ლუკაშენკო ავტომატით ხელში ვერტმფრენში - პროტესტის მორიგი სერია ბელარუსში
23 აგვისტო – ბელარუსში, პროტესტის მეთოთხმეტე დღე, ოპოზიციამ არჩევნების გაყალბებისა და შემდგომი რეპრესიების წინააღმდეგ მასობრივი საპროტესტო აქციით აღნიშნა. ხელისუფლებამ ამას არმიის მობილიზებით უპასუხა, თავად ლუკაშენკო კი ხალხის წინაშე იარაღით ხელში გამოჩნდა.
საპროტესტო აქციის ნახევარი მილიონი მონაწილე
უხეში გამოთვლით, მინსკის ქუჩებში, დაახლოებით, 250 ათასი ადამიანი გამოვიდა. ეს უფრო მეტია, ვიდრე გასულ კვირას იყო.
საგრძნობლად გაიზარდა პროტესტის მონაწილეთა რაოდენობა რეგიონებშიც. მხოლოდ ქალაქ გროდნოში, ლუკაშენკოს საწინააღმდეგო აქციაში, მონაწილეობა 100 ათასმა ადამიანმა მიიღო.
• ანალიზი: რა შანსები აქვთ გამარჯვებისთვის ხელისუფლებასა და ოპოზიციას ბელარუსში
• გაფიცვები, ევროპის მხარდაჭერა, რუსეთის ჩარევის საფრთხე – რა ხდება ბელარუსში
• Nexta – ტელეგრამ-არხი, რომელიც სათავეში ჩაუდგა ბელარუსის პროტესტს. ვინ არიან ისინი?
საერთო ჯამში, ქვეყანაში, პროტესტის მონაწილეთა რაოდენობა ნახევარ მილიონს მიუახლოვდა.
მასობრივ აქციამდე ერთი დღით ადრე, მინსკში, დემონსტრაცია გამართეს იმ ადამიანებმა, რომლებიც დააპატიმრეს და ციხეებში აწამეს გასული კვირის განმავლობაში. ისინი ციხის წინ დადგნენ, მიწაზე საკუთარი კამერის სივრცე შემოხაზეს – რათა ეჩვენებინათ, როგორ გრძნობენ ადამიანები თავს, როდესაც 50 კაცს ათავსებენ 4 ადამიანზე გათვლილ კამერაში.
მსვლელობა დამოუკიდებლობის სასახლემდე – ლუკაშენკოს რეზიდენციამდე მივიდა.
დაკავებულთაგან, რამდენიმე ათეული ადამიანი კვლავ უგზო-უკვლოდ დაკარგულად მიიჩნევა.
დაკარგულთა სიიდან კიდევ ერთი ადამიანი – უკვე მეოთხე – მინსკთან ახლოს, ტყეში, ნაცემი და ჩამოხრჩობილი ნახეს.
დღევანდელი დღის ყველაზე პოპულარული ლოზუნგი – „ტრიბუნალი ლუკაშენკოსთვის!“.
პრეზიდენტი ავტომატით
გასულ კვირას, ლუკაშენკომ თავისი მხარდამჭერთა მიტინგები შეკრიბა რეგიონებში, სადაც ხალხს ქვეყანაში ნატოს შემოჭრის საფრთხეზე ესაუბრებოდა.
ასევე, შეხვდა სპეცრაზმის ოფიცრებს და პირობა დადო, რომ „ქვეყანას ნარკომანებსა და უსაქმურებს არ მისცემს“.
მან ადგილობრივი ხელისუფლებებისგან იმ საწარმოების დახურვა მოითხოვა, რომლებშიც გაფიცვები დაიწყო.
23 აგვისტოს, სიტყვით გამოვიდა ბელარუსის თავდაცვის მინისტრი. მან განაცხადა, რომ არ შეუძლია მშვიდად ადევნოს თვალი გამოსვლებს „ფაშისტური დროშით“ – საუბარია ბელარუსის ისტორიულ, წითელ-თეთრ დროშაზე, რომელიც პროტესტის სიმბოლოდ იქცა.
მინსკში, საპროტესტო აქტივობის შუა პერიოდში, ლუკაშენკოს პრესსამსახურმა გაავრცელა ვიდეო, რომელშიც იგი ვერტმფრენით, თავის შვილთან, ნიკოლაისთან ერთად, დედაქალაქში, საკუთარ რეზიდენციასთან ჯდება. ხელში ორივეს ავტომატები უჭირავთ. უკვე დემონსტრანტების წასვლის შემდეგ, ლუკაშენკო სპეცრაზმელებთან მისასალმებლად გამოვიდა, რომლებიც რეზიდენციას იცავენ.
საერთაშორისო რეაქცია
150 ათასმა ადამიანმა მიიღო მონაწილეობა ლიეტუვაში, „ბალტიის გზის“ აქციაში, რომელიც ბელარუსში მიმდინარე პროტესტის მონაწილეთა მხარდასაჭერად გაიმართა. ეს 30 წლის წინანდელი ისტორიული აქციის გამეორებაა, რომელიც ბალტიის ქვეყნებში, 1990 წელს, საბჭოთა კავშირიდან გამოსვლის იდეის მხარდასაჭერად გაიმართა.
უკრაინის პრეზიდენტმა ზელენსკიმ განაცხადა, რომ ლუკაშენკოს ადგილას, ის ახალ, თავისუფალ საპრეზიდენტო არჩევნებს ჩაატარებდა.
ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში, ჯოზეფ ბორელმა განაცხადა, რომ ევროკავშირი არ აღიარებს ლუკაშენკოს, ისევე, როგორც ვენესუელის პრეზიდენტ მადუროს. მაგრამ, ყველაფრის მიუხედავად, მასთან მუშაობას გააგრძელებს.
ბელარუსში მიმდინარე პროტესტის მხარდამჭერი აქციები გაიმართა ევროპის ყველა ქვეყნის დედაქალაქსა და ნიუ იორკში.
