ჩრდილოეთ ოსეთში საბჭოთა კავშირის აღდგენას ცდილობენ
საბჭოთა კავშირი აღდგა – ყოველ შემთხვევაში, ჩრდილოეთ ოსეთის მკვიდრთა ერთი ჯგუფისთვის. მოძრაობა “სსრკ-ს მოქალაქეები” ქმნის სამთავრობო ორგანოებს, გასცემს საბჭოთა სტილის დოკუმენტებს და მონაწილეობს არეულობებში. საბჭოთა ”სექტანტებს” პოლიციელები დევნიან – მაგრამ არა პოლიტიკური წყობის დამხობის მცდელობისთვის, არამედ თაღლითობისთვის.
ჩრდილოეთ ოსეთის ავტონომიური საბჭოთა სოციალისტური რესპუბლიკის უმაღლესი საბჭოს წევრი – ასე წარმოადგენს საკუთარ თავს პენსიონერი ანდრეი გასიევი ჩრდილოეთ ოსეთიდან. ის ამბობს, რომ არ ცნობს რუსეთის კანონებს და უარყოფს 1992 წელს მიღებულ კონსტიტუციას:
”კონსტიტუციის ტექსტი ამერიკელებმა ჩამოიტანეს, ერთ ღამეში ინგლისურიდან თარგმნეს რუსულად და რუსეთის ფედერაციის კონსტიტუციად გამოაცხადეს. ჩვენ გავარკვიეთ, რომ მისთვის არც პრეზიდენტს და არც პარლამენტის თავმჯდომარეს ხელი არ მოუწერიათ. ის უკანონოა,” – ამტკიცებს გასიევი.
• სტალინი კვლავ ცოცხალია სამხრეთ ოსეთსა და აღმოსავლეთ უკრაინაში
• ვლადიკავკაზში 1500 ადამიანი კორონავირუსის შესახებ ინფორმაციასა და ხელისუფლების ცვლილებას ითხოვს
• კორონავირუსი ჩრდილოეთ კავკასიაში: უკმაყოფილება ხელისუფლების მიმართ იზრდება
როგორც აღმოჩნდა, ჩრდილოეთ ოსეთში მისნაირი უამრავი ადამიანია. “სსრკ-ს მოქალაქეების” მოძრაობა რესპუბლიკაში დაახლოებით ორი წელია არსებობს, მაგრამ პირველად საჯაროდ 20 აპრილს ვლადიკავკაზში გამართული საპროტესტო აქციების დროს გამოჩნდა. ეს იყო აქცია კორონავირუსის პანდემიის გამო საკარანტინო ზომების წინააღმდეგ, რომლის დროსაც მოხდა შეტაკება მომიტინგეებსა და პოლიციას შორის.
“სსრკ-ს მოქალაქეების” წარმომადგენლები მაშინ ქუჩაში გამოვიდნენ თავიანთი ლიდერის, ოპერის მომღერლის, ვადიმ ჩელდიევის მხარდასაჭერად. ჩელდიევი იმითაა ცნობილი, რომ საჯაროდ უარყოფს კორონავირუსის არსებობას და ხალხს მოუწოდებს, არ დაემორჩილონ ხელისუფლებას.
ჩელდიევი ხულიგნობის, ექსტრემიზმისკენ მოწოდების და ხელისუფლების წარმომადგენელზე ძალადობის ბრალდებით დააპატიმრეს. მას ასევე ბრალად ედება “საჯაროდ მცდარი ინფორმაციის გავრცელება იმ გარემოებების შესახებ, რომლებიც საფრთხეს უქმნის მოქალაქეების სიცოცხლესა და უსაფრთხოებას.”
დაკავებულის ადვოკატი ბრალდებას უსაფუძვლოდ მიიჩნევს.
მის გარდა, აქციის კიდევ რამდენიმე მონაწილე დააკავეს.
ალტერნატიული ქვეყანა
“სსრკ-ს მოქალაქეები” აცხადებენ, რომ საბჭოთა კავშირი აღადგინეს – ანდრეი გასიევის თქმით, სსრ კავშირის უმაღლესი საბჭო ამა წლის თებერვლიდან მოსკოვში ფუნქციონირებს და ამჟამად ადგილობრივი ხელისუფლების ორგანოების ფორმირდება მიმდინარეობს.
მათ შორის – ფინანსთა, იუსტიციის, ჯანდაცვის, სოციალური დაცვის სამინისტროების, შინაგან საქმეთა სამინისტროსა და КГБ-სიც კი. უმაღლესი საბჭოს თავმჯდომარისა და ჩრდილოეთ ოსეთის მინისტრთა საბჭოს ხელმძღვანელის პოსტებს ერთი და იგივე პირი – ანატოლი ხუგაევი იკავებს.
”სსრკ-ს მოქალაქეები” არ ცნობენ რუსეთის ფედერაციას როგორც სახელმწიფოს და აცხადებენ, რომ დღევანდელი რუსეთი დასავლეთის კოლონიაა. რომ სსრკ უკანონოდ დაიშალა, რადგან 1991 წელს ჩატარებულ რეფერენდუმზე, მოქალაქეების 77 პროცენტმა მხარი მის შენარჩუნებას დაუჭირა.
მათი აზრით, რუსეთის პირველმა პრეზიდენტმა, ბორის ელცინმა, ჩაიდინა თანამდებობრივი დანაშაული, როდესაც ხელი მოაწერა ”ბელოვეჟის შეთანხმებას” დამოუკიდებელ სახელმწიფოთა თანამეგობრობის შექმნის შესახებ – რამაც სსრკ დაასრულა.
ამის საფუძველზე „მოქალაქეები“ მოუწოდებენ ადგილობრივ მოსახლეობას არ გადაიხადონ სახელმწიფო და კომუნალური გადასახადები.
რუსლან ლალიევი, ჩრდილოეთ ოსეთის ნოგირის სოფლის დასახლების დეპუტატი, რომელიც ბევრ “მოქალაქეს” პირადად იცნობს, ამბობს, რომ აქტივისტების ჯგუფი “ორიოდე წლის წინ” გამოჩნდა და მათ განკარგულებაში მთელი ხუთსართულიანი შენობა აღმოჩნდა.
ლალიევი “მოქალაქეებს” სექტას უწოდებს და ამბობს, რომ მათ შორის განხეთქილება მოხდა:
”სექტის შიგნით წინააღმდეგობებია, რის შედეგადაც ისინი დაიშალნენ და ერთმანეთს არ აღიარებენ. მაგალითად, ანატოლი ხუგაევმა დაიწყო ალტერნატიული სახელისუფლო ორგანოების – საგადასახადო ორგანოების, ბანკების, საარჩევნო კომისიის შექმნა.”
სექტანტები თუ თაღლითები?
ხელისუფლება მიიჩნევს, რომ “სექტა” არც ისე უწყინარია. 20 აპრილის არეულობის საქმის გარდა, ჩრდილოეთ ოსეთის შინაგან საქმეთა სამინისტროს განცხადებით, მან თაღლითების ჯგუფის საქმიანობა აღკვეთა და აღძრა საქმე ორგანიზაციის წინააღდეგ, რომელიც მოქალაქეებზე “სსრკ-ს პასპორტებს” ყიდდა.
შსს-ს ცნობით, ”ჩრდილოეთ ოსეთის უმაღლესი საბჭოს” სახელით, მისი ხელმძღვანელი ანატოლი ხუგაევი მოქალაქეებს საბჭოთა კავშირის მოქალაქის დროებით მოწმობებს სთავაზობდა, რისთვისაც ”სახელმწიფო ბაჟი” 300 რუბლის ოდენობით (დაახლოებით 4.2 დოლარი) უნდა გადაეხადათ. ორგანიზაციის თავმჯდომარე და წევრები, სამართალდამცავი ორგანოების ცნობით, ასევე “მიწის მესაკუთრეების” ყალბ ცნობებს გასცემდნენ.
”ამ ორგანიზაციის არსებობის განმავლობაში, თაღლითთა ჯგუფმა შეძლო ათასამდე მოქალაქის მოტყუება და უკანონოდ მოპოვებული თანხები პირადი საჭიროებისთვის დახარჯეს”, – აცხადებს შსს.
ამასთან, როგორც ადგილობრივები ამბობენ, “მოქალაქეები”, რომლებიც ხალხს საბჭოთა დოკუმენტებს სთავაზობდნენ, ფულს ყოველთვის არ ითხოვდნენ.
”ეს მოქალაქეები პირდაპირ ჩემს სახლში მოვიდნენ. მათ სსრკ-ს პასპორტი შემომთავაზეს , – იხსენებს ქალაქ ბესლანის მკვიდრი აცამაზი. – სახლებში დადიოდნენ, ერთ-ერთი საპასპორტო განყოფილების უფროსად გაგვეცნო და ამბობდა, რომ საბჭოთა კავშირის პასპორტს გამიკეთებდა. არა, ფული არ მოუთხოვიათ. მე დავცინე და კარი დავუხურე.”
გამოძიების ფარგლებში პოლიციამ ხუგაევის სახლი, ასევე “ჩრდილოეთ ოსეთის უმაღლესი საბჭოს” წევრების სახლები, მათ შორის ანდრეი გასიევის სახლიც გაჩხრიკა.
თავად გასიევი ბრალდებას უკანონოდ მიიჩნევს და ირწმუნება, რომ ჩხრეკა დარღვევებით ჩატარდა.
მისივე თქმით, დოკუმენტების – “სსრკ-ს პასპორტის დაკარგვის დროებითი მოწმობების”, გაფორმებას “შსს-ს საპასპორტო და სავიზო მომსახურების” განყოფილება აწარმოებდა. ამასთან, მისი თქმით, რამდენიმე შემთხვევაში “პასპორტისტები ზედმეტებში გადავიდნენ” და იმაზე მეტი ფული აიღეს, ვიდრე საჭირო იყო.
თაღლითობის მუხლით “სექტის” წევრებს 6 წლამდე პატიმრობა ემუქრებათ.
რატომ სურთ ადამიანებს სსრკ-ში დაბრუნება
პოლიტოლოგი ალან მამიევი ამბობს, რომ ჩრდილოეთ ოსეთში სსრკ-ს ნოსტალგია მართლაც არსებობს და ამას თავისი მიზეზები აქვს:
”ასაკოვან ადამიანებს სსრკ-ს ნოსტალგია აქვთ. ახალგაზრდები კი, რომლებიც 90-იან წლებში რუსეთში დაიბადნენ და საბჭოთა კავშირის შესახებ უფროსებისგან იციან, ასევე ხდებიან სსრკ-ს მომხრეები, თუ თანამედროვე რეალობაში სამართლიანობას ვერ პოულობენ.”
პოლიტოლოგის აზრით, ”სექტები, რომლებსაც სურთ სსრკ-ში დაბრუნება, იგივეა, რაც იმ სექტები, რომლებიც რუსეთის იმპერიაში დაბრუნებას ცდილობენ. ადამიანები სასურველს სინამდვილედ ასაღებენ. ”
მისი თქმით, ამ ადამიანებით მანიპულირება ხდება, მაგრამ ასევე აშკარა ფაქტია, რომ ჩრდილოეთ ოსეთის მრავალი მკვიდრს საბჭოთა პერიოდის ნოსტალგია აქვს.
