”აფხაზეთი შავი ხვრელი არ არის”. ყოფილი დიპლომატი, რომელიც თეატრს ჩაუდგა სათავეში

აფხაზეთში ყოფილი დიპლომატი თეატრს ჩაურგა სათავეში და წარმატება მოუტანა.

სპეციალისტი საგარეო პოლიტიკის, დემოკრატიული პოლიტიკური განვითარებისა და ეთნოპოლიტიკური კონფლიქტების მოგვარების საკითხებში. ექსპერტი, რომელიც ევროპისა და აშშ-ს მთავარ კვლევით ცენტრებში სიტყვით გამოსულა. მრავალი სამეცნიერო შრომის ავტორი – ასე იცნობენ აფხაზეთში ირაკლი ხინტბას, საგარეო საქმეთა მინისტრის ყოფილ მოადგილეს.

ამასთან, 2016 წლიდან მან საქმიანობის სფერო რადიკალურად შეიცვალა და ფაზილ ისკანდერის სახელობის  რუსული სახელმწიფო დრამატული თეატრის (შემოკლებით “რუსდრამი”) დირექტორად დაინიშნა. თეატრმა არასრულ  ხუთ წელიწადში ნახტომი გააკეთა, გახდა ყველაზე პოპულარული და წარმატებული და პრაქტიკულად აფხაზეთის კულტურის სფეროში ტექტონიკური ძვრები გამოიწვია.

JAMnews- თან ინტერვიუში ირაკლი ხინტბა საუბრობს იმაზე, თუ რამ აიძულა ასე რადიკალურად შეეცვალა საქმიანობის სფერო, თეატრის მიღწევებზე და როლზე, რომელიც აფხაზეთში კულტურას შეუძლია შეასრულოს.

რატომ დიპლომატიიდან თეატრში

ეს მოხდა იმიტომ, რომ სხვაგვარად არ შეიძლებოდა ყოფილიყო. ადამიანები მხოლოდ მაშინ არიან დაკავებულნი თეატრით, როდესაც სხვაგვარად არ შეუძლიათ. თეატრი ბავშვობიდან შემიყვარდა.

თვით თეატრის შენობის საიდუმლოებამ, სცენის სივრცის სიბნელემ, წარმოდგენის საიდუმლომ შემიპყრო. ყოველთვის ვგრძნობდი, რომ თეატრი შეიცავს პასუხებს ცხოვრების ყველაზე მნიშვნელოვან კითხვებზე. ეს არის საზოგადოების, ქვეყნის, მსოფლიოს მიკრომოდელი.

ასე რომ, ჩემს ცხოვრებაში ორი ვნება ყოველთვის თანაარსებობდა – თეატრი და პოლიტიკური მეცნიერება. ახლა საზოგადოება ჩემში არა ოფიციალურ პირს და პოლიტიკურ ექსპერტს, არამედ თეატრალურ მოღვაწეს, წარმატებულ კულტურის მენეჯერს ხედავს – და ჩემთვის ამ აღიარებას და სტატუსს უდიდესი მნიშვნელობა აქვს.

• კინო და პოპკორნის სუნი მოგენატრათ? ფოტორეპორტაჟი კინოთეატრ “ამირანიდან”, რომელიც ერთი წელია დაკეტილია
• ანტიკრიზისული სოფლის მეურნეობა: ორი ამბავი აფხაზეთიდან
• ტყვარჩელი – ქალაქი აფხაზეთში, რომელიც გადარჩენისთვის იბრძვის

დიპლომატიური გამოცდილება თეატრში უბრალოდ შეუცვლელია. თუ თეატრში არა, სად შეგიძლიათ გამოიყენოთ კონფლიქტების პრევენციისა და მოგვარების, მოლაპარაკებების და თანამშრომლობის, მიზნების დასახვისა და მიღწევის, ”გარე სამყაროსთან” მეგობრული კავშირების დამყარების, სტრატეგიისა და ტაქტიკის ოსტატურად შეერთების  უნარების ცოდნა?

ასე რომ, თეატრში ჩემი პროფესიით სრულად ვარ დაკავებული.

თეატრის წარმატების საიდუმლო სიყვარულია

რეცეპტი მარტივია ფორმით, მაგრამ რთული პრაქტიკული დანერგვის თვალსაზრისით. საჭიროა რამდენიმე კომპონენტის კომბინაცია: ეფექტური მენეჯმენტი, საგნის ღრმა ცოდნა, ფინანსური ცოდნა და მოწესრიგებულობა, თანამშრომლობისთვის გახსნილობა, გამბედაობა და თეატრისადმი უდიდესი სიყვარული.

თეატრი მოითხოვს სიყვარულს – სპექტაკლების, ხალხის, მაყურებლის, შენობის მიმართ. წინააღმდეგ შემთხვევაში, ის იღუპება, მასში დესტრუქციული ტენდენციები აუცილებლად იწყებს ზრდას.

პატიოსნება ყოველთვის მომგებიანია. თუ წარმატებული ხართ, ბევრს და გამჭვირვალედ იმუშავებთ, არ მოიპარავთ, არ გამოიყენებთ სახელმწიფო ქონებას პირადი ეგოისტური მიზნებისთვის, ეფექტურად დახარჯავთ ბიუჯეტს და გამომუშავებულ სახსრებს, მაშინ ნამდვილად გამოჩნდებიან მეცენატები და მეგობრები, რომლებიც სიამოვნებით დაგეხმარებიან, რადგან ეცოდინებათ, რომ მათი ფული გამოყენებული იქნება კარგი მიზნებისთვის. და არ წავა დირექტორის ჯიბეში.

მაყურებლებიც სალაროში ფულს მაშინ იხდიან, როდესაც იციან რომ არ ატყუებ. რეპუტაცია ძალზე მნიშვნელოვანია.

თეატრი ხელს შეუწყობს აფხაზეთის იზოლაციის დაძლევას

თეატრს შეუძლია კოლოსალური როლი შეასრულოს აფხაზეთის საერთაშორისო იზოლაციის დაძლევაში. ეს ჩვენი თეატრის მისიის მნიშვნელოვანი ნაწილია – აფხაზეთისთვის ხელსაყრელი იმიჯის შექმნა აფხაზეთში შექმნილი მაღალი თეატრალური ხელოვნების ნიმუშების დემონსტრირებით.

ასე ავცდებით ყველა საზღვარს, მათ შორის აღქმის საზღვრებს, დავარღვევთ უარყოფით სტერეოტიპებს ჩვენი ქვეყნის შესახებ. თუ ქვეყანას აქვს ამ დონის თეატრი, მაშინ აფხაზეთი “შავი ხვრელი” ან უიმედო პროექტი არ არის.

არსებობს კვლევები, რომლებიც აჩვენებს კორელაციას ხელოვნების პროგრესს და სოციალურ-ეკონომიკურ განვითარებას, საინვესტიციო მიმზიდველობის ზრდას შორის.

თეატრი გასტროლებზე ყველგან ვერ დადის

თეატრს გეგმავს გასტროლებს იმ ქვეყნებში, რომლებსაც ჯერ არ აქვთ აღიარებული აფხაზეთის დამოუკიდებლობა, მაგრამ არსებობს ობიექტური დაბრკოლებებიც, რადგან ჩვენს ბევრ ახალგაზრდა მსახიობს არ აქვს რუსეთის მოქალაქეობა, ამიტომ მათ არ შეუძლიათ მოგზაურობა სხვაგან, გარდა აფხაზეთისა და რუსეთისა. იმედი მაქვს, რომ ეს პრობლემა მალე მოგვარდება. ჩვენ რეგულარულად ვიღებთ მოწვევებს ევროპის ქვეყნებიდან და არა მხოლოდ იქედან.

ჯერ არ გვქონია პრობლემა იმასთან დაკავშირებით, რომ ჩვენი ქვეყნის სახელით ვერ გამოვიდეთ, მაგრამ, რა თქმა უნდა, ასეთი უსიამოვნო ინციდენტები ჩემთვის კარგად არის ცნობილი.

ეს ყველაფერი არის აფხაზეთის იზოლირების მცდარი პოლიტიკა, რომელსაც შეუძლია გამოიწვიოს ყველაფერი, ნდობის განმტკიცებისა და კონფლიქტური წინააღმდეგობების მოგვარების გარდა. ეს ყველასთვის ცუდი იქნება. ამიტომ საჭიროა მივაღწიოთ იმას, რომ არაპოლიტიკურ სფეროებში ურთიერთობებისთვის ხელოვნური დაბრკოლებები დაუშვებელი იყოს.

აფხაზეთს “რბილი ძალა” სჭირდება

როდესაც ვსაუბრობთ “რბილ ძალაზე”, პირველ რიგში უნდა გავითვალისწინოთ აფხაზეთის მიმზიდველობა, გარესამყაროზე მისი არაძალადობრივი და არაეკონომიკური გავლენა ქვეყნის საერთაშორისო იმიჯის გასაუმჯობესებლად.

სამწუხაროდ, ამ მიმართულებით კიდევ ბევრია გასაკეთებელი. ჩვენ გვაქვს მიმზიდველობის ობიექტური ფაქტორები – ვთქვათ, ბუნება, ზღვა და მთები, მაგრამ, ბოლოს და ბოლოს, აფხაზეთი არა მხოლოდ მატერიალური სივრცეა, არამედ მეტაფიზიკური, აზრობრივი, ღირებულებითი.

ჩვენ გვაქვს მდიდარი ისტორია, უნიკალური ენა და გამორჩეული კულტურა – ეს ყველაფერი “რბილი ძალის” ინსტრუმენტად უნდა იქცეს. ეს არის დიდი სამუშაო, რომელიც მოითხოვს პროფესიულ უნარებსა და თანამედროვე კრეატიულობას.

ამ გაგებით, თეატრი დღეს მოქმედებს როგორც უმნიშვნელოვანესი კულტურული ინსტრუმენტი გაუგებრობის, ნეგატიური სტერეოტიპების, ინფორმაციის სტიგმატიზაციის კედლების გასარღვევად.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო