„კანონის უზენაესობა და არაქურდული ოფისი“ - აფხაზური პასპორტი სოჭელი ბიზნესმენისთვის
კრიმინალური ავტორიტეტი თათულიანი აფხაზეთში
გავლენიანი სოჭელი ბიზნესმენი რუბენ ტატულიანი, რომელიც კრიმინალური წრეების წევრად ითვლება, აფხაზეთში გახმაურებული სკანდალის ცენტრშია. მან შეურაცხმყოფელი კომენტარი გააკეთა პროკურატურისადმი ოპოზიციის მოთხოვნაზე, 7 ათასი ადამიანის, მათ შორის ტატულიანისთვის აფხაზური პასპორტების გაცემის კანონიერების გარკვევის მოთხოვნით.
აფხაზეთის კანონი მოსახლეობას ორ კატეგორიად ყოფს – ეთნიკურ აფხაზს მსოფლიოს ნებისმიერი კუთხიდან შეუძლია მოქალაქეობა მიიღოს ავტომატურად, მაგრამ ყველა სხვა ეროვნების ადამიანებისთვის ბევრი შეზღუდვაა. ორმაგი მოქალაქეობა დასაშვებია მხოლოდ რუსეთთან, ხოლო განმცხადებელმა მრავალი დოკუმენტის წარდგენით უნდა დაამტკიცოს, რომ ის აფხაზეთის ტერიტორიაზე იმყოფებოდა 1994 წლიდან 1999 წლამდე. გამონაკლისის დაშვება შეუძლია მხოლოდ პრეზიდენტს.
კრიმინალური ავტორიტეტი თათულიანი აფხაზეთში
2020 წლიდან 2022 წლამდე არააფხაზი ეროვნების პირებზე აფხაზეთის მოქალაქის 6693 პასპორტი გაიცა. აქედან 1526 ეთნიკური რუსი, 1102 ქართველი, 3061 სომეხი და 1004 სხვა ეროვნებაა.
აფხაზეთის სახალხო მოძრაობამ ამ ინფორმაციის მიღების შემდეგ გაგზავნა მოთხოვნა პასპორტების გაცემის კანონიერების შესწავლის მოთხოვნით. მოთხოვნას მოძრაობის ლიდერმა, ადგურ არძინბამ მოაწერა ხელი.
„ამ დიდ რაოდენობას შორის არის გვარები, რომლებმაც გარკვეული კითხვები გააჩინა. მაგალითად, ამ სიაში არიან ცნობილი ადამიანები, ისეთი როგორიცაა რუბენ ტატულიანი. მან აფხაზეთის მოქალაქის პასპორტი 2020 წლის 1 დეკემბერს მიიღო, მაგრამ ის აქ არ დაბადებულა. ჩვენ გვინდა, რომ პროკურატურამ ყურადღება მიაქციოს ამას.
ამ სიაში კიდევ არის ბატონი ალექსანდრე მირელი (მირილაშვილი), რომელიც აფხაზეთის პრეზიდენტის თანაშემწე იყო. მაშინ გაჩნდა ინფორმაცია, რომ ის მოსკოვში ქართული დიასპორის წევრიც იყო. თუმცა მოგვიანებით პრეზიდენტის ადმინისტრაციამ ეს ინფორმაცია უარყო.
ამ სიაში უამრავი ასეთი გვარია. 2 ათასზე მეტი ადამიანია, ვინც აფხაზეთში არ დაბადებულა. ესენი არიან სხვადასხვა დონის ბიზნესმენები, რომლებმაც მოქალაქეობა არაკეთილსინდისიერი გზებით მიიღო. თუ მათ პრეზიდენტის ბრძანებულებით მიიღეს მოქალაქეობა, მაშინ პროკურატურას აქვს ლეგიტიმური საფუძველი, გაარკვიოს, რა განსაკუთრებული დამსახურებები აქვთ ამ ადამიანებს აფხაზეთის რესპუბლიკის წინაშე.“ – განაცხადა ადგურ არძინბამ.
- „სირცხვილია იყო დაზარალებული“: წამების ისტორიები აფხაზეთიდან
- ვის აქვს აფხაზეთში იარაღის ტარების უფლება და როგორ უკავშირდება ეს კრიმინალის ზრდას?
- ცხინვალი: რომელი პრეზიდენტია ჩართული გახმაურებულ მკვლელობაში?
ტატულიანი აშშ-ს სახაზინო სიაშია, როგორც კანონიერი ქურდების ფინანსური მხარდამჭერი
2017 წლიდან ტატულიანი აშშ-ს ფინანსთა სამინისტროს სიაშია შეყვანილი, როგორც კრიმინალური ჯგუფის წევრი, რომლებიც კანონიერ ქურდებს მატერიალურ დახმარებას უწევენ.
დოკუმენტში ნათქვამია:
„2010 წელს ტატულიანი დაინიშნა სოჭში კანონიერი ქურდების ე.წ. ოპერაციების ზედამხედველად. 2015 წელს ტატულიანი სოჭში კანონიერი ქურდების შეკრებაზე ზახარ კალაშოვთან ერთად დააკავეს. ეს იყო კანონიერი ქურდების შეკრებაზე ტატულიანის დაკავების მინიმუმ მეორე შემთხვევა. გარდა ამისა, ტატულიანი არაერთხელ დაეხმარა კანონიერ ქურდებს, რომლებსაც სამართლებრივი პრობლემები შეექმნათ.
სპა სასტუმრო “ვესნა” სანქციების სიაშია, რადგან ის რუბენ ტატულიანს ეკუთვნის. ბიზნესმენი ასევე სრულად ფლობს კომპანია Novy Vek-Media-ს და აღნიშნული კომპანიაც ასევე შედის სანქციების სიაში“.
ტატულიანს, რუსეთისა და აფხაზეთის გარდა, სომხეთის მოქალაქეობაც აქვს. მან საკუთარ თავს არაერთხელ საჯაროდ უწოდა სომხეთის საგარეო საქმეთა ყოფილი მინისტრის, ედვარდ ნალბანდიანის თანაშემწე.
2017 წელს ტატულიანი დააკავეს ჩეხეთის რესპუბლიკაში კრიმინალური ავტორიტეტების შეკრებაზე, თუმცა, მისი დაპატიმრება ვერ მოხერხდა, რადგან ტატულიანს თან ჰქონდა სომხეთის დიპლომატიური პასპორტი.
ცნობილმა სომხურმა საგამოძიებო პორტალმა Hetq-მა ამ საკითხთან დაკავშირებით სომხეთის საგარეო საქმეთა სამინისტროს მიმართვა გაუგზავნა. იქიდან მოვიდა პასუხი, სადაც ნათქვამია, რომ ტატულიანზე უწყებას დიპლომატიური პასპორტი აქვს გაცემული „ქვეყნის ეკონომიკური განვითარებისა და ახალი ინვესტიციების მოზიდვისკენ მიმართული აქტიური მუშაობისთვის“.
შამპუნი “Head & Shoulders” აფხაზი ოპოზიციონერისთვის
ოპოზიციის მოთხოვნას აფხაზურ პასპორტთან დაკავშირებით ბიზნესმენი უკიდურესად მკაცრად გამოეხმაურა.
„გაუგებარია აფხაზი ოპოზიციონერის „ორსახოვანი დამოკიდებულება“, რომელიც ჩემდამი პატივისცემას გამოხატავს ხოლმე პირადი შეხვედრების დროს. თამამად შემიძლია შემდეგი დასკვნის გამოტანა – ადგურ არძინბას არ აქვს საკმარისი გონებრივი მონაცემები, რომ პირდაპირ დამისვას მისთვის საინტერესო კითხვები. ეს ადამიანი რეგულარულად ყვება ტყუილებს და აწვდის გადაუმოწმებელ ფაქტებს მედიებს. მზად ვარ შემოწირულობა გავაკეთო ამ ადამიანისთვის Head & Shoulders შამპუნის შესაძენად – რას ეხმარება ეს შამპუნი, ყველამ იცის,” – თქვა ტატულიანმა.
მან ასევე განაცხადა, რომ მისი “ბაბუები, ბებიები და მშობლები დაიბადნენ და ცხოვრობდნენ აფხაზეთში”, ხოლო ნათესავები “მისი თავისუფლებისთვის სისხლს ღვრიდნენ”.
ტატულიანმა ასევე გაიხსენა, რომ 30 წლის განმავლობაში ეხმარებოდა აფხაზეთს სკოლების და საბავშვო ბაღების აშენებაში, დაკავებული იყო გზების შეკეთებით და მზად იყო ქველმოქმედება გაეგრძელებინა.
ქვეყნის სომხური თემის წარმომადგენლებმა ტატულიანის კეთილი საქმეების სიაც კი გამოაქვეყნეს, სადაც დეტალურად აღწერეს, როგორ, ვის და რა თანხით დაეხმარა ბიზნესმენი.
ამაზე აფხაზმა ჟურნალისტმა იზიდა ჭანიამ უპასუხა: „ახლა გასაგებია, რა ღირს აფხაზური პასპორტი“.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
