აფხაზეთში ოპოზიცია ასლან ბჟანიას იმპიჩმენტს ითხოვს
აფხაზეთის ოპოზიცია მოუწოდებს ასლან ბჟანიას ნებაყოფლობით გადადგეს თანამდებობიდან, ხოლო პარლამენტმა მიიღოს კანონი პრეზიდენტის იმპიჩმენტის შესახებ. ამაზე უდიდესი ოპოზიციური ორგანიზაციის აფხაზეთის კონფლიქტის ვეტერანთა კავშირის, ”არუაას” წევრებმა განაცხადეს.
ისინი აფხაზთა ლიდერის მიმართ უნდობლობას “შერყეული საგარეო პოლიტიკით”, “ენერგოსექტორში თაღლითობებით”, “კორონავირუსის პანდემიასთან ბრძოლის ცუდი ორგანიზებით” ხსნიან.
”ჩვენი საზოგადოება დაიღალა ხელისუფლების ცვლილებებით, რომლებიც ხდება არაკონსტიტუციური გზით. იმისათვის, რომ ჩვენი სახელმწიფოებრიობით არ გავრისკოთ და გადატრიალებების მანკიერი წრე მოვშალოთ, პარლამენტს ვურჩევთ მიიღოს კანონი პრეზიდენტის იმპიჩმენტის შესახებ ისე, რომ ხელისუფლების ძირეული შეცვლა მოხდეს სამართლებრივ ჩარჩოებში “, – თქვა ორგანიზაციის თავმჯდომარემ თემურ გულიამ.
- ”აფხაზეთის ნებისმიერ ლიდერს ორი პრობლემა აქვს: დახმარება უნდა ითხოვოს და ახსოვდეს, რომ ამისთვის გადახდა მოუწევს”
- მოსაზრება: რაზე შეთანხმდნენ ხელისუფლება და ოპოზიცია აფხაზეთში
- ქართულ-აფხაზური კონფლიქტი: გამოსავალი არ ჩანს, არც დიალოგის სურვილი. ხედვა სოხუმიდან
ამავე დროს, ”იმისათვის, რომ მთელი სახელმწიფო არ დადგეს რისკის ქვეშ”, გულიამ პრეზიდენტს ნებაყოფლობით გადადგომა, პარლამენტს კი – ახალი არჩევნების დანშვნა შესთავაზა.
”ეს ვაჟკაცური გადაწყვეტილება მხოლოდ გააუმჯობესებდა ჩვენს დამოკიდებულებას ასლან ბჟანიას მიმართ. და ის დარჩებოდა ქვეყნის ისტორიაში, როგორც ადამიანი, რომელმაც მშვიდობისა და სახელმწიფოს შენარჩუნების მიზნით, დათმო პრეზიდენტობა ”, – თქვა გულიამ.
ოპოზიციამ ცალკე აღნიშნა, რომ “არუაა” საქართველოსთან ნებისმიერი მოლაპარაკების კატეგორიული წინააღმდეგია, გარდა ჟენევის დისკუსიების უკვე არსებული ფორმატისა.
”როგორც დღეს ვხედავთ, ხელისუფლებას შეუძლია “არუაას” იგნორირება მოახდინოს, მაგრამ უმჯობესია მოისმინოს და პასუხი გასცეს. არავის სჭირდება ხელისუფლების ძალადობრივი შეცვლა და ჩვენ ეს არ გვინდა. მაგრამ არ არის საჭირო ხალხის გადატრიალებამდე მიყვანა. ახალი მთავრობა აცხადებს, რომ ის წინაზე უკეთესია. მაშინ გვიჩვენოს, რომ უკეთესია და ხალხს არ დაყოფს. არ არის საჭირო პოლიტიკური ოპონენტების დევნა ან ზეწოლა. ეს აუცილებლად გამოიწვევს დაძაბულობას ჩვენს საზოგადოებაში ”, – თქვა ფიოდორ საკანიამ, “არუაას” უმაღლესი საბჭოს წევრმა.
“არუაას” წარმომადგენლებმა პირობა დადეს, რომ უახლოეს მომავალში პრესკონფერენციას გამართავენ, რომელზეც წარმოადგენენ თავიანთ პოზიციას და შეკითხვებს უპასუხებენ.
პრეზიდენტ ბჟანიას გადადგომის მოთხოვნა “არუაას” ყრილობამ უკვე დააყენა 2021 წლის 11 მარტს. სხვა მიზეზებთან ერთად, მაშინ საქართველოსთან ”მრავალდონიანი” მოლაპარაკებების იდეა პრეზიდენტის ყველაზე დიდ შეცდომად დასახელდა.
