ბელარუსი: მასობრივი დაპატიმრებები, შეტაკებები პოლიციასთან, "უცხოელი დაქირავებულები"
წყაროები – სააგენტო Tut.by და რადიო Эхо Москвы
ბელარუსის ხელისუფლებამ განაცხადა, რომ რუსული კერძო სამხედრო კომპანიის 32 მებრძოლი დააპატიმრა.
სახელმწიფო მედიის ცნობით, ბელარუსში სულ 200 დაქირავებული იმყოფება. მათი მიზანი მდგომარეობის დესტაბილიზაციაა 9 აგვისტოს საპრეზიდენტო არჩევნების წინა დღეს.
ეს არჩევნები მოქმედი პრეზიდენტის ალექსანდრ ლუკაშენკოსა და გაერთიანებული ოპოზიციის კანდიდატს სვეტლანა ტიხანოვსკაიას შორის დაპირისპირებაში გადაიზარდა.
• იზოლაციის აღლუმი. როგორ ჩაიარა მოსკოვში მეორე მსოფლიო ომში გამარჯვების 75 წლისთავმა
• რიგები თავისუფლებისთვის – უჩვეულო მასობრივი საპროტესტო აქცია ბელარუსში
• იძულებითი გამჭვირვალობა: როგორ მიაჩვია კორონავირუსმა ხალხთან საუბარს ბელარუსის ხელისუფლება
ლუკაშენკო უკვე 26 წელია ხელისუფლებაშია. დამოუკიდებელი ექსპერტების აზრით, მისი რეიტინგი 7 პროცენტს არ აღემატება.
ტიხანოვსკაია – ოპოზიციის კანდიდატი
ტიხანოვსკაია პრეზიდენტობის კანდიდატი მას შემდეგ გახდა, რაც დააპატიმრეს მისი მეუღლე, ბიზნესმენი და პოპულარული ბლოგერი სერგეი ტიხანოვსკი, რომელიც საპრეზიდენტო არჩევნებში მონაწილეობას აპირებდა.
სვეტლანა ტიხანოვსკაიას პროგრამა მარტივია – 6 თვის განმავლობაში ბელარუსში ახალი, თავისუფალი არჩევნების ჩატარება.
ტიხანოვსკაიას საარჩევნო შტაბში გაერთიანდა კიდევ ორი კანდიდატის – ვიქტორ ბაბარიკოს და ვალერი ცეპკალოს შტაბები, რომლებიც ხელისუფლებამ არ დაარეგისტრირა. პირველი მათგანი, შვილთან ერთად, დაკავებულია, მეორე კი იძულებული გახდა ქვეყანა დაეტოვებინა.
მიტინგები და დაკავებები
ვითარება ბელარუსში დაიძაბა მინსკში 18 ივლისის მიტინგების შემდეგ, იმ კანდიდატების მხარდასაჭერად, რომლებიც საპრეზიდენტო არჩევნებზე არ დაუშვეს.
აქციების მონაწილეთა რაოდენობის დადგენა შეუძლებელი იყო, რადგან ისინი ერთდროულად ქალაქის სხვადასხვა უბანში იმართებოდა, მაგრამ საუბარია მინიმუმ ასობით ადამიანზე. აქციების დაწყებისთანავე ძალადობრივი დაკავებები და პოლიციასთან შეტაკებები დაიწყო. ცნობილია მინსკში, სულ მცირე, 239 დაკავებულის შესახებ.
მათი ნაწილი დაკავების დროს დაშავდა – პოლიცია და სპეცრაზმელები მომიტინგეებს სახეში ურტყამდნენ და ხელებს უგრეხდნენ. ასევე დააკავეს ჟურნალისტები რამდენიმე გამოცემიდან – Belsat, Tut.by, BBC, რადიო თავისუფლება და მრავალი სხვა.
ამ მოვლენების შემდეგ სვეტლანა ტიხანოვსკაიამ ქვეყნის მასშტაბით თავისი წინასაარჩევნო მოგზაურობა დაიწყო. მისი შეხვედრები უპრეცედენტო ყურადღებას იპყრობს: ქალაქებში, სადაც 30-40 ათასი ადამიანი ცხოვრობს, მიტინგებზე 7-8 ათასი გამოდის.
დამოუკიდებელი ექსპერტები და ჟურნალისტები ბელარუსში მიიჩნევენ, რომ დაკავებული უცხოელი დაქირავებულების ამბავი პრეზიდენტ ლუკაშენკოს მცდელობაა, ამომრჩეველი რუსული ჩარევის საფრთხით დააშინოს.
