CNN-ის ჟურნალისტმა ქრისტიან ამანპურმა ევროკომისიის პრეზიდენტ ურსულა ფონ დერ ლაიენს რუსეთის წინააღმდეგ დაწესებული სანქციების გვერდის ავლაზე ჰკითხა და ამის მაგალითად საქართველო დაასახელა, “ქართული ოცნების” თავმჯდომარე ირაკლი კობახიძე კი ლაიენის მიმართ ამანპურის შეკითხვას ტყუილს უწოდებს და ამბობს, რომ “ეს მიუთითებს სერიოზული ძალის არსებობაზე, რომელსაც აქვს ინტერესი, საქართველოს შეუქმნას პრობლემები”.
ქრისტიან ამანპურმა ლაიენს ჰკითხა: “უკვე რამდენიმე პაკეტი დაამტკიცეთ რუსეთის წინააღმდეგ, მიუხედავად ამისა, გვესმის და ალბათ თქვენც შეიტყობდით, რომ ბევრი აკრძალული საქონელი მაინც შედის რუსეთში შემოვლითი გზებით, მათ შორის, როგორც ბოლო ინფორმაცია გვეუბნება, საქართველოს გავლით. როგორ უნდა მოვახერხოთ, რომ სანქციების ქვეშ მყოფმა რუსეთმა ვეღარ მიიღოს ის, რაც სჭირდება”.
ამის პასუხად ევროკომისიის პრეზიდენტმა თქვა, რომ რუსეთისთვის დაწესებული სანქციების გვერდის ავლის მცდელობები მიუღებელია.
“დიახ, ჩვენ უკვე დავაწესეთ სანქციების 9 პაკეტი და ეს სანქციები გავლენას ახდენს რუსეთის ეკონომიკაზე, თუმცა ვხედავთ, რომ არის გვერდის ავლის მცდელობებიც, ჩვენ ამას, რა თქმა უნდა, ვერ შევეგუებით. ჩვენ უნდა დავიწყოთ იმ ადამიანების სიის შედგენა, რომლებიც ყიდულობენ ევროკავშირში საქონელს და ჩააქვთ ის რუსეთში, თუმცა სანქციების მეათე პაკეტის მიზანი იქნება ამ ხვრელების დახურვა, შემოვლითი გზების დაკეტვა და იმ ადამიანების სანქცირებულთა სიაში შეყვანა, რომლებიც ხელს უწყობენ სანქციებისთვის გვერდის ავლას. მეათე პაკეტი სწორედ ამას შეეხება”, – განაცხადა ფონ დერ ლაიენმა.
კობახიძის თქმით, ხელოვნური პრობლემების შექმნის მიზანი ესკალაცია და მეორე ფრონტია. როგორც “ქართული ოცნების” თავმჯდომარე განმარტავს, CNN-ის ჟურნალისტი, “ფეიკ სტატიაზე დაყრდნობით” უსვამს კითხვას ურსულა ფონ დერ ლაიენს “რასაც საფუძვლად უდევს ფაქტი”, რომ თითქოს საქართველო არის ერთ-ერთი მთავარი ხელშემწყობი იმისა, რომ რუსეთში შეედინება სანქცირებული პროდუქტები:
“არიან ადამიანები, არა ადამიანები, არამედ სერიოზული ძალები, რასაც ვუწოდებთ გლობალური ომის პარტიას, არ ვხსნით კარტებს ბოლომდე, ვიცით ზუსტად, რა იგულისხმება ამის უკან და არ ვამბობთ. ვიცით გლობალური ომის პარტია, რომელსაც აქვს ინტერესი საქართველო ჩართოს ომში და ამას ცდილობენ სხვადასხვა ფორმით და მეთოდით.“
15 იანვარს The New York Times–მა რუსეთში იმპორტირებული საქონლის შესახებ სტატია გამოაქვეყნა, რომლის ავტორი ივან ნეჩეპურენკოა. ავტორიტეტული ამერიკული გამოცემა წერს, რომ მას შემდეგ, რაც უკრაინაში რუსეთი შეიჭრა და ევროპამ ოკუპანტ ქვეყანასთან სანქციების გამო სავაჭრო კავშირები გაწყვიტა, რუსეთმა მალევე იპოვა ალტერნატიული გზები. ავტორი აღნიშნავს, რომ ყოველდღე საქართველოში რუსეთის საზღვართან სატვირთო მანქანების რიგები დგას.
როგორც ავტორი განმარტავს საქართველო რუსეთსა და გარე სამყაროს შორის მოსახერხებელ ლოგისტიკურ არხად იქცა. ამასთან, ჟურნალისტი საუბრობს, რომ საქონლის შეძენა საქართველოსა და მეზობელი ქვეყნების (სომხეთი და აზერბაიჯანი) გავლით, რუსეთს დაეხმარა, უკრაინაში შეჭრით გამოწვეული ეკონომიკური შტორმი გადაეტანა.
სტატიაში აღნიშნულია ისიც, რომ საქართველოს თურქეთამდე ყველაზე სწრაფი სახმელეთო მარშრუტი აქვს, რაც რუსეთისთვის დასავლეთთან ერთ-ერთ მთავარ სავაჭრო კავშირად იქცა.
IDFI-ს მონაცემებით, უკრაინაში რუსეთის შეჭრის დღიდან 31 აგვისტომდე საქართველოს კომერციულ ბანკებში ახალი ანგარიშები გახსნა რუსეთის 45 349-მა მოქალაქემ. როგორც ორგანიზაციაში განმარტავენ, ამ რაოდენობით ანგარიშების გახსნა მიუთითებს, რომ ეს რუსეთის მოქალაქეთა მიგრაციაა და არა უბრალოდ ტურისტულად მოგზაურობა საქართველოში. მონაცემები არასამთავრობო ორგანიზაციამ ეროვნული ბანკისგან გამოითხოვა.
