აფხაზეთი: ელექტროენერგიის და ნდობის დეფიციტი
აფხაზეთში დენს ისევ თიშავენ. მიუხედავად იმისა, რომ ავარიები მაღალი ძაბვის ხაზებზე აღმოიფხვრა, მოსახლეობას დენის ისევ გრაფიკით მიეწოდება. ხალხი ენერგეტიკოსების ოფიციალურ განმარტებებს სულ უფრო ნაკლებად ენდობა. ენგურჰესზე სარემონტო სამუშაოების გამო, ელექტროენერგია აფხაზეთს კვლავ რუსეთიდან მიეწოდება, თუმცა შეზღუდული რაოდენობით.
მეორე კვირაა, რაც აფხაზეთში ელექტროენერგიის გათიშვის მკაცრი გრაფიკი მოქმედებს – სამ საათში ერთხელ დენი ერთი საათის განმავლობაში ითიშება. მოსახლეობა რთულ ვითარებაში აღმოჩნდა, რადგან სახლებში ბუნებრივი აირი არ არის და იშვიათია ვინმეს თხევადი გაზის ბალონი ჰქონდეს. ანუ, მოსახლეობის მთელი ყოფა ელექტროენერგიაზეა დამოკიდებული.
გრაფიკი ოფიციალურად 6 აპრილს შემოიღეს, გიაჩრიფის და კავკასიონის მაღალი ძაბვის ხაზებზე მომხდარი ავარიების გამო. თუმცა, ავარიის ლიკვიდაციის შემდეგ, ელექტროენერგიის გათიშვები მთელ აფხაზეთში არ შეწყვეტილა, რამაც ენერგოკომპანია “ჩერნომორენერგოს” მიმართ დიდი უკმაყოფილება გამოიწვია.
- რატომ გახდა აფხაზეთი “კრიპტოვალუტის სამოთხე”
- უშუქობა. ამბები აფხაზეთიდან
- მოსაზრება: აფხაზეთს ენერგოსისტემის რუსეთისთვის გადაცემა ან უშუქოდ ცხოვრება მოუწევს
ბევრი მოქალაქე ენერგეტიკოსებს არ ენდობა და მიიჩნევს, რომ უშუქობის რეალური მიზეზი ავარია სულაც არ არის.
აფხაზეთის ენერგოსისტემაში მაღალი ძაბვის ხაზებზე ავარიის შედეგად დაახლოებით 100 მეგავატის ელექტროენერგიის დეფიციტი შეიქმნა. ეს ინფორმაცია “ჩერნომორენერგოს” ოფიციალურ ვებგვერდზე დაიდო და კომპანიის ხელმძღვანელობამ მთელ აფხაზეთში შეზღუდვების დაუყოვნებლივ შემოღება გადაწყვიტა.
მიუხედავად იმისა, რომ აფხაზეთის მაცხოვრებლებისთვის ეს სიტუაცია უკვე ნაცნობია, სოციალურ ქსელებში ბევრი მათგანი აღშფოთებას გამოხატავს. ზოგი იმას წერს, რომ ენერგეტიკის სექტორის ხელმძღვანელობა “ისევ იტყუება”, ვიღაც – რომ მიზეზი კრიპტოვალუტის მომპოვებელი ურიცხვი “ფერმებია” და ელექტროენერგიის დეფიციტის მიზეზი სწორედ ესაა.
აუწყა რა მოსახლეობას ავარიის ლიკვიდაციის შესახებ, “ჩერნომორნერგომ” მაშინვე განაცხადა, რომ 8 აპრილიდან რუსულმა მხარემ აფხაზეთისთვის ელექტროენერგიის მიწოდების ლიმიტი შემოიღო დღეში 7 მილიონი კვტ-საათის ოდენობით, ხოლო აფხაზეთის უწყვეტ მომარაგებას 9.6 მილიონი კვტ. სჭორდება.
ამჟამად აფხაზეთი ელექტროენერგიით რუსეთიდან მარაგდება, რადგან ენგურჰესი ჯერჯერობით სარემონტო სამუშაოების გამო გაჩერებულია.
რეაქცია
“რა თქმა უნდა, “ჩერნომორენერგოსი” არ გვჯერა, ხან ავარია აქვთ, ხან კატა ტრანსფორმატორში … დღეს თითქმის 5 საათი ვისხედით უშუქოდ, ალბათ ისევ კატის გამო”, – წერს სოხუმის მკვიდრი ელენა ბუიაკოვა.
”ჩვენი ენერგეტიკოსები რუს ფეხბურთელებს მაგონებენ. მათში იმდენ ინვესტიციას დებენ, მაგრამ უშედეგოდ ”, – წერს ლოლა რატია.
ენერგეტიკოსების ყველა ოფიციალური ცნობა უფრო მეტ კითხვას ბადებს, ვიდრე მათ პასუხობს. მაგალითად, ლიმიტი 7 მილიონი კვტ ოდენობით რუსულმა მხარემ მხოლოდ 8 აპრილს შემოიღო, თუ ის ყოველთვის იყო, მაგრამ აფხაზეთი მანამდე მას არ გაცდენია? და თუ ასეა, რა არის მოხმარების მკვეთრი ზრდის მიზეზი? და რაც მთავარია, როდემდე გაგრძელდება გამორთვები?
სანამ ინტერნეტში დისკუსიები გრძელდება, შეზღუდვების მოხსნის საკითხი ღიად რჩება და გაუგებარია, რატომ ხდება ელექტროენერგიის დაზოგვა გათიშვების და არა უკანონო კრიპტომეურნეობების უფრო აქტიური გამორთვის გზით.
სარჩელი ენერგეტიკოსების წინააღმდეგ
11 აპრილის ცნობილი გახდა, რომ აფხაზეთის მომხმარებელთა უფლებების დაცვის საზოგადოება ამზადებს სარჩელს “ჩერნომორენერგოს” წინააღმდეგ. საზოგადოების ხელმძღვანელმა, ელენა გვარამიამ, ტელეგრამ-არხ RESPUBLICA- სთან ინტერვიუში განაცხადა, რომ ელექტროენერგიის მუდმივი გათიშვების გამო, სახლებში და საწარმოებში ტექნიკა მწყობრიდან გამოდის და მომხმარებლები აპირებენ სახელმწიფო კომპანიისგან მიყენებული ზიანის კომპენსაცია მოითხოვონ.
”პირველი კატეგორიის მომჩივანები ჩვეულებრივი მოქალაქეები არიან, რომელთა საყოფაცხოვრებო ტექნიკა – მიკროტალღური ღუმელები, სარეცხი მანქანები, მაცივრები, მწყობრიდან გამოვიდა. ბევრი ოჯახისთვის ახალი ტექნიკის შეძენა პრობლემაა. ზოგი მაცივრის ფულს თვეების განმავლობაში აგროვებს. ჩვენი ხელფასითა და პენსიით დამწვარი ნათურების შეცვლაც კი ძვირი ჯდება.
მეორე კატეგორიის ადამიანები, რომლებიც მოგვმართავენ, ინდივიდუალური მეწარმეები არიან. კერძოდ, ბაზრის თანამშრომლები. იქ ცუდი მდგომარეობაა, ზოგიერთს აქვს დიდი სამაცივრე დანადგარები პროდუქტების ღრმად გაყინვისთვის, რომლებიც მწყობრიდან გამოვიდა, რემონტი კი ძალიან ძვირი ჯდება. ვინ უნდა აგოს ამაზე პასუხი? ასეთ შემთხვევებში ხომ გარანტია არ მოქმედებს”, – ამბობს გვარამია.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
