2020 წელს საქართველოში ანტიდასავლური პროპაგანდა გაორმაგდა. რა წერია MDF-ის ანგარიშში

წინა წელთან შედარებით, 2020 წელს გაორმაგებულია ანტიამერიკული და ანტიდასავლური გზავნილები. პარალელურად კი, მკვეთრადაა გაზრდილი რუსეთის, როგორც უალტერნატივო ძალის მხარდამჭერი განცხადებები.

ამ მთავარ დასკვნამდე მივიდა არასამთავრობო ორგანიზაცია “მედიის განვითარების ფონდი“, რომელიც უკვე მეექვსე წელია საქართველოში ანტიდასავლური პროპაგანდის გავრცელებას იკვლევს.

ანგარიში „ანტიდასავლური პროპაგანდა 2020 წელს“, 22 სექტემბერს გამოქვეყნდა. დოკუმენტი ეყრდნობა ტრადიციული და ონლაინ მედიის ანალიზს, ასევე ყალბი ინფორმაციის გამავრცელებელი წყაროების იდენტიფიკაციის შედეგად მიღებულ მონაცემებს.

გასული წლის განმავლობაში ორგანიზაციის მონიტორები აკვირდებოდნენ როგორც მედიასაშუალებებს, ასევე, სხვა წყაროებს, მათ შორის: პოლიტიკურ კლასს, სასულიერო პირებს, საზოგადოებრივ ორგანიზაციებსა და საზოგადოების ცალკეულ წარმომადგენლებს.

ანგარიშში გაანალიზებულია ტრადიციულ და სოციალურ მედიაში გამოქვეყნებული ანტიდასავლური გზავნილები 2020 წლის 1 იანვრიდან 31 დეკემბრის პერიოდში.

კვლევა განხორციელებულია საქართველოს გაეროს ასოციაციასთან (UNAG) პარტნიორობით, აშშ-ს საერთაშორისო განვითარების სააგენტოს (USAID) პროგრამის „ტოლერანტობის, სამოქალაქო ცნობიერებისა და ინტეგრაციის მხარდაჭერა” ფარგლებში. 

მთავარი მიგნებები

მკვეთრად გაიზარდა ანტიამერიკული გზავნილები

ანგარიში აჩვენებს, რომ ბოლო ხუთ წელიწადში ანტიდასავლური გზავნილების რაოდენობა გასამმაგებულია. განსაკუთრებით გაზრდილი ანტიამერიკული გზავნილებია.

ანგარიშის მიხედვით, მზარდი ტენდენცია ნაწილობრივ ამერიკაში მიმდინარე შიდა პროცესებს და არჩევნებში ტრამპის დამარცხებას უკავშირდებოდა. ასევე საქართველოში მიმდინარე არჩევნების კონტექსტში, ამერიკული კვლევითი ორგანიზაციების (NDI-IRI) წინააღმდეგ კრემლისტური პარტია „პატრიოტთა ალიანსის“ მიერ ინიცირებულ დისკრედიტაციის კამპანიას.

ამერიკის შიდა პროცესებთან დაკავშირებით, 2020 წელს სამი ახალი გზავნილი გამოიკვეთა:   

1. ამერიკა გაყოფილია/ არჩევნები გაყალბდა/ამერიკას არ აქვს მორალური უფლება სხვას ჭკუა ასწავლოს;
   
2. ამერიკაში სისტემური რასიზმია;
   
3. ამერიკა კორუმპირებულია.

ამერიკული კვლევითი ორგანიზაციების წინააღმდეგ კამპანია, რომელიც მეტწილად ეროვნულ-დემოკრატიული ინსტიტუტს მიემართებოდა, შემდეგ გზავნილებს მოიცავდა:

• NDI-IRI – ს კვლევები არასანდოა
  
• NDI-IRI ებრძვიან ეკლესიას

ანგარიში ამბობს, რომ გასულ წელს, ძველი გზავნილებიდან კვლავ დომინირებდა მოსაზრება ამერიკის მიერ საქართველოს სუვერენიტეტის ხელყოფის და შიდა საქმეებში ჩარევის შესახებ.  

დასავლეთი ერევა ქვეყნის საშინაო საქმეებში

ანგარიშში ნათქვამია, რომ ამერიკის მსგავსად, დასავლეთის შემთხვევაშიც, რომელიც ერთდროულად ევროკავშირს, ამერიკას და საერთაშორისო დასავლურ ინსტიტუტებს აერთიანებს, გზავნილები გაორმაგებულია.

ეს გზავნილები ამკვიდრებს აზრს, რომ საქართველოს პარტნიორების მხრიდან ქვეყნის სუვერენიტეტის ხელყოფა, საშინაო საქმეებში ჩარევა და ქვეყნის მართვა ხდება.

მაგალითად:

• დასავლეთს გლობალური კონტროლის / ახალი მსოფლიო წესრიგის დამყარება სურს
  
• ლიბერალური წესრიგი მარცხდება
  
• დასავლეთი ისტორიის რევიზიას ცდილობს / თანამშრომლობდა ჰიტლერთან
  
• დასავლეთი არ არის სოლიდარული / ვერ გაუმკლავდა პანდემიაა.
  

დასავლეთი თავს გვახვევს გარყვნილი ცხოვრების წესს

ანგარიშში ვკითხულობთ, რომ იდენტობის დაკარგვასთან დაკავშირებულ დისკურში კვლავ დასავლეთის მიერ ჰომოსექსუალობის, პედოფილიისა და გარყვნილი ცხოვრების წესის თავსმოხვევის შიშები დომინირებდა.

ამასთანავე, მკვიდრდებოდა მოსაზრება, რომ ამერიკის არჩევნებში ბაიდენის გამარჯვება ლგბტ დღის წესრიგის კიდევ უფრო გააქტიურებას შეუწყობდა ხელს.

 ნარატივს, რომ დასავლური ღირებულებები შეუთავსებელია ქართულ იდენტობასთან, მოსდევს გზავნილები იმის შესახებ, რომ დასავლეთი რელიგიას და მართლმადიდებელ ეკლესიას, ასევე ტრადიციულ იდენტობას და ოჯახს ებრძვის.

რუსეთი უალტერნატივოა

2020 წელს გაზრდილია გზავნილები, რომლებიც საბჭოთა კავშირის მიმართ ნოსტალგიას აღვივებს. ამ გზავნილებში განსაკუთრებული აქცენტი სოციალურად დაცულ სახელმწიფოსა და საბჭოთა კეთილდღეობაზე კეთდება.

ორი ახალი გზავნილი, რომელიც 2020 წელს რუსეთის თემატიკაში მკაფიოდ გამოიკვეთა, ერთი მხრივ, საქართველოს შიდა საარჩევნო პროცესს, მეორე მხრივ, თურქეთ-აზერბაიჯანის „საფრთხის“ შეკავებას, ასევე ყარაბაღის კონფლიქტის დარეგულირებაში რუსეთის როლს უკავშირდებოდა:

• ბრალდებები საქართველოს არჩევნებში რუსეთის ჩარევაზე დაუსაბუთებელია;
  
• თურქეთის შეკავება / კავკასიაში კონფლიქტების მოგვარება მხოლოდ რუსეთს შეუძლია.

ძველი გზავნილებიდან, გასულ წელსაც აქტუალური იყო გზავნილები, რომ :

 „ჰომოსექსუალობისგან დაცვა, მართლმადიდებლობის დაცვა და ტრადიციული იდენტობის შენარჩუნება მხოლოდ მესიანისტური მისიით აღჭურვილ რუსეთს შეუძლია“.

NATO უფუნქციოა

ამერიკისგან განსხვავებით, ნატოს წინააღმდეგ გაკეთებული კომენტარები თითქმის განახევრებულია, რაც ინტეგრაციის მიმართულებით ინიციატივების არარსებობას უკავშირდებოდა.

 ნატოსთან მიმართებით ორი ახალი ნარატივი გამოიკვეთა:

• პანდემიის გამო ნატო უფუნქციოა/ ნატო=ინფიცირების საფრთხეს
  
• ყარაბაღის კონფლიქტი ნატოს უსაფრთხოებას ცვლის.

ევროკავშირი არ დაეხმარა პარტნიორ ქვეყნებს

ახალი გზავნილი ევროკავშირთან მიმართებითაც კორონავირუსის პანდემიას უკავშირდებოდა.

გასულ წელს, მკვიდრდებოდა აზრი, რომ პანდემია ევროკავშირის ერთიანობას საფრთხეს უქმნიდა, რადგან ევროკავშირმა წევრი ქვეყნების მიმართ სოლიდარობა ვერ გამოიჩინა და მათ დახმარება ვერ გაუწია.

არასამთავრობო სექტორი ისევ სამიზნე იყო

დამოკიდებულებები ამერიკელი ფილანტროპისა და ფონდ ღია საზოგადოების დამფუძნებლის ჯორჯ სოროსის, ასევე არასამთავრობოების მიმართ ანტიდასავლურ მედიაში არ შეცვლილა.

„არასამთავრობო ორგანიზაციები უცხო ქვეყნის დაკვეთის შემსრულებლად, ტრადიციულ იდენტობასთან მებრძოლებად იყვნენ წარმოჩენილი, ასევე ისმოდა უცხოეთიდან დაფინანსებული არასამთავრობოების შეზღუდვისა და გაკონტროლების მოწოდებებიც“, – ნათქვამია ანგარიშში.

ანტიდასავლური გზავნილების წყაროები

მედია, პოლიტიკოსები, საზოგადოების ცალკეული წარმომადგენლები, საზოგადოებრივი ორგანიზაციები და სასულიერო პირები – გავრცელებული გზავნილების რაოდენობის მიხედვით,  ასეთია თანამიმდევრობით ლაგდება ანტიდასავლური გზავნილების მთავარი წყაროები.

მედიებიდან გამოკვეთილია ხუთი მედიასაშუალება: ონლაინ გამოცემები – „საქართველო და მსოფლიო“, „საქინფორმი“, ტვ „ობიექტივი“, გაზეთები „ასავალ-დასავალი“ და „ალია“

პარტიებიდან ლიდერობს „პატრიოტთა ალიანსი“, ჩამონათვალშია მმართველი პარტია „ქართული ოცნებაც“. ასევე, რუსეთის ხელისუფლება, „ქართული მარში“, ნეიტრალური სოციალისტური საქართველო, ქართული იდეა და ქართული დასი.

ანგარიში ამბობს, რომ გასულ წელს ანტიდასავლური გზავნილების გავრცელებაში ათი ორგანიზაცია აქტიურობდა.

მათ შორის, ლიდერობდა „ევრაზიის ინსტიტუტი“, რომელიც„საქართველო და მსოფლიოს“ გვერდზე ჩნდებოდა; მას მოსდევს „საქართველოს განვითარების ლაბორატორია“ , რომელსაც ძირითადად მისი დირექტორი ირაკლი გოგავა წარმოადგენდა პრიმაკოვის სახელობის ქართულ-რუსული საზოგადოებრივი ცენტრი, ყოფილი პოლიტპატიმრები ადამიანის უფლებებისთვის, უფლებადამცველთა გაერთიანება  და სხვები.

სასულიერო პირებიდან, ანგარიშის მიხედვით, ანტიდასავლური გზავნილებით წინა წლის მსგავსად ავჭალის ქეთევან წამებულის სახელობის ტაძრის წინამძღვარი გიორგი რაზმაძე გამოირჩეოდა, რომელიც ძირითადად „საქართველო და მსოფლიოს“ პლატფორმაზე ჩნდებოდა.

„გასულ წელს ამ თვალსაზრისით ასევე ვანისა და ბაღდათის მიტროპოლიტი ანტონიც გააქტიურდა“, – ნათქვამია კვლევაში.