"ქართული ოცნება" 53.93% - ცესკომ არჩევნების შემაჯამებელი ოქმი მიიღო. თავმჯდომარეს სხდომაზე შავი საღებავი შეასხეს
ცესკომ არჩევნების შემაჯამებელი ოქმი მიიღო
ცენტრალურმა საარჩევნო კომისიამ 26 ოქტომბრის საპარლამენტო არჩევნების შედეგების შემაჯამებელი ოქმი წარადგინა. მათი თქმით, 2024 წლის 26 ოქტომბრის საპარლამენტო არჩევნებში, ამომრჩეველთა საერთო რაოდენობა 3 508 294 მილიონს შეადგენდა.
“შემაჯამებელი ოქმი შემდგარია. ამით, ფაქტობრივად, დასრულებულია საარჩევნო პერიოდი.” – თქვა კალანდარიშვილმა.
დღეიდან იწყება 10-დღიანი პერიოდის ათვლა, როდესაც ახალი მოწვევის პარლამენტის პირველი სხდომა უნდა გაიმართოს.
ცენტრალური საარჩევნო კომისიის შედეგების შემაჯამებელი ოქმის მიხედვით, საარჩევნო სუბიექტებისთვის მინიჭებულ საბოლოო შედეგები ასეთია
- ქართული ოცნება, 1 120 053 ხმა (53.93%) – მანდატების რაოდენობა (89)
- კოალიცია ცვლილებისთვის, 229 161 ხმა (11.03 %) – მანდატების რაოდენობა (19)
- ერთიანობა ნაციონალური მოძრაობა 211 216 ხმა (10.17%) – მანდატების რაოდენობა (16)
- კოალიცია ძლიერი საქართველო 182 922 ხმა (8.81%) – მანდატების რაოდენობა (14)
- გახარია საქართველოსთვის 161 521 (7.78 %) – მანდატების რაოდენობა (12)
სხდომაზე კომისიის ოპოზიციური წევრის, დავით კირთაძის სიტყვით გამოსვლას დაპირისპირება მოჰყვა. კირთაძემ გიორგი კალანდარიშვილს შავი საღებავი შეასხა. კირთაძემ კალანდარიშვილს საღებავი მას შემდეგ შეასხა, რაც ამ უკანასკნელმა სიტყვით გამოსვლის საშუალება არ მისცა და დარბაზის დატოვება მოსთხოვა.
კალანდარიშვილი ამბობდა, რომ კირთაძის გამოსვლა შემაჯამებელ ოქმს არ უკავშირდებოდა და მან 2-წუთიანი რეგლამენტიც დაარღვია. ამას კომისიის წევრის მხრიდან უკმაყოფილება მოჰყვა. კირთაძე წამოდგა და თავისი მაგიდიდან ჭიქა აიღო, საიდანაც შემდეგ კალანდარიშვილს საღებავი შეასხა.
დავით კირთაძეზე შს სამინისტრომ სისხლის სამართლის საქმე აღძრა. როგორც უწყებაში ამბობენ, გამოძიება ცესკოს მომართვის საფუძველზე, სისხლის სამართლის კოდექსის 118-ე მუხლით დაიწყო, რაც ჯანმრთელობის განზრახ ნაკლებად მძიმე დაზიანებას გულისხმობს.
შინაგან საქმეთა სამინისტრომ ცესკოსთან მსვლელობაზე ადმინისტრაციული წესით სამი ადამიანი დააკავა. დაკავებულებს შორის არის “ფორმულას” ერთ-ერთი დამფუძნებელი და რეჟისორი გიორგი ლიფონავა. მუხლი ჯერჯერობით დაზუსტებული არაა.
ცენტრალური საარჩევნო კომისიასთან შეკრებილმა აქციის მონაწილეებმა, შემაჯამებელი სხდომის დასრულების შემდეგ აღმაშენებლის ხეივანზე მსვლელობა მოაწყვეს.
აქციის მონაწილეებმა აღმაშენებლის ხეივანზე გზის გადაკეტვა რამდენჯერმე სცადეს, პოლიცია კი სავალი ნაწილიდან მათ გადაყვანას ძალის გამოყენებით შეეცადა.
კირთაძის თქმით, ეს იყო ის შავი ლაქა-საღებავი, რომელიც გიორგი კალანდარიშვილმა “თავის ქმედებითა და მის მიერ დაორგანიზებული არჩევნებით” ქვეყანას დაამჩნია.
“ეს იყო ზუსტად ის შავი ლაქა, შავი საღებავი, რომელმაც თავის ქმედებით, მის მიერ დაორგანიზებული არჩევნებით, ჩვენს ქვეყანას დაამჩნია.
სამწუხაროა, რომ ჩვენს ქვეყანას ჰქონდა შანსი ჩაგვეტარებინა ისეთი სამართლიანი, გამჭვირვალე და ევროპული არჩევნები, რომლითაც დიდ ოჯახში შევიდოდით, თუმცა მან არჩია რუსეთი, მან შეასრულა ქართული ოცნების დავალება და ფაქტობრივად, გადაწყვეტილება მიიღო, რომ ნოტარიულად, მოპარული ხმებით დაემტკიცებინა, თუმცა კი ნახეთ, პროტესტის ის ზომა, რომელიც გამოვიყენე.
ის შავი საღებავი, რომელიც მას ლაქად დარჩება მთელი ცხოვრების მანძილზე.
ყველაფრისთვის მზად ვარ იმიტომ, რომ ცესკოს თავმჯდომარემ ვერც ამომრჩევლის, ვერც სტუდენტების ხმა ვერ გაიგო, თუმცა ეს პროტესტი არის ჩემი იმ ხალხის სოლიდარობის, რომლებიც დღეს მოპარულ არჩევნებს აპროტესტებენ
ეს იყო ჩვეულებრივი საღებავი, რომელიც მან ერთხელ თქვა, რომ “ბიულეტენმა გაჟონაო” და დღეს, ცესკოს თავმჯდომარემ გაჟონა და დარჩა ის შავი ლაქა – ისევ განვმეორდები, რომელიც მან ქვეყანას დღევანდელი მისი ქმედებით დაამჩნია და რომელიც ჩატარდა”. – თქვა კირთაძემ “ტვ პირველთან” საუბრისას.
26 ოქტომბრის საპარლამენტო არჩევნების შემდეგ საქართველო ახალი, სრულიად განსხვავებული რეალობის წინაშე აღმოჩნდა.
არჩევნებში ხმების უმრავლესობა – თითქმის 54 პროცენტი “ქართულმა ოცნებამ მიიღო. ეს 12 პროცენტით მეტია ეგზიტპოლის შედეგზე. ამ მონაცემების არ სჯერა არც ადგილობრივ დამკვირვებლებს და არც საერთაშორისო თანამეგობრობას. დამკვირვებლების და ექსპერტების მიერ აღმოჩენილმა ათასობით დარღვევამ და გაყალბების სისტემურმა სქემამ არჩევნების შედეგები კითხვის ნიშნის ქვეშ დააყენა როგორც ქვეყნის შიგნით, ასევე მის ფარგლებს გარეთაც.
საერთაშორისო თანამეგობრობა არ აღიარებს არჩევნების შედეგებს და მათ ლეგიტიმურობას ეჭვის ქვეშ აყენებს. ერთადერთი ევროპელი ლიდერი, რომელმაც საპარლამენტო არჩევნები აღიარა, ვიქტორ ორბანია. საქართველოში ევროკავშირის ელჩის, პაველ ჰერჩინსკის განცხადებით, მთავრობის კურსის გამო, ევროკავშირის ლიდერებმა ქვეყნის ევროკავშირში გაწევრების პროცესი შეაჩერეს, მწვავე განცხადებების ისმის აშშ-დანაც.
