ასლან ბჟანიამ პარლამენტს აფხაზეთში ბინების შესახებ კანონის მიღება „უბრძანა“. რაზე მიუთითებს ეს?
ბინების შესახებ კანონი აფხაზეთში
აფხაზეთის ე.წ. პრეზიდენტმა ასლან ბჟანიამ განაცხადა, რომ პარლამენტმა ბინების შესახებ სკანდალური კანონი უნდა მიიღოს. დეპუტატთა ნაწილმა ეს კონსტიტუციის დარღვევად და საკანონმდებლო ორგანოზე ზეწოლად მიიღო.
JAMnews-ის აფხაზეთის რედაქტორი და გაზეთ „ჩეგემსკაია პრავდას“ მთავარი რედაქტორი ინალ ხაშიგი განმარტავს, რაზე მიანიშნებდა ბჟანია და რატომ იქცა დეპუტატების ნაწილი მის მოვალედ.
“უცილებელია!”
ასლან ბჟანიამ, სამოქალაქო პალატაში ბინების აქტიურ ლობირებასთან დაკავშირებული კანონპროექტის კომენტირებისას, სიტყვასიტყვით შემდეგი თქვა:
„ჩვენ ამას ასი წლით არ გადავდებთ და არ გავაჭიანურებთ. ივლისში გვექნება განხილვა და პარლამენტმა უნდა მიიღოს გადაწყვეტილება. ეს ასე უნდა მოხდეს! ეს უნდა მოხდეს!”
ასეთმა “მოწესრიგებულმა” ტონმა დეპუტატები აღაშფოთა. მათგან სამმა (აფხაზეთის პარლამენტში 35 დეპუტატია), კან კვარჩიამ, ერიკ რშტუნიმ და ნაურ ნარმანიამ საგანგებოდ მოწვეულ პრესკონფერენციაზე განაცხადეს, რომ პრეზიდენტი პარლამენტზე ზეწოლით არღვევს კონსტიტუციას.
ერიკ რშტუნი: „შეგახსენებთ, თუ ვინმემ არ იცის, რომ აფხაზეთის რესპუბლიკის კონსტიტუციაში მე-7 მუხლის პირველ თავში ნათლად არის განმარტებული, რომ რესპუბლიკაში სახელმწიფო ძალაუფლება ხორციელდება დაყოფის საფუძველზე. საკანონმდებლო, აღმასრულებელ და სასამართლო ხელისუფლებებში, რომლებიც დამოუკიდებელია. უპირველეს ყოვლისა, მე მმართებს ჩემი სამშობლოს ვალი, ჩემი მშობლების, ჩემი ხალხის და ჩემი ამომრჩევლის, ვისგანაც დელეგირებული ვარ პარლამენტში“.
კან კვარჩია: „ხვალ გვექნება კომიტეტის სხდომა და მოვითხოვ, რომ ეს კანონპროექტი დაუბრუნდეს პრეზიდენტს. იმ ფორმით, როგორიც დღეს არსებობს კანონი, ჩემთვის მიუღებელია პირველი მოსმენით მიღებაც კი. თუ საფუძვლად ავიღებთ, რომ მივიღოთ პირველი მოსმენით, ჩავთვლი, რომ ჩვენ უბრალოდ პრინციპები შევცვალეთ და ვღალატობთ ჩვენს ქვეყანას, ჩვენს ხალხს და ქვეყნის მომავალს.”
- “იზოლირებული დასვენება“: რუსი ოლიგარქი აფხაზეთში „ანკლავს“ აშენებს
- აფხაზეთში ბინების შესახებ კანონი: “ბომბი აფხაზეთ-რუსეთის ურთიერთობებისთვის?”
10 ათასი ბინა = 100 ათასი უცხოელი
კანონპროექტი, რომელმაც საზოგადოების დიდი გამოხმაურება გამოიწვია, ითვალისწინებს აფხაზეთში 10 წლის განმავლობაში 30 000 ბინის აშენებას და მათ უცხოელებზე (კერძოდ, რუსებზე) მიყიდვას.
ხელისუფლებას მიაჩნია, რომ ეს სერიოზულ იმპულსს მისცემს აფხაზეთის ეკონომიკას და მნიშვნელოვნად შეავსებს რესპუბლიკის ბიუჯეტს.
თავის მხრივ, ბინების შესახებ კანონის მიღების მოწინააღმდეგეები დარწმუნებულნი არიან, რომ საუბარია უცხოელებზე საცხოვრებელი უძრავი ქონების მიყიდვის აკრძალვის ფარულად მოხსნაზე.
მათი პროგნოზით, 30 ათასი ბინის მშენებლობა და გაყიდვა გამოიწვევს იმას, რომ 100 ათასი უცხოელი აფხაზეთში გადასახლდება. თუ გავითვალისწინებთ, რომ აფხაზეთის ამჟამინდელი მოსახლეობა 240 ათასი ადამიანია, ამან შეიძლება დიდად იმოქმედოს დემოგრაფიულ სურათზე. ფაქტობრივად, ამის თავიდან ასაცილებლად შემოიღეს თავის დროზე აკრძალვა უცხოელებზე საცხოვრებლის მიყიდვაზე.
მიუხედავად იმისა, რომ ბინების შესახებ კანონპროექტი არ გულისხმობს, რომ მათ მფლობელებს შეეძლებათ აფხაზეთის მოქალაქეობაზე განაცხადის გაკეთება, არ არსებობს იმის გარანტია, რომ ეს წესი მომავალში არ შეიცვლება.
ინალ ხაშიგის კომენტარი
პრეზიდენტი ასლან ბჟანია, რომლისთვისაც დღის წესრიგში ალბათ ყველაზე მნიშვნელოვანია ბინების საკითხი (ყოველ შემთხვევაში, გარედან ასე ჩანს), თვლის, რომ პარლამენტის დეპუტატებს მისი ვალი აქვთ.
ამასთან, ბჟანიამ იცის, რომ მისი ამ განცხადებით აღშფოთებული დეპუტატები – ანუ ოპოზიციონერები კვარჩია, რშტუნი და ნარმანია – მის მოვალეებად არ არიან დასახელებული. ფაქტობრივად, პრეზიდენტის სიტყვები სხვა დეპუტატებსაც ეხებოდა, რომლებიც, ასლან ბჟანიას თქმით, მასთან ნამდვილად ვალში არიან. იმიტომ რომ, საპარლამენტო არჩევნების დროს, ადმინისტრაციული რესურსისა და გარკვეული თანხის გარეშე ისინი პარლამენტში ვერ მოხვდებოდნენ.
მხოლოდ იმის გამოცნობა შეიძლება, თუ რამდენი დეპუტატია ვალში პრეზიდენტთან, მაგრამ თავად ბჟანია დარწმუნებულია, რომ მოვალეთა რაოდენობა აღემატება ბინების შესახებ კანონის მისაღებად საჭირო დეპუტატთა ხმებს.
ზოგადად, აფხაზეთის მმართველობის სისტემაში – არა ქაღალდზე ჩამოყალიბებულში, არამედ რეალურში – პრეზიდენტი თითქმის მეფეა. მის ვალშია მთავრობაც, პარლამენტიც, სასამართლოც, პროკურატურაც და საერთოდ, ყველა, ვინც რაღაცას აკეთებს „აფხაზეთის რესპუბლიკის“ სახელით. და არა მხოლოდ ასლან ბჟანიას აქვს ასეთი უფლებამოსილება – ეს ყველა მის წინამორბედს, როგორც პრეზიდენტს, ჰქონდა.
ვიღაც მაინც ამართლებს ძალაუფლების ასეთ მახინჯ კონცენტრაციას ერთი ადამიანის ხელში იმით, რომ „სხვა შემთხვევაში დაიწყება სრული არეულობა“.
ჩემთვის „სრული არეულობაა“, როცა ჩვენ, აფხაზეთის მოქალაქეებს, გვაწუხებს ფორმა და არა შინაარსი ასლან ბჟანიას ფრაზის, რომ მასთან ვალში არიან.
მაგრამ, თუ მართლა მართლა ვალი აქვთ, რატომ არ ვწუწუნებთ? რატომ არის პრეზიდენტსა და დეპუტატებს შორის რაიმე ვალდებულებები, რაც კანონით არ არის გათვალისწინებული?
ამიტომ უფრო სწორია დავსვათ კითხვა: რატომ არიან ვალში დეპუტატები პრეზიდენტთან?
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
