აზერბაიჯანელი ბლოგერის გარდაცვალების საქმეს ომბუდსმენი შეისწავლის

აზერბაიჯანელი ბლოგერის, ჰუსეინ ბაკიხანოვის გარდაცვალების საქმეში საქართველოს სახალხო დამცველის აპარატი ერთვება.  

პარალელურად, საჭიროების შემთხვევაში, ბაკიხანოვის ინტერესების დასაცავად მზადყოფნას გამოთქვამს ორგანიზაცია „უფლებები საქართველო“.

აზერბაიჯანელ ბლოგერს, გარდაცვალებამდე, ორივე უწყებასთან ჰქონდა კომუნიკაცია.

სახალხო დამცველის აპარატსაც და „უფლებები საქართველოსაც“ ბლოგერმა ერთი და იგივე მიზნით მიმართა. თავდაპირველად საქართველოში ჩამოსვლიდან მალევე, მეორედ კი გარდაცვალებამდე რამდენიმე დღით ადრე.

როგორც ომბუდსმენის აპარატმა JAMnews-ს აცნობა, მაისში, როდესაც ჰუსეინ ბაკიხანოვმა მათ პირველად მიმართა, მას საერთაშორისო დაცვის სტატუსის მოპოვება სურდა.

 მეორედ კომუნიკაცია ივლისში შედგა. მას შემდეგ, რაც ბლოგერს თბილისის ცენტრში ჯგუფურად გაუსწორდნენ.

სახალხო დამცველის აპარატში აცხადებენ, რომ ორივე შემთხვევაში, მათ ბლოგერს გაუზიარეს იურიდიული დახმარების გამწევი ორგანიზაციების საკონტაქტო ინფორმაცია:

„ასევე განვუმარტეთ ჩვენი აპარატის მანდატი და შევთავაზეთ იმ შემთხვევაში, თუ სამართალდამცავი ორგანოების მხრიდან მიმართ უფლებების დარღვევას ექნებოდა ადგილი, შეეძლო ჩვენთვისაც მოემართა“, – ვკითხულობთ ომბუდსმენის აპარატიდან JAMnews-ისთვის გამოგზავნილ წერილში.

• შშს ამბობს, რომ აზერბაიჯანელი ბლოგერი სასტუმრო “რუმსის” სახურავიდან ორი კვირის წინ გადმოხტა. საქმის ახალი დეტალები
  
• თბილისში გარდაცვლილი იპოვეს აზერბაიჯანელი ოპოზიციონერი ბლოგერი. დეტალები

ორგანიზაციამ „უფლებები საქართველო“ აზერბაიჯანელი ბლოგერის გარდაცვალების საქმეზე დღეს პრესკონფერენცია გამართა.

ორგანიზაციაში ადასტურებენ, რომ ბაკიხანოვს, როგორც თავშესაფრის მაძიებელს, 15 ივლისს, გარდაცვალების მომდევნო დღეს, თავშესაფრის მაძიებლის დროებითი საიდენტიფიკაციო მოწმობა უნდა აეღო:

„რაც არ ნიშნავს იმას, რომ საქართველოში მას მიენიჭა ან მიენიჭებოდა ლტოლვილის ან ჰუმანიტარული სტატუსი“.

ორგანიზაციამ, ომბუდსმენის აპარატის მსგავსად, იცოდა ბაკიხანოვის ცემის შესახებაც. „უფლებები საქართველოში“ ამბობენ, რომ ამ შემთხვევაში ბაკიხანოვს მათთვის დახმარება არ უთხოვია:

„გარდაცვალების ფაქტთან დაკავშირებით სამართლებრივი დახმარების მიღების მიზნით, ბაკიხანოვის სახელით „უფლებები საქართველოსთვის“ არავის მოუმართავს, თუმცა ორგანიზაცია გამოთქვამს მზადყოფნას საჭიროების შემთხვევაში სამართალდამცავ ორგანოებში წარმოადგინოს ბაკიხანოვის ინტერესები“, – აცხადებენ ორგანიზაციაში.

ჰუსეინ ბაკიხანოვი აზერბაიჯანელი ბლოგერია, რომელსაც აზერბაიჯანის ხელისუფლებასთან პრობლემები ჰქონდა. ის პოლიტიკური მიგრანტი იყო. ბაკიხანოვი თბილისში ცხოვრობდა და აქ თავშესაფარს ითხოვდა.

29 ივლისს ცნობილი გახდა, რომ ბაკიხანოვი გარდაიცვალა.

ბაკიხანოვის გარდაცვალების საქმეს საქართველოს შინაგან საქმეთა სამინისტრო სისხლის სამართლის კოდექსის 115-ე, თვითმკვლელობამდე მიყვანის მუხლით იძებს.

ოფიციალური ვერსიით, ბაკიხანოვმა თავი მოიკლა.

შემთხევევა 14 ივლისს მოხდა. მედიაში ამ ინფორმაციის გავრცელების მომენტისთვის, ბაკიხანოვი 15 დღის გარდაცვლილი იყო.

სწორედ ეს დეტალი უჩენს ბევრ კითხვასა და ეჭვებს გარდაცვლილი ბლოგერის მეგობრებს. ბაკიხანოვის გარდაცვალების შესახებ ინფორმაცია თავდაპირველად მისმა მეგობრებმა, გერმანიაში მცხოვრებმა აფგან მუხტარლიმ და საქართველოში, მარნეულში მცხოვრებმა ავთანდილ მამედოვმა გაავრცელეს.

ორივე მათგანს აქვს კითხვა, რატომ დუმდა სამართალდამცავი უწყება ორი კვირა. რატომ არ აცნობეს მომხდარზე აზერბაიჯანის საკონსულოს. ბლოგერის გარდაცვალების შესახებ მისმა ოჯახმაც კი, რომელიც აზერბაიჯანში ცხოვრობს, ახლა შეიტყო.