ევროპის საბჭოს საპარლამენტო ასამბლეის დელეგაციის ხელმძღვანელს სანქციები დაუწესეს
ევროპის საბჭოს საპარლამენტო ასამბლეამ (ესსა) განაცხადა, რომ თავის ვიცე-პრეზიდენტს, აზერბაიჯანის დელეგაციის ხელმძღვანელ სამედ სეიდოვს სანქციებს უწესებს. აღმკვეთი ღონისძიების დაწესების მიზეზად იმ კორუფციულ სკანდალში მონაწილეობა სახელდება, რომელიც ევროსაბჭოს საპარლამენტო ასამბლეამ დაახლოებით ერთი თვის წინ გამოავლინა.
ასამბლეის მოხსენებაში აღნიშნულია, რომ საკუთარი ინტერესების ლობირების მიზნით ბაქო დეპუტატების მოსყიდვას ცდილობდა.
ამას გარდა, სანქციები საპარლამენტო ასამბლეის ექსპრეზიდენტ პედრო აგრამუნტს, ჟორდი შუკლას (Jordi Xuclà) – ყოფილ მომხსენებელს უკრაინაში არსებული სიტუაციის შესახებ (ორივე მათგანი ესპანეთს წარმოადგენს) და ჩეზარ პრედასაც დაუწესდათ. თითოეულ მათგანს ქცევის კოდექსის სერიოზული დარღვევა ედება ბრალად. ზემოაღნიშნულ პირებს მხოლოდ ასამბლეის კენჭისყრებში მონაწილეობისა და რეზოლუციის ინიცირების უფლება ექნებათ და ევროსაბჭოს საპარლამენტო ასამბლეის წევრებისათვის განსაზღვრული ყველა სხვა პრივილეგია ჩამოერთმევათ.
2018 წლის აპრილში დამოუკიდებელი საგამოძიებო ჯგუფის მიერ მომზადებული 198-გვერდიანი მოხსენება გამოქვეყნდა, რომელშიც ნახსენებია „აზერბაიჯანის ინტერესების სასარგებლოდ ინიცირებული კორუფციული ქმედებები“. ზემოაღნიშნული დეპუტატების გარდა, დოკუმენტში კიდევ ერთი მოქმედი პარლამენტარის, ავსტრიელი სტეფან შენნახის გვარიც ფიგურირებს. 22 აპრილს აპრილს ევროპის საბჭოს საპარლამენტო ასამბლეის ბიურომ მოხსენების ფიგურანტებს ასამბლეის სამუშაო პროცესში მონაწილეობის შეჩერება სთხოვა.
ეს კი იმას ნიშნავს, რომ მათ აეკრძალებათ
[yes_list]
- მოხსენებებით გამოსვლა და არჩევნების დამკვირვებლად მუშაობა
- ევროსაბჭოს საპარლამენტო ასამბლეის პრეზიდენტის, ვიცე-პრეზიდენტის, კომიტეტის თავმჯდომარის, ან ქვეკომიტეტის ხელმძღვანელის პოსტის დაკავება
- სხვადასხვა ღონისძიებებში ასამბლეის, ან მისი რომელიმე კომიტეტის წარმომადგენლის რანგში მონაწილეობა
- ევროპის საბჭოს აღმასრულებელ ორგანოში მოთხოვნის გადაგზავნა
[/yes_list]
ბაქოში გამართულ ბრიფინგზე სამედ სეიდოვმა განაცხადა, რომ სანქციების საშუალებით აზერბაიჯანზე ზეწოლას ცდილობენ.
«ჩვენ არაერთხელ შეგვინიშნავს, რომ ხშირად ეს ორგანიზაცია აზერბაიჯანთან მიმართებით ორმაგი სტანდარტების პრინციპს იყენებს. ამიტომ ამ სანქციების დაწესების შესახებ მიღებული გადაწყვეტილება უსაფუძვლო და ცალსახად მიკერძოებულია», – აღნიშნა პარლამენტარმა.
აგრამუნტის წინააღმდეგ დაწესებული სანქციის ვადა 10 წლით განისაზღვრება, შუკლას, ჩეზარ ფლორინ პრედასა და სამედ სეიდოვს კი ორი წლით შეუზღუდეს უფლებამოსილებები.
ევროსაბჭოს საპარლამენტო ასამბლეის ვიცე-პრეზიდენტმა, უკრაინული დელეგაციის წევრმა ვლადიმირ არიევმა „ფეისბუკით“ წერილობითი განცხადება გააკეთა. თავის „ფეიჯზე“ მან დაწერა, რომ „კომიტეტი დაეთანხმა მოსაზრებას იმის შესახებ, რომ დეპუტატები აუცილებლად უნდა დაისაჯონ, თუმცა, იურიდიული თვალსაზრისით, მათი დანაშაული ჯერ არ არის დამტკიცებული».
“ევროკავშირის საპარლამენტო ასამბლეის პროცედურების წესების კომიტეტის გადაწყვეტილება ძალიან მნიშვნელოვანია ასამბლეაში არსებული სიტუაციის გასაჯანსაღებლად. ბოლო შვიდი-რვა წლის განმავლობაში ამ ორგანიზაციაში ფართოდ იყო გავრცელებული პოსტსაბჭოთა სივრცის კონკრეტული ქვეყნების (მ.შ. აზერბაიჯანის) ხელისუფლებების სასარგებლოდ დეპუტატების მოსყიდვის პრაქტიკა. ევროპის საბჭო სადამსჯელო ორგანოს არ წარმოადგენს და ამიტომ, ამ შემთხვევაში, უბრალოდ ამ სკანდალის მონაწილეების პოლიტიკურ და მორალურ პასუხისმგებლობაზეა საუბარი”, – განაცხადა ანარ მამედლიმ “კავკაზსკი უზელის“ კორესპონდენტთან საუბრისას.
