კორონავირუსი საქართველოში: რა გადაწყვიტა საკოორდინაციო საბჭომ. ყველა ინფორმაცია ერთად

რა გადაწყვეტილებები მიიღო პრემიერთან არსებულმა კორონავირუსის წინააღმდეგ ბრძოლის უწყებათაშორისმა საკოორდინაციო საბჭომ და რა ახალი ინფორმაცია ვიცით 19 მარტის 14:00 საათისთვის. 

ბოლო მონაცემები ინფიცირებულების შესახებ

• სულ – 40 ინფიცირებული; გამოჯანმრთელებული – 1; გარდაცვლილი – 0;
• 39 ადამიანია მკურნალობის პროცესში. (ერთი ბათუმის ინფექციურ საავადმყოფოში, სამი საჩხერის საავადმყოფოში, ორი პირველ საუნივერსიტეტო კლინიკაში, დანარჩენები თბილისის ინფექციურში)
• მძიმეა 3 ავადმყოფის მდგომარეობა. ამ სამს შორის ორი ხანდაზმულია – ერთი 80 წელს გადაცილებული ქალია.
• 12 პაციენტს აქვს პნევმონია;
• ინფიცირებულებს შორის ოთხი არასრულწლოვანია. ისინი კარგად გრძნობენ თავს;
• ერთი გარდაცვალებაა საქართველოს ფარგლებს გარეთ – ესპანეთში გარდაიცვალა ერთი საქართველოს მოქალაქე, 74 წლის ქალი;
• ინფიცირებულებს შორის არის ერთ-ერთი მსხვილი სასტუმროს დირექტორი. ამ სასტუმროში ხშირად ნიშნავენ შეხვედრებს ხელისუფლების წარმომადგენლები, ასევე დიპლომატიური კორპუსის წარმომადგენლები;
• ინფიცირებულებს შორის ერთ-ერთი ბოლო პაციენტი ვირუსის გამოვლენამდე წლისთავზე იმყოფებოდა. ჯანდაცვის მინისტრი ამბობს, რომ გამოვლენილი არიან წლისთავზე მყოფი ადამიანები და მათზე დაკვირვება მიდის;
• კარანტინშია 1344 ადამიანი;
• თვითიზოლაციაშია 1446;
• 197 უკვე გავიდა თვითიზოლაციიდან – ანუ მათ გაუვიდათ ის 2-კვირიანი ვადა. ეს ნიშნავს, რომ ისინი ჯანმრთელები არიან და დაუბრუნდნენ ყოველდღიურ ცხოვრებას;
• დღემდე ჩატარებულია 238 კონტაქტის ჩაღრმავებული კვლევა და განხორციელებულია მათზე დაახლოებით 10 ათასი სატელეფონო ზარი, რათა მოხდეს მეტი სავარაუდო კონტაქტის მოძიება და პრევენციული ღონისძიებების გატარება

ვითარების შეფასება და ახალი შეზღუდვები

• საქართველო უკვე გადადის გავრცელების ფაზაზე, რის გამოც მოსალოდნელია კორონავირუსით დაინფიცირებულთა ოდენობის ზრდა.

“სამწუხაროდ, ჩვენ უკვე გადავდივართ ვირუსის გავრცელების ფაზაში, რომელიც მიანიშნებს იმაზე, რომ გაიზრდება ადამიანთა რიცხვი, ვინც არის კორონავირუსით დაინფიცირებული,” – განაცხადა პრემიერ-მინისტრის პრესსპიკერმა ირაკლი ჩიქოვანმა საკოორდინაციო საბჭოს დასრულების შემდეგ ბრიფინგზე.

•  საკოორდინაციო საბჭოს სხდომაზე მიიღეს გადაწყვეტილება, რომ  ჯერჯერობით საქართველო არ გადადის საგანგებო რეჟიმზე. თუმცა, უახლოეს მომავალში კიდევ უფრო გამკაცრდება ზომები.

მთავარი რეკომენდაცია კვლავ უცვლელია: მაქსიმალურად დავიცვათ სოციალური დისტანცირება, დავრჩეთ სახლში

• მთავრობა საჯარო და კერძო სექტორს მიმართავს, მაქსიმალურად შეზღუდონ თანამშრომლების სამუშაო ადგილებზე გამოცხადება და გადავიდნენ მაქსიმალურად დისტანცირებულ მუშაობაზე.

“აბსოლუტურად მინიმუმამდე იყოს დაყვანილი იმ თანამშრომელთა რაოდენობა, რომელთაც მოუწევთ გადაადგილება, რომლებსაც მოუწევთ მისვლა სამსახურში,” – აღნიშნა ჩიქოვანმა.

• თითოეულმა სამინისტრომ და უწყებამ პრემიერისგან მიიღო დავალება, რომ დღის ბოლომდე წარმოადგინონ თავიანთ სფეროში ყველა იმ შესაძლო შეზღუდვის შესახებ, რომელიც შესაძლებელია ამოქმედდეს უახლოეს პერიოდში. როდესაც უწყებები ამ გეგმებს წარადგენენ, უფრო ნათელი გახდება, რა სახის შეზღუდვები ამოქმედდება დამატებით.

• დაავადებათა კონტროლის ცენტრის ხელმძღვანელი ამირან გამყრელიძე მთავრობას რეკომენდაციას აძლევს კიდევ უფრო მეტად გამკაცრდეს სოციალური დისტანცირება და იზოლაცია. მისი თქმით, უნდა დაიხუროს ან დისტანციურ მუშაობაზე გადავიდეს ყველა სავაჭრო ობიექტი გარდა სურსათის მაღაზიებისა და აფთიაქებისა.

• პრობლემაა თვითიზოლაციის წესების დაცვა – “სამწუხაროდ, ჩვენ გვაქვს ფაქტები, როცა თვითიზოლაციის რეკომენდაციას არ ემორჩილებიან ჩვენი თანამოქალაქეები, რაც კიდევ უფრო მეტ საფრთხეს ქმნის, თითოეული მათგანისა და სხვებისთვის,” – აღნიშნა ჩიქოვანმა.

რა ხდება ჯანდაცვის სექტორში?

•  პირველადი ჯანდაცვის ქსელი სრულად მობილიზებულია, – ამის შესახებ ჯანდაცვის მინისტრი მოადგილემ, თამარ გაბუნიამ საკოორდინაციო საბჭოს სხდომის დასრულების შემდეგ განაცხადა.

• “პირველადი ჯანდაცვის რესურსი  გამოვიყენოთ მაქსიმალურად ოპტიმალურად და მივმართოთ ოჯახის ექიმს. გთხოვთ, ვიდრე სასწრაფო დახმარებას გამოვიძახებთ ან მივიღებთ გადაწყვეტილებას ჰოსპიტალში ვიზიტის შესახებ, გავიაროთ სატელეფონო კონსულტაცია ოჯახის ექიმთან, რომელიც სათანადო რჩევას მოგვცემს,” – ამბობს ის.

• გაბუნიას თქმით, საქართველოში 25-მდე სამედიცინო დაწესებულება მზადდება პაციენტების მისაღებად. აქამდე ხუთ დაწესებულებაზე იყო საუბარი.

•  ჯანდაცვის მინისტრის ეკატერინე ტიკარაძის განცხადებით, ამ ეტაპზე პაციენტების მისაღებად 500-ზე მეტი საწოლია მზად. დამატებით კიდევ 1000-დან 1500 საწოლამდე მზადდება.

„დღესდღეობით 500-ზე მეტ საწოლია მობილიზებული პაციენტების მისაღებად. ეს რამდენიმე ეტაპად გვაქვს დაყოფილი: პირველ ეტაპზე, გარკვეული რიცხვის ზრდის შემთხვევაში მიეწოდება ინფორმაცია მეორე ჯგუფის ჰოსპიტალებს, სადაც ჩვენ გვაქვს რეზერვი 700 საწოლი. შემდეგ გვაქვს მესამეული დონისთვის მომზადებული ჰოსპიტალები და მათაც აქვს რესურსი 700-800 საწოლი გამოყონ კორონავირუსით დაინფიცირებული პაციენტების მისაღებად. ასევე, ჩვენ ვამზადებთ უკვე დამატებით საწოლებს, რომელთა რაოდენობაც იქნება 1000-იდან 1500-მდე“, – განაცხადა ტიკარაძემ.

ტესტირება

•  ამჟამად საქართველოში კორონავირუსის ტესტირება PCR- ტექნოლოგიით ტარდება. ნიმუშის სახით გამოყენებულია ცხვირხახის ნაცხი, რადგან მიიჩნევა, რომ კორონავირუსის შემთხვევაში სისხლზე მეტად სენსიტიური სწორედ ნაცხია.

საქართველოში ასეთი ტესტი ოთხ ლაბორატორიაში ტარდება – თბილისში ლუგარის ლაბორატორიაში და ინფექციურ საავადმყოფოში. ასევე ბათუმსა და ქუთაისში ლუგარის ლაბორატორიის ფილიალებში.  ყველა ეს კვლევა უფასოა. ვის ჩაუტარდეს კვლევა და ვის არა, ამას ექიმები წყვეტენ. საკუთარი სურვილით მოქალაქე აქ ტესტს ვერ გაიკეთებს.

• ასევე არის გენეტიკის ეროვნული ლაბორატორია, სადაც კომერციული ტესტირებაა შესაძლებელი. ანუ მოქალაქეს შეუძლია გადაიხადოს 620 ლარი და საკუთარი სურვილით გაიკეთოს ტესტი. თუმცა, ეს ტესტირება სისხლის ანალიზით კეთდება და არ არის ისეთი ზუსტი, როგორც ცხვირ-ხახის ნაცხის შემთხვევაში. ამ ტესტს დაავადების ადრეულ ეტაპზე გამოვლენა უჭირს, რადგან  სისხლში ვირუსის უკვე მაღალი კონცენტრაცია უნდა იყოს, რომ ტესტი დადებითი იყოს.

• საქართველო ლაბორატორიული ტესტების გაფართოებას და აგრესიულ ტესტირებაზე გადასვლას აპირებს. თუმცა, ჯერჯერობით სწრაფი ტესტების შეძენა არ მომხდარა.

თამარ გაბუნიას თქმით, ე.წ. სწრაფი ტესტების ჩატარების თხოვნით ჯანდაცვის სამინისტროს ხუთმა კომპანიამ მიმართა, თუმცა ჯანდაცვის სამინისტროს არ გაუცია ნებართვა, რადგან ხარისხს ამოწმებენ, რომ ქვეყანაში არ მოხდეს “ცრუ” შედეგის მქონე ტესტების შემოტანა.

• თუმცა ოპოზიცია და ასევე ექიმების ნაწილი ჯანდაცვის სამინისტროს აკრიტიკებენ იმის გამო, რომ ამ დრომდე ფერხდება სწრაფი ტესტების იმპორტირება.

ინფექციონისტი გიორგი კანდელაკი  მიიჩნევს, რომ ჯანდაცვის სამინისტრო ხელოვნურად აფერხებს კორონავირუსის ტესტების რეგისტრაციასა და ლაბორატორიების მიერ მათი შემოტანის პროცესს. ამის შესახებ მან ფეისბუკზე დაწერა:

„ჩვენ ვიმყოფებით ეპიდემიოლოგიური ტალღის დარტყმის პირას და დაუყოვნებლივ გვჭირდება ტესტები!!! ეს უნდა გაიგონ სამინისტროში მოკალათებულმა ბიუროკრატებმა!!! გთხოვთ ექიმები გავერთიანდეთ ამ მოთხოვნის ირგვლივ!“

• ათამდე ქართულმა კომპანიამ, მათ შორის”აჭარა ტექსტილმა”, რომელიც ფოთშია განთავსებული, უკვე დაიწყო პირბადეების კერვა. თუმცა, ეს ვერ მოაგვარებს ქვეყანაში არსებულ პირბადეების დეფიციტს სრულად, რადგან ეკონომიკის მინისტრი ნათია თურნავას ამბობს, რომ პირველ ეტაპზე პირბადეები მხოლოდ სამედიცინო მუშაკებს გადაეცემათ. შემდეგ კი, პრიორიტეტი ბიზნესსექტორში დასაქმებულები იქნებიან.

პირბადეები

თურნავა ამბობს, რომ ქვეყანაში პირბადეების შესაკერი ნედლეულის დეფიციტია და მხოლოდ პირველი ეტაპისთვისაა საკმარისი, რადგან ნედლეულის შემოტანა შექმნილი მდგომარეობის გამო ვერ ხერხდება.

“პირბადეები დამზადდება სხვადასხვა მასალისგან, რომელიც შეთანხმებულია დაავადებათა კონტროლის ეროვნულ ცენტრთან და ლუგარის ლაბორატორიაში გაიარა შემოწმება. პირველ ეტაპზე ეს არის დოლბანდიდან დამზადებული პირბადეები, რომელიც შეიძლება გამოვიყენოთ მრავალჯერ, ირეცხება – თავისი ინსტრუქცია მოყვება. ხოლო უფრო სპეციფიური მოხმარების დროს, მაგალითად, სამედიცინო მუშაკებისთვის იქნება ერთჯერადი,” – ამბობს თურნავა. 

რითი მკურნალობენ ავადმყოფებს საქართველოში

• როგორც ამირან გამყრელიძე ამბობს, ქართველი ექიმები ჩინელი სპეციალისტების რჩევით მკურნალობისას რამდენიმე ანტივირუსულ პრეპარატს იყენებენ:

“მიმდინარეობდა მრავალი ანტივურუსული პრეპარატის გამოყენება ჩინეთში და მიმდინარეობს დღესაც, იგივე შიდსის საწინააღმდეგო პრეპარატების, ხლოროხინის, ინტერფერონის, რიბავირინის და ა.შ. ჩვენი ექიმებიც ამას იყენებენ,” – თქვა გამყრელიძემ.

• გარდა ამისა, როგორც გამყრელიძე ამბობს, ქართველი ექიმები კორონავირუსის წინააღმდეგ პრეპარატ „რემდოსოვირს“  გამოიყენებენ.

მისი თქმით, მოლაპარაკებები პრეპარატის მწარმოებელ კომპანია “გილიადთან“ [ეს ის კომპანიაა, რომელიც საქართველოს C ჰეპატიტის წამლებით ამარაგებს]  უკვე მიმდინარეობს. ეს პრეპარატი ბაზარზე 2015 წლიდან არსებობს, იგი შეიქმნა დასავლეთ აფრიკაში ებოლას ეპიდაფეთქების დროს. როგორც გამყრელიძე ამბობს, ეს პრეპარატი ჩინელებმა ძალიან აქტიურად გამოიყენეს თავიანთი ავადმყოფების მკურნალობისას.

“დარწმუნებული ვარ, ეს მოთხოვნა ჩვენთვის დაკმაყოფილდება და ე.წ. სარეზერვო მარაგში ეს პრეპარატი გვექნება. მას აქვს თავისი ჩვენებები, ვის უნდა დაენიშნოს, როგორ და ა.შ. ჩვენი ექიმები ამას გამოიყენებენ“, – განაცხადა გამყრელიძემ.

9 პროდუქტი, რომელზეც ფასები არ მოიმატებს

სოფლის მეურნეობის სამინისტრომ შეიმუშავა მექანიზმი, რომლის საშუალებითაც ცხრა უმთავრეს სასურსათო პროდუქტზე ფასები არ გაიზრდება.

ფასების შენარჩუნების მექანიზმი ასეთია: ეს პროდუქტები იმპორტირებულია. ქართული ბიზნესი, როდესაც ამ პროდუქტებს ყიდულობს, ახდენს ლარის კონვერტაციას ბანკში. სახელმწიფო დააფიქსირებს ლარის კონვერტაციის კურსს, რაც კონკრეტულ დღეს იქნება, როდესაც კონვერტაცია ხდება და 3 ლარის ზემოთ სხვაობას სახელმწიფო დაფარავს. პირობითად თუ 1 დოლარი ღირს 3 ლარი და 10 თეთრი, სახელმწიფო ამ 10 თეთრიან სხვაობას დაფარავს, მას შემდეგ რაც პროდუქტი ქვეყანაში შემოვა, განბაჟდება და ყველა საბუთი ხელმისაწვდომი იქნება. შესაბამისად კურსის სხვაობის გამო, არ იქნება ობიექტური მიზეზი, რომ ეს 8 პროდუქტი გაძვირდეს.

ეს პროდუქტებია:

• ბრინჯი,
• წიწიბურა
• მაკარონი
• მზესუმზირის ზეთი
• ფქვილი
• ხორბალი
• რძის ფხვნილი
• შაქარი
• ლობიო

რა ეშველებათ უცხოეთში მყოფ საქართველოს მოქალაქეებს?

• ამირან გამყრელიძის განცხადებით, ამ ეტაპზე უცხოეთში მყოფი საქართველოს 20 მოქალაქე იმყოფება სხვადასხვა საავადმყოფოში დაკვირვებაზე.

• უცხოეთში, ესპანეთში, გარდაიცვალა საქართველოს ერთი მოქალაქე – 74 წლის ქალი, რომელსაც ქრონიკული დაავადებები ჰქონდა. როგორც საგარეო საქმეთა მინისტრი დავით ზალკალიანი ამბობს, გართულებულია გადმოსვენების პროცედურები, ამიტომ ეს პროცესი, სავარაუდოდ, გაჭიანურდება.

• მთავრობის გადაწყვეტილებით, საგარეო საქმეთა სამინისტროს წარმომადგენლებმა უცხოეთში ინფიცირებული თითოეული მოქალაქის შესახებ ინფორმაცია უნდა მოიძიონ და მათთან მჭიდრო კომუნიკაცია უნდა ჰქონდეთ.

• ზალკალიანის თქმით, საქართველოს მოქალაქეებს, რომლებსაც ევროკავშირში 90-დღიანი ლეგალურად ყოფნის ვადა ეწურებათ, საგარეო საქმეთა სამინისტრო დაეხმარება. მოხდება მათი შემთხვევების ინდივიდუალურად შესწავლა და მათთვის ვადების გადავადება.  მისი თქმით, უწყება აქტიურ კომუნიკაციაშია როგორც ევროკომისიასთან, ისე ევროკავშირის წევრ ქვეყნებთან.

„ევროკომისიამ რეკომენდაცია გასცა ინდივიდუალური წევრების მიმართ, რომ მიიღონ შესაბამისი ზომები იმისთვის, რომ ადამიანებს, რომლებსაც ამ ფორსმაჟორული სიტუაციის გამო შეექმნათ პრობლემა, გარკვეულწილად გადაუვადდეთ ეს ვადები, ანუ ევროკავშირის ტერიტორიაზე ლეგალურად ყოფნის ვადები და ამ მიმართულებითაც ჩვენი საელჩოები და საკონსულოები მზად არიან, რომ დაეხმარონ მოქალაქეებს ამ კომუნიკაციაში ადგილსამყოფელი ქვეყნის მიხედვით. ჩვენ გამოვთქვამთ მზაობას, რომ ჩვენს მოქალაქეებს, რომლებსაც შეექმნათ პრობლემა ევროკავშირში 90-დღიანი ლეგალურად ყოფნის ვადის გადავადების, ინდივიდუალურად გავუწიოთ შესაბამისი დახმარება თითოეული შემთხვევიდან გამომდინარე“, – განაცხადა ზალკალიანმა.