შერიგდნენ თუ არა აფხაზეთის ოპოზიცია და რუსეთის საელჩო
რუსეთის საელჩო აფხაზეთში
აფხაზეთში ოპოზიციის ლიდერი ადგურ არძინბა შეშფოთებულია იმის გამო, რომ აფხაზური სანომრე ნიშნებით მანქანებს რუსეთის საზღვარზე ხანგრძლივი დაყოვნების მერე უშვებენ. არძინბამ თხოვნით მიმართა რუსეთის ელჩს, რაზეც მან (თითქმის ერთი თვის შემდეგ) უპასუხა, რომ „წარმოდგენილი ინფორმაცია იქნება გათვალისწინებული“.
უცნობია, რა გავლენას მოახდენს ეს პრობლემის გადაწყვეტაზე, მაგრამ შესაძლოა ეს მიუთითებს ელჩისა და ოპოზიციის შერიგებაზე, რომელსაც საელჩომ ცოტა ხნის წინ „მარგინალი“ უწოდა.
- Bellingcat: სატელიტური ფოტოები ადასტურებს, რომ აფხაზეთში რუსეთი საზღვაო ბაზას დაჩქარებული ტემპით აშენებს
- რატომ არის აფხაზეთისთვის რუსული ინვესტიციების შესახებ შეთანხმება კატასტროფა? | ახრა არისტავა
ამ დრომდე რუსეთის საზღვარზე ხანგრძლივი რიგებია სატრანსპორტო საშუალების რეგისტრაციის ბარათების დამუშავების გამო, რომლებიც მონაცემთა ბაზაში ხელით არის შეტანილი.
ამავდროულად, რუსული სანომრე ნიშნების მქონე მანქანებს ეთმობა ცალკე ზონა, რის გამოც ისინი საზღვარს განსაკუთრებული შეფერხების გარეშე კვეთენ.
ივლისის დასაწყისში აფხაზეთის სახალხო მოძრაობის ლიდერმა ადგურ არძინბამ წერილი გაუგზავნა აფხაზეთში რუსეთის ელჩს, მიხეილ შურგალინს და პრობლემის მოგვარება სთხოვა.
ივლისის ბოლოს რუსეთის საელჩო მის მიმართვას ოფიციალურად გამოეხმაურა.
„გაცნობებთ, რომ თქვენი მიმართვა აფხაზეთის რესპუბლიკის მოქალაქეების მიერ რუსეთის ფედერაციის სახელმწიფო საზღვრის ადლერის საერთაშორისო გამშვები პუნქტით გადაკვეთის საკითხთან დაკავშირებით გათვალისწინებულ იქნა.
მასში მოცემული ინფორმაცია გათვალისწინებული იქნება შემდგომი მუშაობისას“, – ნათქვამია საელჩოს წერილში.
ეს ფორმალური პასუხი აშკარად არ არის ის, რისი იმედიც არძინბას ჰქონდა.
მიუხედავად იმისა, რომ წერილის ბოლოს საელჩომ დასძინა, რომ „აღნიშნავს მის პირად ინტერესს ორმხრივი რუსეთ-აფხაზური მოკავშირე ურთიერთობების გარკვეული ასპექტებით“.
სურვილის შემთხვევაში, ეს შეიძლება აღიქმებოდეს, როგორც რუსეთის ელჩისა და აფხაზური ოპოზიციის შერიგების ნიშანი, რომელიც რუსეთის დამოუკიდებლობის დღეზე შეიქმნა.
დღესასწაულის საპატივცემულოდ სოხუმში რუსეთის საელჩოში მიღება გაიმართა, რომელზეც ოპოზიციის არც ერთი წარმომადგენელი არ იყო მიწვეული.
როდესაც ოპოზიციურმა ტელეგრამის არხებმა ამაზე გაამახვილეს ყურადღება, მიხაილ შურგალინმა თქვა, რომ: ა) მოწვეულნი იყვნენ პოლიტიკური ორგანიზაციების წარმომადგენლები აფხაზეთში მათი მნიშვნელობიდან გამომდინარე და ბ) მხოლოდ პარლამენტში წარმოდგენილნი შეიძლება ჩაითვალონ ასეთებად, ”და დანარჩენი ყველა არის მარგინალური.”
ეს არგუმენტი არა მხოლოდ შეურაცხმყოფელი, არამედ არადამაჯერებელიც იყო, რადგან აფხაზეთის პარლამენტი არჩეულია ექსკლუზიურად მაჟორიტარული სისტემით და მასში პარტიები, როგორც ასეთი, საერთოდ არ არიან წარმოდგენილი.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
