საქართველოში ფსიქოლოგთან ვიზიტის კულტურა მხოლოდ ახლა იკიდებს ფეხს. ამ პროფესიის შესახებ მითი უფრო მეტია, ვიდრე სინამდვილე. რატომ არ დადიან საქართველოში ფსიქოლოგთან – 8 მიზეზი:
მითი 1 : ფსიქოლოგი მორალს წამიკითხავს
ერთ ჩემს ახლობელს ცოლიან მამაკაცთან დაშორების შემდეგ მძიმე დეპრესია ჰქონდა. როდესაც ფსიქოლოგთან მისვლა ვურჩიე, მკაცრი უარი მითხრა, _ ფსიქოლოგი მორალს წამიკითხავს და საერთოდაც, “მრცხვენია, ამ ამბის უცხო ადამიანისთვის მოყოლა.
თუ ფსიქოლოგი ნამდვილი პროფესიონალია, მისგან ვერასდროს გაიგებთ სიტყვებს, _ “ოჰ, ეს როგორ ჩაიდინე! და, რასაკვირველია, არც მორალს წაგიკითხავთ. ფსიქოთერაპიის ამოცანა სულ სხვაა: იმის კვლევა,თუ როგორ აღმოჩნდით თქვენ ამათუიმ სიტუაციაში, ასევე _ რა გჭირდებათ მისგან თავის დასაღწევად.
მითი 2: სეანსებს მივეჩვევი
“ფსიქოთერაპიას ეჩვევიან, როგორც _ ნარკოტიკს, და მერე დამოუკიდებლად ვერაფერს წყვეტენ, _ ასეთი არგუმენტიც მომისმენია.
არადა, ყველაფერი პირიქითაა. ეფექტური ფსიქოთერაპიის ერთ-ერთი მთავარი მიზანი ადამიანის სწორედ იმაში დარწმუნებაა, რომ მას შესწევს პრობლემების დამოუკიდებლად გადაჭრის უნარი.
მითი 3: ადამიანებთან ურთიერთობას გადავეჩვევი
“ფსიქოტერაპევტთან ვიზიტების შემდეგ ადამიანები გარშემომყოფებთან ურთიერთობების გარკვევას იწყებენ და აუტანლები ხდებიან, _ ესეც კიდევ ერთი მითი.
არადა, ფსიქოთერაპიის ერთ-ერთი მიზანია, ასწავლოს ადამიანს საკუთარი სურვილების გაცნობიერება, გაგება და ამ სურვილების გარშემომყოფებისთვის ისე მიწოდება, რომ ეს მათთან კონფლიქტის მიზეზი არ გახდეს.
შესაძლოა, ფსიქოთერაპევტთან ვიზიტისას ერთი არასასიამოვნო აღმოჩენა გააკეთოთ _ გააცნობიეროთ, რომ ზოგიერთ ადამიანთან ვერ მოიპალარაკებთ, ვერ გამოძებნით საერთო ენას და ვერ დაამყარებთ კომფორტულ ურთიერთობას. თუმცა, ასეთი ადამიანები იმისდა მიუხედავად იარსებენ, მიხვალ თქვენ ფსიქოლოგთან თუ არა.
მითი 4: ცხოვრება რადიკალურად შეიცვლება
“ფსიქოლოგთან ურთიერთობის შემდეგ ადამიანები რადიკალურად ცვლიან ცხოვრებას _ მიდიან სამსახურიდან, საცხოვრებლად სხვა ქვეყანაში გადადიან, მეუღლეს ეყრებიან, – მეუბნება ერთი ჩემი ნაცნობი, რომელიც მუდმივად თავის რუტინულ ცხოვრებაზე წუწუნებს, მაგრამ არაფერს აკეთებს მის შესაცვლელად. დიახ, ეს ყველაფერი ხდება, თუმცა არც ისე ხშირად.
ფსიქოლოგთან მუშაობა ძალიან ბევრ ქვეცნობიერ სურვილს, გრძნობას ზედაპირზე ამოატივტივებს. ამ გრძნობების გავლენით, ადამიანებს ხშირად უჩნდებათ სურვილი, რაიმე რადიკალურად შეცვალონ, განსაკუთრებით _ იმ სფეროებში, სადაც ყველაზე მეტად არაკომფორტულად გრძნობენ თავს.
თუმცა, ფსიქოლოგთან ვიზიტი აპრიორი გაქცევისა და მკვეთრი ქმედებებისკენ ნამდვილად არ გიბიძგებთ. შესაძლოა, პირიქითაც იყოს – შეიძლება მანამდე გეგონოთ, რომ თქვენი ადგილი თქვენს ოჯახში, ქვეყანაში არ არის და იმისთვის, რომ კარგად იყოთ, სადმე უნდა გაიქცეთ; ფსიქოლოგთან ვიზიტის შემდეგ კი დარწმუნდეთ, რომ ეს გამოსავალი არ არის, რომ ბედნიერება აქვეა, თქვენ კი მას ხელს ჰკრავთ და, სხვადახვა მიზეზის გამო, ვერ ხედავთ.
მითი 5: ფსიქოლოგთან ვიზიტი სისუსტის ნიშანია
“არც ისეთი სუსტი ვარ, რომ ფსიქოლოგის დახმარება მჭირდებოდეს. ჩემს ცხოვრებაში არაფერი ხდება ისეთი, რომ თავად ვერ მოვაგვარო, – თქვენც გსმენიათ ალბათ ასეთი არგუმენტი. ეს მითია. სიმართლე კი ისაა, რომ ფსიქოლოგთან სწორედ მამაცი ადამიანი მიდის – ის, ვისაც ეყო გამბედაობა, ეღიარებინა, რომ პრობლემა აქვს. ასეთი ნაბიჯის გადადგმა არც ისე მარტივია; მით უმეტეს – ჩვენს საზოგადოებაში, სადაც ყველა წარმატებისა და კეთილდღეობის დემონსტრირებას ცდილობს და ზოგჯერ საკუთარ თავსაც არ უტყდებიან, რომ პრობლემები აქვთ. ასე რომ, ადამიანი, რომელიც ფსიქოლოგთან მივიდა, სუსტი ნამდვილად არ არის, უფრო – პირიქით.
მითი 6: “გიჟი არ ვარ
ადამიანებს, რომლებსაც ფსიქიკასთან დაკავშირებული პრობლემები აქვთ, ფსიქიატრს აკითხავენ. ფსიქოლოგი და ფსიქოთერაპევტი კი ჯანმრთელ ადამიანებთან მუშაობს, რომლებსაც ესათუის სირთულე ან პრობლემა შეხვდათ ცხოვრებაში.
მითი 7: ფსიქოლოგთან ის დადის, ვისაც მეგობრები არ ჰყავს
მეგობრებისთვის პრობლემის გაზიარება _ რატომაც არა, მაგრამ მეგობარი არ არის პროფესიონალი. თუ თქვენი მიზანია პრობლემის რეალურად გადაწყვეტა და არა უბრალოდ “გულის გადაშლა, მაშინ სპეციალისტის დახმარებას ვერანაირი მეგობრებთან საუბარი ვერ შეცვლის.
თანაც, მეგობრებმა შეიძლება მწარე სიმართლე დაგიმალონ, რომ გული არ გატკინონ. ფსიქოთერაპია კი ყოველთვის კომფორტული არ არის. ხშირად ფსიქოლოგს ისეთი რამის თქმა უწევს, რაც არ მოგეწონებათ.
მითი 8: “სხვა ადამიანი გავხდები
“ფსიქოლოგი ისეთ გავლენას მოახდენს ჩემზე, რომ მე აღარ ვიქნები მე.
იცოდეთ, რომ კარგი სპეციალისტები არასდროს მიმართავენ მანიპულაციურ ტექნიკას, ამიტომ უნებისყოფო მარიონეტად ქცევა არ გემუქრებათ.
