რატომ ცდილობს აფხაზეთის ხელისუფლება ოპოზიციის გარდაქმნას არასამთავრობო ორგანიზაციებად? მოსაზრება
აფხაზეთის ხელისუფლება ცდილობს ოპოზიციის გადაკეთებას არასამთავრობო ორგანიზაციებად
აფხაზეთის საგარეო საქმეთა მინისტრმა ინალ არძინბამ რუსეთის პირველი არხის ეთერში აფხაზეთზე არასამთავრობო ორგანიზაციების „დამღუპველ“ გავლენაზე ისაუბრა. მინისტრის სიტყვები სოხუმში პრეზიდენტის სასახლის წინ ოპოზიციის ბოლო აქციის კადრების ფონზე ისმოდა. აფხაზური ოპოზიცია ამან ძალიან აღშფოთა, მაგრამ რა დგას მინისტრის სიტყვების უკან და რატომ ცდილობს ხელისუფლება მისი პირით შეცვალოს ოპოზიციის მიმართ დამოკიდებულება?
გადაცემის რეჟისრომა ყველაფერი ასე წარმოადგინა: ნახეთ, სანამ ჩვენ უკრაინასთან ომში ვართ, ამ დასავლეთის აგენტებს, ჩვენს მეგობარ აფხაზეთში, პრეზიდენტის სასახლის შტურმი სურთ; ინალ არძინბა ამ კონტექსტში მოსკოვში დახმარებისთვის ჩასულ მესინჯერს ჰგავდა.
აფხაზურ ოპოზიციას არ მოსწონს ანტირუსულ ელემენტებად მათი წარმოჩენა და არასამთავრობო ორგანიზაციების აგენტებად გამოცხადება, ამ კადრებით კი სწორედ ასე გამოდიოდა.
ზოგადად, მათ იჩქარეს. რეალურად ოპოზიცია ამბობს: ჩვენ არა არასამთავრობო ორგანიზაცია, არამედ ოპოზიცია ვართ და ძალიან ლოიალურიც რუსეთის მიმართ.
- “ჩვენ არავის ვალი არ გვაქვს” – მოსაზრება აფხაზეთიდან
- „მეორე ფრონტის“ საფრთხე, ანტირუსული სანქციები და არარსებული რეფორმები – დისკუსია აფხაზეთში
- ახალი „კანონი ბინების შესახებ“ აფხაზეთში – რას ნიშნავს და რა საფრთხეებს შეიცავს
„ჩვენ ღიად ვეწინააღმდეგებით აფხაზეთის რესპუბლიკის ამჟამინდელი ხელისუფლების პოლიტიკას და მის ზოგიერთ – როგორც დარწმუნებულნი ვართ – დაუფიქრებელ და მავნე ინიციატივებს. მაგალითად, ჩვენ ვეწინააღმდეგებით აფხაზეთში ახალ საბინაო პოლიტიკას, კრიტიკული ენერგეტიკული ინფრასტრუქტურის პრივატიზაციას, საქართველოსთან ვაჭრობას და სხვ. რაც არ შეესაბამება აფხაზეთის მოსახლეობის გრძელვადიან ინტერესებს.
უფრო მეტიც, მიგვაჩნია, რომ მსგავსი ინიციატივების ხელშეწყობა მხოლოდ აფერხებს რუსეთის ფედერაციასა და აფხაზეთს შორის მეგობრულ, პარტნიორულ ურთიერთობებს. ჩვენ საჯაროდ დავუჭირეთ მხარი რუსეთის პრეზიდენტ ვლადიმირ პუტინს გასულ წელს გამართულ მიტინგზე“, – წერს ოპოზიციური ვეტერანთა ორგანიზაცია “არუაა” რუსეთის ელჩის, მიხაილ შურგალინისადმი მიმართვაში.
გასაოცარია ამ მიმართვის ავტორთა გულუბრყვილობის ხარისხი, რადგან რუსეთის ხელისუფლების აღქმაში არ არის განსხვავება არასამთავრობო ორგანიზაციებსა და ოპოზიციას შორის – ისინიც და სხვებიც უპირობო მტრები არიან.
აფხაზ ინალ არძინბას, “არუასგან” განსხვავებით, ეს ესმის. ამიტომ, ყოველ ჯერზე, როდესაც ის გამოჩნდება ცენტრალური რუსული არხების ეკრანებზე, მისი გამოსვლა აუცილებლად ეხება არასამთავრობო ორგანიზაციებს.
ის არ საუბრობს იმ პრობლემებზე, რაც დღეს რუსეთ-აფხაზურ ურთიერთობებშია, მაგრამ აქცენტს არასამთავრობო ორგანიზაციებზე აკეთებს. ბევრი თვლის, რომ ამ გზით მას სურს ასიამოვნოს კრემლს, სადაც ოდესღაც კარიერა დაიწყო, მაგრამ შემდეგ იმედი გაუცრუა უფროსებს და იძულებული გახდა სამსახური დაეტოვებინა.
ამ არგუმენტს აქვს არსებობის უფლება – ახალგაზრდა მინისტრი ძალიან ამბიციურია, მაგრამ არა მგონია, ეს იყოს მისი მთავარი მოტივი.
ინალ არძინბას რიტორიკა აფხაზეთის დღევანდელი ხელისუფლების მთავარი გზავნილია. პრეზიდენტ ასლან ბჟანიას ადმინისტრაცია გრანდიოზული ეკონომიკური პროექტების განხორციელების ზღვარზეა, რომელიც ასე აშინებს აფხაზურ საზოგადოებას. რადგან ბინების შესახებ კანონის მიღების მიღმა, რომელიც უცხოელებს უძრავი ქონების შეძენის უფლებას აძლევს, ან ენერგეტიკის ინდუსტრიის დენაციონალიზაციის განზრახვის მიღმა, რესპუბლიკის სუვერენიტეტის საფრთხე უსაფუძვლოდ არ ჩანს.
სწორედ ამ პროექტების არაპოპულარულობაა აფხაზურ საზოგადოებაში ერთადერთი მიზეზი იმისა, რის გამოც ისინი ჯერ კიდევ არ დაწყებულა. ხელისუფლება ცდილობს დაარწმუნოს საზოგადოება, რომ კრემლი პირადად არის დაინტერესებული ამ პროექტებით და არსებულ გეოპოლიტიკურ ვითარებაში, ამ ინიციატივების დაბლოკვა არამეგობრული ნაბიჯია მოკავშირის, აფხაზეთის უსაფრთხოების გარანტის მიმართ. ანუ ყველა, ვინც წინააღმდეგია, არის ანტირუსული ელემენტი, მათ შორის ოპოზიციაც.
თუმცა მოსკოვს ისტორიულად არ აქვს ალერგია სიტყვა „აფხაზური ოპოზიციის“ მიმართ, ვინაიდან მთელი ადგილობრივი პოლიტიკური ელიტა დიდი ხანია შესწავლილი ჰყავთ.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
