ჩრდილოეთ ოსეთს რევოლუციური შემოდგომა არ ემუქრება
ჩრდილოეთ ოსეთ-ალანიაში ვარაუდობენ, რომ სახელმწიფო დუმის არჩევნების შემდეგ ისედაც ნაკლებად აქტიური ადგილობრივი პოლიტიკური ცხოვრება საბოლოოდ ჩაკვდება.
რესპუბლიკაში შერეული, მაჟორიტარულ-პროპორციული საარჩევნო სისტემა მოქმედებს. პარტიულ ნაწილში ყველაფერი პროგნოზირებადია – აშკარაა, რომ ამ მხრივ, ალანიაში ჩატარებული არჩევნები საერთორუსული არჩევნების ანარეკლი იქნება. სახელისუფლებო პარტია “ედინაია ოსეტიას” აქ 11 პოლიტიკური პარტია უწევს კონკურენციას. ჩრდილოეთ ოსეთში ეროვნული პოლიტიკის გამტარებელი პარტიები არ არსებობს.
ბევრად უფრო გაცხოველებულია მაჟორიტარების წინასაარჩევნო დაპირისპირება. გაზეთ “სვობოდნი ვზგლიადის” (“თავისუფალი ხედვა”) რედაქტორის, ბადრი გაზათის თქმით, საქმე ისაა, რომ მაჟორიტარობის კანდიდატების მთავარ მიზანს, სახელმწიფო დუმის დეპუტატის მანდატზე მეტად, ჩრდილოეთი ოსეთის რესპუბლიკის მეთაურის ვაკანტური სავარძელი წარმოადგენს.
“ყველა კანდიდატს ეს მიზანი აქვს დასახული. ზოგი ცხადად გამოთქვამს ამ სურვილს, ზოგი კი – შეფარვით,” – ამბობს გაზათი.
სამი მოწინავე მაჟორიტარი
თავიდან სამი მაჟორიტარი იყო, მაგრამ ამჟამად წინასაარჩევნო მარათონის მხოლოდ ორ ლიდერზე ღირს საუბარი, რადგან მცირე ხნის წინ ცენტრალურმა საარჩევნო კომისიამ საბოლოოდ თქვა უარი ზემოაღნიშნული სამი კანდიდატიდან ყველაზე ოპოზიციურად განწყობილი პოლიტიკოსის, რესპუბლიკის აწ განსვენებული მეთაურის, თამერლან აგუზაროვის (თ. აგუზაროვი რესპუბლიკას 2015 წლის ივნისიდან 2016 წლის თებერვლამდე ხელმძღვანელობდა) ძმის, მურათ აგუზაროვის რეგისტრირებაზე.
მურათ აგუზაროვს ბრალად დასდეს წარმოდგენილი 16 ათასი ხელმოწერიდან 14 ათასის გაყალბება. ეს ეჭვი მოსკოვიდან მოწვეულმა გრაფოლოგებმაც დაადასტურეს.
მურათ აგუზაროვი“ეს სკანდალია, რადგან რესპუბლიკის მოსახლეობის მესამედი მაინც აპირებდა მისთვის ხმის მიცემას – ელექტორატის ის ნაწილი, რომელსაც არც ხელისუფლება მოსწონს, და არც ოპოზიცია,”- ამბობს ბადრი გაზათი.
იგი არ გამორიცხავს, რომ აგუზაროვის დისკვალიფიკაციას პოლიტიკური სარჩული ჰქონდეს.
“ადრე, ადმინისტრაციული რესურსისა და პასიური ამომრჩევლების წყალობით, ხელისუფლება ადვილად იგებდა ხოლმე არჩევნებს, მაგრამ ახლა სიტუაცია შეიცვალა. თამერლან აგუზაროვის გარდაცვალების შემდეგ რესპუბლიკას, ფაქტობრივად, არ ჰყავს მეთაური. ვიაჩესლავ ბითაროვი, რომელიც ამჟამად ჩრდილოეთი ოსეთის ხელმძღვანელის მოვალეობას ასრულებს, არ არის დამტკიცებული აღნიშნულ პოსტზე და, ამიტომაც, ადმინისტრაციულ რესურსს, უბრალოდ, ვერავინ გამოიყენებს,” – ამბობს გაზათი.
იქედან გამომდინარე , რომ მურათ აგუზაროვმა მაინც ვერ გადალახა ცენტრალური საარჩევნო კომისიის უარი, სახელმწიფო დუმის ადგილისთვის ბრძოლა დარჩენილ ორ ფავორიტს შორის გაიმართება. ორივე მათგანი ცნობილი მოჭიდავეა. არსენ ფაძაევი და არტურ თაიმაზოვი მრავალგზის ოლიმპიური და მსოფლიო ჩემპიონები არიან.
პირველს პოლიტიკური გამოცდილება აქვს. წარსულში მას სახელმწიფო დუმაშიც უმუშავია. მეორე პრეტენდენტი დებიუტანტია პოლიტიკაში, მაგრამ სამაგიეროდ ადგილობრივი ხელისუფლების მხარდაჭერით სარგებლობს.
ბადრი გაზათის თქმით, ამ გართულებულ სიტუაციას კიდევ უფრო ძაბავს ის ფაქტი, რომ ეს სამი ფავორიტი ოსი ხალხის სამ ძირითად სუბეთნოსს წარმოადგენს.
“ფაძაევი დიგორელია. ის წარმოშობით მუსლიმი ოსებით დასახლებულ სოფელ ჩიკოლადანაა. თაიმაზოვი კუდაროელია. იგი სამხრეთი ოსეთიდან, ქრისტიანებით დასახლებულ სოფელ ნოგირიდანაა. აგუზაროვი კი ირონია. ის ყველაზე მრავალრიცხოვანი ოსური სუბეთნოსის წარმომადგენელია.”
ჩრდილოეთ ოსეთს რევოლუციური შემოდგომა არ ემუქრება
თუმცა, სამ ფავორიტ მაჟორიტარს შორის არსებული კონკურენციის (მ.შ. ჩრდილოეთ ოსეთის რესპუბლიკის მეთაურის პოსტისთვის ბრძოლაში) მიუხედავად, ეს ყველაფერი მხოლოდ “ნახევრად ინტრიგაა”, რომელიც მოსკოვში წყდება.
თუკი რუსეთის პრესზიდენტი, ვლადიმირ პუტინი გადაწყვეტს, რომ რესპუბლიკის მეთაურის მოვალეობის შემსრულებელი, ვიაჩესლავ ბითაროვი კარგად ართმევს თავს დაკისრებულ მოვალეობას, 18 სექტემბერს ბითაროვს ჩრდილოეთი ოსეთის რესპუბლიკის მეთაურის პოსტზე წარადგენენ და ძალიან ძნელად გამოიძებნება ერთი მიზეზი მაინც იმისათვის, რომ რესპუბლიკის პარლამენტმა მოსკოვთან დაპირისპირება გადაწყვიტოს და ბითაროვის დამტკიცებაზე უარი განაცხადოს.
თითქმის ყველა ადგილობრივი პოლიტიკოსი და პოლიტოლოგი ვარაუდობს, რომ ბითაროვს დაამტკიცებენ და მომდევნო ხუთი წლის განმავლობაში სწორედ ის დაიკავებს ამ პოსტს.
ვიაჩესლავ ბიტაროვი“ბითაროვს გარკვეული ტიპის ოპოზიციაც ჰყავს – თუნდაც იმავე მურათ აგუზაროვისა და რესპუბლიკის ყოფილი ლიდერის, მამსუროვის მომხრეების სახით, მაგრამ ბითაროვის მოწინააღმდეგეთა შორის ვერავის ექნება იმის პრეტენზია, რომ თავი სერიოზულ ოპოზიციურ ძალად წარადგინოს – ამის საფუძველს არც საზოგადოებრივი აზრი იძლევა, და არც ეკონომიკური მდგომარეობა,” – მიაჩნია ბადრი გაზათის.
სწორედ სედატური სცენარის სასარგებლოდ მეტყველებს ის, რომ რეგისტრაციაზე უარის მიღების შემდეგ იმავე მურათ აგუზაროვმა “ფეისბუკში”, საკუთარ გვერდზე გამოაქვეყნა მიმართვა, რომელშიც ამომრჩევლებს მოუწოდებდა, პეტიციებზე ხელმოწერისა და მიტინგების გამართვისაგან თავი შეეკავებინათ – პროვოკაციის თავიდან ასარიდებლად. თუმცა, მან ისიც აღნიშნა, რომ გარკვეული ტიპის აქტივობის უფლებას იტოვებს, რასაც აუცილებლად მიმართავს მას შემდეგ, რაც მომხრეებთან ერთად ყველაფერს დაწვრილებით განიხილავს.”
გამოქვეყნდა: 08.09.2016
