ლონდონში ასეულ ათასობით ადამიანი ბრიტანეთის ევროკავშირიდან გასვლას აპროტესტებს
ლონდონში გაიმართა მრავალათასიანი დემონსტრაცია, რომლის მონაწილეებიც მოითხოვდნენ Brexit-ის შეჩერებას. მათი მოთხოვნაა, ქვეყნის ევროკავშირიდან გასვლასთან დაკავშირებით ახალი რეფერენდუმი ჩატარდეს.
როგორც ბრიტანული გაზეთი Guardian წერს, აქციაში 600 ათასზე მეტი ადამიანი მონაწილეობდა. ეს ბოლო 10 წლის განმავლობაში დიდი ბრიტანეთის ყველაზე ფართომასშტაბიანი საპროტესტო აქციაა.
რა არის Brexit -ის არსი? პირველი რეფერენდუმის შესახებ
2016 წლის მაისში დიდ ბრიტანეთში ჩატარდა რეფერენდუმი, რომელიც ქვეყნის ევროკავშირის წევრობას ეხებოდა. მასში მინიმალური უპირატესობით ამ ორგანიზაციიდან გასვლის მომხრეებმა გაიმარჯვეს.
როგორც სოციოლოგიური კვლევებიდან ირკვევა, მაშინ გამოსვლას მხარი დაუჭირეს, ძირითადად, ხანში შესულმა ადამიანებმა, რომლებიც კონსერვატიულ შეხედულებებს იზიარებენ. წინააღმდეგი იყო, ძირითადად, ახალგაზრდობა და მოსახლეობის ეკონომიკურად აქტიური ნაწილი.
მას შემდეგ ევროკავშირსა და დიდ ბრიტანეთს შორის დაშორების პირობებთან დაკავშირებით მიმდინარეობს მოლაპარაკებები, რომლებიც ჯერჯერობით ჩიხშია.
რაზე ვერ შეთანხმდნენ ბრიტანეთი და ევროკავშირი
ევროკავშირი და დიდი ბრიტანეთი ორ ძირითად საკითხთან დაკავშირებით ვერ თანხმდებიან:
• როგორ იქნება ინგლისში მცხოვრები ევროკავშირის წევრი ქვეყნების მოქალაქეთა და ევროკავშირის ქვეყნებში მაცხოვრებელი დიდი ბრიტანეთის მოქალაქეების უფლებები გარანტირებული.
• როგორ უნდა მოიქცნენ ჩრდილო ირლანდიის (დიდი ბრიტანეთის ნაწილის) და ევროკავშირის წევრ ირლანდიის რესპუბლიკის საზღვართან დაკავშირებით.
რას ამბობდნენ 20 ოქტომბერს ლონდონში, პარლამენტის წინ გამართული პროტესტის მონაწილეები – ისინი, ვინც მომავალშიც ბრიტანეთისა და ევროკავშირის ერთობის მომხრეა
პარტია „ლიბერალური დემოკრატები“ ვინს კეიბლი: „ეს არის ტრაგედია, რომელშიც ჩვენი ქვეყანა თაობებად დაიყო“.
„მწვანეთა პარტიის“ წარმომადგენელი კეროლაინ ლუკასი: „ [ბრეკსიტი] ჩვენს უღარიბეს თემებს კიდევ მეტად გააღარიბებს და უსუსურს გახდის. ჩვენს ხმა ხალხისთვის უნდა მივცეთ – მაგრამ ასევე უნდა გარდავქმნათ ეკონომიკა, რომელიც უთანასწორობას ეფუძნება“.
კონსერვატიული პარტიის დეპუტატი ანა სობორი: „უკვე ცხადი გახდა, რომ ბევრნი ვართ, და ჩვენ პასუხისმგებლობას ავიღებთ და ამ გაუგებრობას მოვაწესრიგებთ“.
საპროტესტო აქციაზე გაისმოდა ლოზუნგები პრემიერ-მინისტრის თანამდებობაზე გამოცემა „Observer“-ის ჟურნალისტის კეროლ კადვალადრის წამოყენების მოწოდებით. Brexit-ის შესახებ მისი სტატიების სერიამ Facebook-ის აქციების დაცემა გამოიწვია.
სატირული ტოკ-შოუს წამყვანმა დომ ჯოლიმ Twitter-ის საკუთარ გვერდზე სიმაღლიდან გადაღებული ლონდონის ფოტო დადო, საიდანაც ქუჩაში გასული ასობით ათასი ადამიანი მოჩანს და ბრიტანეთის დედაქალაქში ახლახან მომხდარ ნაციონალისტურ გამოსვლებზე აპელირებით, ამაზე იხუმრა:
„ლონდონის ქუჩებში არა რასისტთა უზარმაზარი ჯგუფი გამოვიდა, გაჰყვირიან არა-რასისტულ ლოზუნგებს და უცხოელებს არ დევნიან“.
Guardian-ის ჟურნალისტები პროტესტის ბევრ მონაწილეს ესაუბრნენ. უმრავლესობა ირლანდიაში არსებულ მყიფე მშვიდობაზე, ეკონომიკურ საფრთხეებსა და ლგბტ თემის წინაშე არსებულ რისკებზე ლაპარაკობდა. აი, რამდენიმე სახასიათო კომენტარი:
მეთიუ კუკი, 28: „Brexit სამუშაო ადგილებს არ შექმნის, მშრომელების უფლებებს არ დაიცავს, ქვეყნის მაცხოვრებლებს ფინანსურ სარგებელს არ მოუტანს“.
60 წლის პიოტრი კროულიდან: „შეიძლება, რომ ნორმალურმა ქვეყანამ სამშვიდობო შეთანხმებაზე უარი თქვას [პოტენციურად კონფლიქტურ ზონაში]? ირლანდიაში რაიმე მკაცრი საზღვრის გავლება დაუშვებელია. მახსოვს 1970 წლის არეულობა. ადამიანებს ძალიან სწრაფად დაავიწყდათ მაშინ ხელმოწერილი შეთანხმების ფასეულობა“.
ჯეისონ გილოტი 43 წლისაა და მან თქვა, რომ ევროკავშირიდან გასვლას რეფერენდუმის დროს მისცა ხმა. თუმცა, როგორც ამბობს, „უკვე ხუთი დღის შემდეგ გადავიფიქრე“.
„მე პოლიტიკური აგნოსტიკოსი ვარ და ფაქტებსა და რეალობას ვენდობი. აი, ახლა ერთიც გვაქვს და მეორეც“.
გილოტი აქციაზე მივიდა პლაკატით: „როდესაც ფაქტები იცვლება, მეც შეხედულებას ვიცვლი. და თქვენ როგორ იქცევით, სერ?“
პერსპექტივა
დიდი ბრიტანეთის პრემიერ-მინისტრმა ტერეზა მეიმ უკვე განაცხადა, რომ მისი მმართველობის დროს Brexit-ის საკითხზე ახალი რეფერენდუმი არ ჩატარდება.
ეს იმას ნიშნავს, რომ მისი მოწინააღმდეგეები – როგორც ოპოზიციური პარტიებიდან, ისე მმართველ კონსერვატიულ პარტიაში – ახალი საპარლამენტო არჩევნების მიღწევას და დიდ ბრიტანეთში ახალი პრემიერ-მინისტრის გამოჩენას შეეცდებიან.
