"აფხაზეთში რეფორმები გარდაუვალია და მოსკოვმა ეს უნდა გაითვალისწინოს" - მოსაზრება
რუსეთი აფხაზეთს ელექტროენერგიას კვლავ აძლევს
რუსეთმა, რომელმაც რამდენიმე თვის წინ აფხაზეთს “ჰუმანიტარული ელექტროენერგიის“ მიწოდება შეუწყვიტა და ელექტროენერგიის საბაზრო ფასებში მიყიდვა გადაწყვიტა, რისხვა წყალობად შეცვალა და 23 დეკემბრიდან, უფასო რუსული ელექტროენერგია აფხაზეთში ისევ იქნება.
“აფხაზეთი ჩვენი მშობლიური ქვეყანაა. ჩვენ მათ სახელმწიფოდ ვაღიარებთ – ისინი ჩვენი მეზობლები არიან. ვუსურვებთ მათ სტაბილურობას, კეთილდღეობას და ბედნიერებას. ბუნებრივია, ჩვენთან ერთად“, – განაცხადა რუსეთის პრეზიდენტის პრესმდივანმა დმიტრი პესკოვმა აფხაზეთის ენერგეტიკულ კრიზისთან დაკავშირებით არსებულ ვითარებაზე.
რუსეთის კეთილშობილ ჟესტს წინ უძღოდა აფხაზეთის პრეზიდენტის მოვალეობის შემსრულებლის, ბადრა გუმბას მიმართვა. თუმცა, JAMnews-ის რედაქტორი სოხუმში ინალ ხაშიგი მიიჩნევს, რომ ამ ორ ფაქტს შორის არანაირი კავშირი არ არის.
ინალ ხაშიგი:
“პრო-სამთავრობო აფხაზური მედია ერთხმად განმარტავს, რომ რუსეთმა აფხაზეთს ენერგომომარაგება სწორედ ბადრა გუმბას წყალობით აღუდგინა, რომელზეც მოსკოვი ფსონს დებს ახალ საპრეზიდენტო არჩევნებში, რომელიც 2025 წლის თებერვალში გაიმართება.
ოპოზიცია, რა თქმა უნდა, ამაზე კამათობს და ამბობს, რომ კრემლის გადაწყვეტილება უფრო ადრე იყო მიღებული – გუმბას ოფიციალურ მიმართვამდეც კი. მაგრამ, ჩემი აზრით, ეს არც ისე დამაჯერებლად ჟღერს.
წინა არჩევნებზე, 2020 წელს, კრემლი ზოგადად გულგრილი იყო იმის მიმართ, თუ ვის აირჩევდა აფხაზი ხალხი თავის პრეზიდენტად, ვინაიდან აფხაზეთში აპრიორი არ არსებობდნენ რუსეთისადმი ნეგატიურად განწყობილი პოლიტიკოსები. მაგრამ ახლა სიტუაცია სხვაგვარია: მოსკოვის მიდგომა მნიშვნელოვნად შეიცვალა და ისინი აშკარად დებენ ფსონს ბადრა გუმბაზე და სწორედ მას თვლიან ექს-პრეზიდენტ ასლან ბჟანიას მემკვიდრედ, რომელიც რუსეთს ბევრ რამეს დაჰპირდა, მაგრამ ვერაფერი შეუსრულა.
- მორიგი აფხაზური რევოლუცია. რა იქნება შემდეგ? | ასტამურ ტანია და ინალ ხაშიგი
- კომენტარი აფხაზეთიდან: არა ანტირუსული აქტი, არამედ პასუხი ბჟანიას პოლიტიკაზე
მოსკოვს, ალბათ, იმედი აქვს, რომ ბადრა გუმბა შეძლებს გააკეთოს ის, რაც ბჟანიას არ გამოუვიდა – რუსეთისთვის მომგებიანი, მაგრამ აფხაზებში არაპოპულარული შეთანხმებებისა და კანონპროექტების გატარება.
ამასთან, არ შეიძლება ითქვას, რომ კრემლი არ ითვალისწინებს აფხაზურ საზოგადოებაში გამეფებულ განწყობას. ახალ პრეზიდენტად ბადრა გუმბაც რომ აირჩიონ, ის ვერ შეძლებს ისე მართოს სოხუმი, როგორც ასლან ბჟანია თვლიდა, რომ ყველა გადაწყვეტილების ერთპიროვნულად მიღებას შეძლებდა, მაშინაც კი, თუ სხვა არავინ მოიწონებდა მას. გუმბა ვერ შეძლებს საზოგადოებაში არაპოპულარული კანონპროექტების გატანას.
აფხაზეთში რეფორმები გარდაუვალია და მოსკოვმა ეს უნდა გაითვალისწინოს.”
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
