რა იქნება შემდეგ, ომი? მოკლედ იმის შესახებ, თუ რას ითხოვს მოსკოვი
იქნება თუ არა რუსეთ-უკრაინის ომი?
26 იანვარს, ამერიკის შეერთებულმა შტატებმა ოფიციალურად უარყო რუსეთის მოთხოვნა, უარი თქვას უკრაინის, საქართველოსა და აღმოსავლეთ ევროპიდან სხვა კანდიდატი ქვეყნების უფლებაზე, შეუერთდნენ ნატოს. სახელმწიფო დეპარტამენტის გადაწყვეტილება მიიღეს სერიოზული კრიზისის, უკრაინის საზღვართან რუსეთის არმიის თავმოყრისა და იმ გაფრთხილების ფონზე, რომ რუსეთი მზად არის შეჭრისათვის.
სახელმწიფო მდივანმა ენტონი ბლინკენმა განაცხადა, რომ „დათმობები არ იქნება“. მაგრამ თქვა, რომ ნატოსთან კოორდინაციით, რუსეთს „სერიოზულ დიპლომატიურ გზას სთავაზობს, თუკი რუსეთი მას აირჩევს“.
თავად ამერიკელების საპასუხო დოკუმენტი არ გამოქვეყნდება.
„დიპლომატიას წარმატების უფრო მეტი შანსი ექნება, თუკი შევქმნით სივრცეს კონფიდენციალური მოლაპარაკებებისთვის“, – განაცხადა ბლინკენმა.
რუსეთის საგარეო საქმეთა სამინისტროში აღნიშნეს, რომ შეისწავლიან პასუხს.
2021 წლის დეკემბერში, რუსეთმა წერილობით გამოაქვეყნა ნატოს სამხედრო ალიანსის გაფართოებასთან დაკავშირებით შეშფოთებისა და მასთან დაკავშირებული მოთხოვნების სია.
- „არანაირი ნატო!“ – როგორ ჩაიარა მოლაპარაკებებმა რუსეთსა და აშშ-ს შორის
- საიდუმლო ლაბორატორია: ახალი ტიპის ზეწოლა აზერბაიჯანზე? კომენტარი ბაქოდან
მოკლედ იმის შესახებ, თუ რას ითხოვს მოსკოვი
● ნატოსადმი ცენტრალური მოთხოვნა – გამორიცხოს უკრაინის, საქართველოსა და აღმოსავლეთ ევროპის სხვა ქვეყნების ალიანსში გაწევრიანების შესაძლებლობა.
● ასევე, რუსეთს სურს, რომ ნატო დაბრუნდეს 1997 წლამდე არსებულ საზღვრებში. მოსკოვი აღმოსავლეთით გაფართოების შეჩერებასა და აღმოსავლეთ ევროპაში ნატოს სამხედრო საქმიანობის შეწყვეტას ითხოვს.
● ეს ნიშნავს ნატოს სამხედრო შენაერთების გაყვანას პოლონეთიდან და ბალტიისპირეთის ქვეყნებიდან – ესტონეთიდან, ლატვიიდან და ლიეტუვიდან და ასევე უარის თქმას პოლონეთსა და რუმინეთში რაკეტების განთავსებაზე.
● რუსეთმა აშშ-ს ასევე შესთავაზა ხელშეკრულების ხელმოწერა, რომელიც აკრძალავდა ბირთვული იარაღის განთავსებას მათი ეროვნული ტერიტორიების გარეთ.
როგორ გაფართოვდა ნატო 1997 წლიდან
რუკა დამზადებულია BBC-ის მიერ
იქნება თუ არა რუსეთ-უკრაინის ომი?
ბოლო კვირების განმავლობაში რუსეთმა უკრაინის საზღვართან დიდი რაოდენობით ჯარისკაცების კონცენტრირება მოახდინა (არანაკლებ 100 ათასი მებრძოლის). დასავლეთის ქვეყნები ამას შესაძლო შეჭრისათვის მზადებად აფასებენ, რასაც რუსეთი უარყოფს.
ბლინკენმა განაცხადა, რომ ამერიკის შეერთებულმა შტატებმა მკაფიოდ განმარტა თავისი „ძირითადი პრინციპები“, უკრაინის სუვერენიტეტისა და მისი უფლების ჩათვლით, თავად აირჩიოს ისეთი უსაფრთხოების ალიანსის წევრობა, როგორიც ნატოა:
„არანაირი ეჭვი არ უნდა იყოს ჩვენი განზრახვების სერიოზულობაში, როდესაც საუბარი დიპლომატიაზეა. მაგრამ ჩვენ ასევე ანალოგიური ძალით ვმოქმედებთ უკრაინის თავდაცვისუნარიანობის გასაძლიერებლად და რუსეთის შესაძლო შემდგომ აგრესიაზე სწრაფი ერთობლივი რეაგირების მოსამზადებლად“.
სახელმწიფო მდივანმა განაცხადა, რომ ბოლო დღეებში აშშ-მა უკრაინაში სამი პარტია სამხედრო „დახმარება“ გაგზავნა, მათ შორის, „ჯაველინის“ რაკეტები და ტანკსაწინააღმდეგო შეიარაღება, ასევე, ასობით ტონა საბრძოლო მასალა და აღჭურვილობა.
უკრაინისა და რუსეთის სამხედრო შესაძლებლობები
რუკა დამზადებულია BBC-ის მიერ
მოსკოვს ნატოს პასუხიც გადაეცა
ამის შესახებ ნატოს გენერალურმა მდივანმა, იენს სტოლტენბერგმა განაცხადა. მან თქვა, რომ მზად არის განიხილოს რუსეთის შეშფოთება, მაგრამ განხილვას საფუძვლად უნდა ედოს იმის გაგება, რომ ყველა ქვეყანას აქვს უფლება, აირჩიოს საკუთარი უსაფრთხოების ზომები.
26 იანვარს, რუსეთის საგარეო საქმეთა მინისტრმა სერგეი ლავროვმა პრესკონფერენციაზე განაცხადა, რომ სტოლტენბერგმა „რეალობასთან კავშირი დაკარგა“.
„უკვე დიდი ხანია მის განცხადებებს აღარ განვიხილავ“, – განუცხადა ლავროვმა ჟურნალისტებს სახელმწიფო დუმაში.
უკრაინის კრიზისის შეფასებებში აშშ-სა და ევროპას შორის განსხვავებები არ არის
ამის შესახებაც ენტონი ბლინკენმა განაცხადა. „წინადადებები, რომელიც ნატოს ხელმძღვანელობამ გადასცა მოსკოვს, სრულად უჭერს მხარს ჩვენსას და პირიქით“, – თქვა მან.
დიპლომატებმა რუსეთიდან, უკრაინიდან, საფრანგეთიდან და გერმანიიდან კიდევ ერთხელ დაადასტურეს ერთგულება უკრაინაში ცეცხლის შეწყვეტის შეთანხმების შესახებ, რომლის თანახმადაც რუსეთის მიერ მხარდაჭერილმა ამბოხებულებმა დაიკავეს ტერიტორიები დონბასის აღმოსავლეთ ნაწილში.
ოთხივე ქვეყანა აგრძელებს ცეცხლის შეწყვეტის შესახებ შეთანხმების მხარდაჭერას, მინსკის 2015 წლის შეთანხმებასთან დაკავშირებულ „სხვა საკითხებზე აზრთა სხვადასხვაობის მიუხედავად“, ნათქვამია განცხადებაში, რომელიც პარიზში გამართული მოლაპარაკებების შემდეგ, 25 იანვარს საფრანგეთის პრეზიდენტმა გამოაქვეყნა.
ორი კვირის შემდეგ დიპლომატების იგივე ჯგუფი უკვე ბერლინში უნდა შეხვდეს ერთმანეთს.
