საქართველოში პოლიციამ ინტერნეტით ნარკოტიკების შვიდი გამსაღებელი დააკავა

საქართველოს შინაგან საქმეთა სამინისტრომ ინტერნეტით ნარკოტიკების რეალიზაციის მასშტაბური სქემა აღკვეთა. პოლიციამ შვიდი ადამიანი დააკავა. მათ შორის ოთხი ერთი ოჯახის წევრია – დედა, მამა და ორი შვილი.

ნარკოტიკი ინტერნეტით

“შვიდკაციანი ორგანიზებული ჯგუფი წინასწარ შემუშავებული გეგმის მიხედვით მოქმედებდა. კერძოდ, ისინი ინტერნეტით ახდენდნენ ნარკოტიკული საშუალებების უკანონო რეალიზაციას. ჩატარებული მასშტაბური ოპერაციის შედეგად, ორგანიზებული ჯგუფისგან ამოღებულია 2 125 შეკვრად დაფასოებული სხვადასხვა სახის ნარკოტიკული საშუალება”,  – განაცხადა საქართველოს შინაგან საქმეთა მინისტრის მოადგილე ვლადიმერ ბორცვაძემ.

შსს-ს ცნობით, გამოძიება ამ საქმეზე რამდენიმე თვის განმავლობაში მიმდინარეობდა. დადგინდა, რომ ბრალდებულებმა, ინტერნეტ–პლატფორმა ,,მატანგა’’-ზე დაარეგისტრირეს მაღაზია სახელით ,,MEGASHOP’’, რომლის მეშვეობითაც ნარკოტიკულ საშუალებებს ჰყიდდნენ.

ისინი ნარკოტიკულ საშუალებებს მცირე შეკვრებად აფასოებდნენ, თბილისში სხვადასხვა მისამართზე, სამალავებში ათავსებდნენ, ფოტოებს უღებდნენ და შესაბამისი აღნიშვნებით და კოორდინატებით კლიენტებს  უგზავნიდნენ, ხოლო თანხა ვებ-=გვერდ ,,მატანგა’’-ს ანგარიშზე ერიცხებოდათ.

ბრალდებულების პირადი, საცხოვრებელი სახლის და ავტომანქანის ჩხრეკისას, სარეალიზაციოდ გამზადებული 2 125 შეკვრად დაფასოებული სხვადასხვა სახის ნარკოტიკული საშუალება ამოიღეს.

კერძოდ, ამოღებულია „მდმა“, „მეტამფეტამინი“, „ამფეტამინი“ და კოკაინი. გარდა ამისა, ჩხრეკის შედეგად ამოღებულია ავტომანქანები, დიდი ოდენობით ფულადი თანხა, მობილური ტელეფონები და კომპიუტერული ტექნიკა, რომელსაც ბრალდებულები ნარკოტიკული საშუალებების რეალიზაციისთვის იყენებდნენ.

გამოძიება ორგანიზებული ჯგუფის მიერ განსაკუთრებით დიდი ოდენობით ნარკოტიკული საშუალების უკანონო შეძენა–შენახვის და გასაღების მუხლით მიმდინარეობს, რომელიც 8-დან 20 წლამდე ან უვადო თავისუფლების აღკვეთით ისჯება.

სასამართლომ დაკავებულებს აღკვეთის ღონისძიების სახით პატიმრობა შეუფარდა.

შსს-ს სტატისტიკა

მინისტრის მოადგილის ინფორმაციით, პოლიციამ 2019 წლის პირველი იანვრიდან დღემდე ამოიღო 13 კილოგრამი ჰეროინი, 1530 აბი “სუბუტექსი” და “სუბოქსინი“, 2400 აბი “ექსტაზი“, 5 კილოგრამზე მეტი ახალი ფსიქოაქტიური ნივთიერება, 1 კილო და 400 გრამი კოკაინი და 350 გრამი ფსიქოტროპული პრეპარატები.

ბორცვაძის ინფორმაციით, 2019 წლის პირველი იანვრიდან დღემდე სამინისტრომ ნარკოდანაშაულისათვის პასუხისგებაში მისცა 676 პირი, აქედან 55 ნარკორეალიზატორია.

დაკავებულები ბრალს არ აღიარებენ

ინტერნეტით ნარკოტიკების რეალიზაციისთვის დაკავებული ერთი ოჯახის წევრებიდან ერთ–ერთი ბრალს არ აღიარებს და ამბობს, რომ მას ნარკოტიკი „ჩაუდეს“. როგორც სააგენტო „ინტერპრესნიუსს“ ბრალდებულ ნიკა აბრამიძის ადვოკატმა გიორგი ლალიაშვილმა განუცხადა, მისი დაცვის ქვეშ მყოფმა თავდაპირველად აღიარა დანაშაული და გამოძიებას ჩვენებაც მისცა, თუმცა მოგვიანებით, ბრალდებულად დაკითხვისას განაცხადა, რომ უდანაშაულოა.

კიდევ ერთი ბრალდებული ანა აბრამიძეც დუმილის უფლებას იყენებს და დანაშაულს არ აღიარებს.

„მთელი ოჯახია დაკავებული, მისი მეუღლე და ორი ვაჟიშვილი, ამაზე ძალიან შეწუხებულია და ტირის. ამბობს, რომ ცოტა ნარკოტიკული საშუალება კი ჰქონდა, თუმცა აცხადებს, რომ იმდენი არ ჰქონია, რამდენიც სახლიდან ამოიღესო“, – აღნიშნა მისმა ადვოკატმა მარიამ პაპოშვილმა.

ადვოკატის ინფორმაციით, მისი დაცვის ქვეშ მყოფი გამოძიებასთან თანამშრომლობს და გამომძიებლებს დნმ–ის ნიმუში ჩააბარა.

რამდენად ადვილია ნარკოტიკის ყიდვა საქართველოში

2018 წლის მაისში ტელეკომპანია “რუსთავი 2-მა” ჟურნალისტური გამოძიება ჩაატარა. ჟურნალისტი რუსულენოვან საიტზე დარეგისტრირდა, მოძებნა შესაბამისი განცხადება და თანხა ბიტკოინებში გადარიცხა. 15 წუთში საიტზე მიიღო შეტყობინება, რომ შეკვეთა მზადაა, ასევე იმ ადგილის ჯიპიეს კოორდინატებიც, სადაც რეალიზატორმა ნივთიერება მეფედრონი მოათავსა.

მას შემდეგ, რაც დათქმულ ადგილზე ყვითელ ქაღალდში შეხვეული კანფეტის მსგავსი საგანი იპოვა, პატრულს გამოუძახა და ნაპოვნი ნივთი გადასცა. ჟურნალისტებმა ეს ექსპერიმენტი მას შემდეგ ჩაატარეს, რაც თბილისში 5 ადამიანი გარდაიცვალა და 10-ზე მეტმა მძიმე ინტოქსიკაცია მიიღო უცნობი ნარკოტიკული საშუალების მიღების შედეგად.

პოლიციამ მაშინ ორი ადამიანი დააკავა და განაცხადა, რომ ნარკოტიკების ინტერნეტით გამსაღებელთა დანაშაულებრივი სქემა გამოავლინა.