისხმევით, რესპუბლიკელები და დემოკრატები “მეგობარი აქტის” მიღებას ცდილობენ.
ქართულ ენაზე “MEGOBARI“ მეგობარს ნიშნავს და მისი სპონსორები ამბობენ, რომ მათი მიზანია საქართველოში დემოკრატიული პრაქტიკის, ადამიანის უფლებებისა და კანონის უზენაესობის გაძლიერება. ის დააწესებს სანქციებს, ვიზების აკრძალვას და აქტივების გაყინვას იმ თანამდებობის პირებისთვის, რომლებიც პასუხისმგებელნი არიან არჩევნების გაყალბებაში, კორუფციასა და პოლიტიკურ რეპრესიებში.
ბევრი ადამიანი საქართველოში ახლა ნიღბებს ატარებს იმისთვის, რათა თავიდან აიცილოს იდენტიფიცირება, რომლებსაც ჩინეთში წარმოებული სახის ამოცნობის კამერები აკეთებენ. “ქართული ოცნების“ წარმომადგენელმა CNN-ისთვის კომენტარი არ გააკეთა ჩინეთში წარმოებული კამერების მეთვალყურეობისთვის გამოყენების საკითხზე.
ჩინეთის გავლენა საქართველოშიც იზრდება. გასულ წელს მთავრობამ გააუქმა კონტრაქტი საქართველოს, აშშ-სა და ევროპის კონსორციუმთან, რომელიც შავ ზღვაზე ანაკლიის ღრმაწყლოვანი პორტის მშენებლობას ეხებოდა. სამაგიეროდ, მან კონტრაქტი ჩინეთის სახელმწიფოსთან დაკავშირებულ კომპანიებს მისცა, რომელთაგან ზოგიერთი აშშ-ის სანქციების ქვეშაა.
“ქართული ოცნება“ ასევე პოულობს მეგობრებს ირანში. გასული წლის მაისში, საქართველოს ახლად დანიშნული პრემიერმინისტრი ირაკლი კობახიძე თეირანში ჩაფრინდა ირანის პრეზიდენტის, ებრაჰიმ რაისის დაკრძალვაზე დასასწრებად და დაკრძალვის პროცესიაში ჰამასისა და ჰეზბოლას ლიდერებთან ერთად იდგა. ივლისში ის ირანში ახალი პრეზიდენტის ინაუგურაციაზე დაბრუნდა.
ირანსა და საქართველოს შორის ვაჭრობა სწრაფად ვითარდება, ძირითადად ირანული ნავთობისა და ნავთობპროდუქტების იმპორტის გამო. საქართველოში დაფუძნებული არასამთავრობო ორგანიზაციის, Civic IDEA-ს მიერ ჩატარებული გამოძიების თანახმად, “ქართული ოცნების მთავრობასა და ირანს შორის დიპლომატიური კავშირების გამყარების კვალდაკვალ, გამოჩნდა რამდენიმე საქართველოში რეგისტრირებული კომპანია, რომლებიც პირდაპირ კავშირში არიან ირანის თავდაცვის სამინისტროსთან და შეიარაღებული ძალების ლოჯისტიკის სააგენტოსთან“.
გამოძიებამ დაასკვნა, რომ “ირანელი ბიზნესმენები საქართველოს სტრატეგიულ სატრანზიტო პუნქტად იყენებენ საერთაშორისო სანქციებისგან თავის დასაღწევად და თანხების ირანის ისლამურ რესპუბლიკაში დასაბრუნებლად“.
საქართველოს ოდესღაც ძლიერი ურთიერთობა შეერთებულ შტატებთან იშლება. აშშ-ის ელჩი, რობინ დანიგანი, რომელიც ამჟამად ტოვებს თანამდებობას, გმობს იმას, რასაც ის მთავრობის “ანტიამერიკულ რიტორიკას“ უწოდებს. “რადიო თავისუფლებასთან” ინტერვიუში მან განაცხადა, რომ „ქართული ოცნების“ ლიდერებმა ტრამპის ადმინისტრაციას გაუგზავნეს პირადი წერილი, რომელიც “მუქარის შემცველი, შეურაცხმყოფელი, არასერიოზული იყო და ვაშინგტონში უკიდურესად უარყოფითად მიიღეს“.
მიუხედავად იმისა, რომ მათი მთავრობა რუსეთთან სულ უფრო მეტად იზიარებს თავის პოზიციას, ქართველი ხალხი მტკიცედ უჭერს მხარს დასავლეთთან ინტეგრაციას. საქართველოს კონსტიტუცია მოიცავს ევროკავშირთან და ნატოსთან სრული ინტეგრაციის მანდატს. თუმცა, 2024 წლის ნოემბერში, “ქართული ოცნების“ მთავრობამ, მიუხედავად იმისა, რომ ქართველი ხალხი დაჟინებით მოითხოვდა ევროკავშირში გაწევრიანებისკენ სწრაფვას, შეაჩერა ძალისხმევა. აშშ-ის სახელმწიფო დეპარტამენტმა საქართველო გააფრთხილა, რომ ეს გადაწყვეტილება საქართველოს “კრემლის წინაშე უფრო დაუცველს“ გახდიდა.
“მეგობარი აქტს“, რომლის მიზანია ჩინეთის, ირანისა და რუსეთის გავლენის წინააღმდეგ ბრძოლა საქართველოში, აშშ-ის წარმომადგენელთა პალატაში მხარს უჭერს სამხრეთ კაროლინის შტატის რესპუბლიკელი კონგრესმენი ჯო უილსონი, ხოლო სენატში – ნიუ ჰემფშირის შტატის დემოკრატი სენატორი ჯინ შაჰინი.
“ქართველმა ხალხმა ნათლად გამოხატა თავისი ევროატლანტიკური მისწრაფებები და აშშ-მ უნდა გააგრძელოს მათი მხარდაჭერა “ქართული ოცნების“ მცდელობების წინააღმდეგ, რომლებიც მიზნად ისახავს მათი დემოკრატიული ინსტიტუტების ეროზიას.
იმ დროს, როდესაც რუსეთი ცდილობს რეგიონის მასშტაბით დემოკრატიების ძირის გამოთხრას, ჩვენ არ შეგვიძლია ზურგი ვაქციოთ ძირითად პარტნიორს, რომელიც თავისუფალი და დემოკრატიული მომავლისკენ ისწრაფვის“. – თქვა შაჰინმა CNN-თან ინტერვიუში.
