ნიდერლანდებმა უკრაინაში ჩამოგდებული მალაიზიური ბოინგის საქმეზე სასამართლო პროცესი დაიწყო
სჰიფჰოლის სასამართლო კომპლექსში, ამსტერდამის აეროპორტის მახლობლად, დაიწყო პირველი სასამართლო მოსმენები უკრაინაში 2014 წლის 17 ივლისს МН17 რეისის თვითმფრინავის ჩამოგდების საქმეზე. ამ კატასტროფის დროს 298 ადამიანი დაიღუპა, მათ შორის უმრავლესობა ნიდერლანდების მოქალაქე იყო.
უკრაინული ტელეკომპანიის ჰრომადსკოეს ცნობით, სასამართლო პროცესი სამ მოსამართლეს მიჰყავს. პროცესზე ბრალდებულნი სამი რუსეთის მოქალაქე და ერთი უკრაინელი არიან, რომლებსაც საერთაშორისო საგამოძიებო ჯგუფი ბრალს დებს “ბუკი”-ს ტიპის საზენიტო სარაკეტო სისტემის რუსეთიდან უკრაინაში შემოტანაში, რომელმაც თვითმფრინავი ჩამოაგდო, ასევე უკან რუსეთში მის ტრანსპორტირებაში:
- იგორ გირკინ-სტრეკლკოვი, „დონეცკის სახალხო რესპუბლიკის” მაშინდელი თავდაცვის მინისტრი“
- სერგეი ”ხმური” დუბინსკი, იმყოფებოდა სტრელკოვის დაქვემდებარებაში, ხელმძღვანელობდა ადგილობრივი პრორუსული ძალების ე.წ. სამხედრო დაზვერვას;
- ოლეგ პულატოვი (მეტსახელები “გიურზა” და “ხალიფა”), იმყოფებოდა დუბინსკის დაქვემდებარებაში, ხელმძღვანელობდა “დონეცკის სახალხო რესპუბლიკის” სამხედრო დაზვერვის განყოფილებას.
- უკრაინის მოქალაქე ლეონიდ ხარჩენკო (მეტსახელი “თხუნელა”), ხელმძღვანელობდა “დონეცკის რესპუბლიკს” ერთ-ერთ სადაზვერვო დანაყოფს და პულატოვთან ერთად “ბუკის” გადაადგილებას უზრუნველყოფდა.
არცერთი ბრალდებული პროცესზე არ იმყოფება. ყველა მათგანზე საერთაშორისო ძებნაა გამოცხადებული. თუმცა, როგორც რუსული ნოვაია გაზეტა წერს, ამ პროცესზე მათ ინტერესებს რუსი და ჰოლანდიელი იურისტები წარმოადგენენ.
”(ამ საქმეში) ორი ბრალდებაა. პირველი არის ყველა ადამიანის მკვლელობა MH17-ის ბორტზე. მეორე არის ქმედებების განხორციელება, რამაც თვითმფრინავის კატასტროფა გამოიწვია. თუ სასამართლო ბრალდებას დაადასტურებს, მან უნდა დაადგინოს ასევე, ვინ მიიღო ამაში მონაწილეობა ”, – განუცხადა ჟურნალისტებს მოსამართლე-სპიკერმა მარია კნეიფმა.
თავდაპირველად სასამართლო წინასწარი მოსმენების რეჟიმში იმუშავებს. რამდენ ხანს გაგრძელდება პროცესი, ჯერ არ არის ცნობილი. სავარაუდოდ, ის ექვს თვემდე გასტანს.
მოსმენების დასაწყისში მოსამართლე ჰენდრიკ სტეინჰაუსმა განაცხადა, რომ სასამართლომ კატასტროფის შედეგად დაღუპულთა ახლობლებისგან 84 განცხადება მიიღო ფინანსური კომპენსაციის შესახებ.
• დაასახელეს ის ადამიანები, რომლებიც უკრაინის თავზე „ბოინგის“ ჩამოგდებაში არიან ეჭვმიტანილნი
• მოსაზრება: ორი სამშობლო. რა განსხვავებაა რუსეთსა და უკრაინას შორის
МН17-ის კატასტროფა
2014 წლის 17 ივლისს Boeing 777 ტიპის სამგზავრო თვითმფრინავი რეისს ამსტერდამის აეროპორტიდან მალაიზიაში, ქალაქ კუალა ლუმპურში ასრულებდა.
აფრენიდან რამდენიმე საათში თვითმფრინავმა დისპეჩერებთან კავშირი დაკარგა, ეს მოხდა რუსეთ-უკრაინის საზღვრიდან 50 კილომეტრში. თვითმფრინავი დონეცკის რეგიონში ჩამოვარდა, იმ ტერიტორიაზე, რომელსაც “დონეცკის რესპუბლიკის” მებრძოლები აკონტროლებდნენ.
2015 წლის ოქტომბერში, ნიდერლანდების უშიშროების საბჭომ დარწმუნებით განაცხადა, რომ თვითმფრინავი რუსული Buk-ის ტიპის რაკეტით ჩამოაგდეს, რის შედეგადაც ის ჰაერშივე დაიშალა.
2018 წლის მაისში საერთაშორისო საგამოძიებო ჯგუფმა (JIT) განაცხადა, რომ დარწმუნებულია, რომ “ბუკის” სარაკეტო სისტემა რუსეთის 53-ე საზენიტო სარაკეტო ბრიგადას ეკუთვნოდა. მაშინ წარმოადგინეს ამის მტკიცებულებები, ასევე სარაკეტო სისტემის რუსეთიდან აღმოსავლეთ უკრაინაში გადაადგილების ნაბიჯ-ნაბიჯ აღდგენილი მარშრუტი.
რუსეთი კატასტროფასთან კავშირს კატეგორიულად უარყოფს.
