ახალი მთავრობა საქართველოს ორ-სამ კვირაში ეყოლება

საქართველოს პრემიერ-მინისტრობის კანდიდატი მამუკა ბახტაძე მთავრობის სერიოზულ განახლებას და სტრუქტურულ ცვლილებებს გეგმას, თუმცა ეს ყველაფერი მხოლოდ ორ-სამ კვირაში მოხდება. მანამდე კი,  პარლამენტს დასამტკიცებლად მთავრობის ძველი, ფორმალური შემადგენლობა წარედგინება, რომლის წევრთა ნაწილი განახლებულ მთავრობაში ვერ მოხვდება.

პრემიერ-მინისტრობის კანდიდატი ამას იმით ხსნის, რომ მთავრობის სტრუქტურული რეფორმა, რომლებიც მას აქვს დაგეგმილი, საკანონმდებლო ცვლილებებს საჭიროებს, რასაც ტექნიკურად ორი-სამი კვირა დასჭირდება.

მოსალოდნელი სტრუქტურული ცვლილებების შესახებ მან  „ქართული ოცნების“ ოფისში, საპარლამენტო უმრავლესობასთან  შეხვედრის შემდეგ გამართულ  ბრიფინგზე ისაუბრა.

მთავარი სტრუქტურული ცვლილება, რომელსაც პრემიერობის კანდიდატი აანონსებს, ეს არის ე.წ. მცირე მთავრობის ფორმირება. რეფორმის თანახმად, საქართველოში დღეს არსებული 14 სამინისტროს ნაცვლად, 11 სამინისტრო და შესაბამისად, სამი მინისტრით ნაკლები იქნება.

სამინისტროების გაერთიანების საკითხზე საუბრისას, ბახტაძე ამბობს, რომ ცვლილებები ექვს სამინისტროს შეეხება, თუმცა ამ ეტაპზე არ აკონკრეტებს, რომელია ეს სამინისტროები.

ამ ეტაპზე დანამდვილებით ცნობილია, რომ ახალ მთავრობაში ვერ მოხვდება საგარეო საქმეთა მინისტრი მიხეილ ჯანელიძე და ასევე ეკონომიკის მინისტრი დიმიტრი ქუმსიშვილი. სხვა რომელი მინისტრი დარჩება პორტფელის გარეშე,  ჯერჯერობით არ კონკრეტდება.

მამუკა ბახტაძემ ბრიფინგზე მხოლოდ ის თქვა, რომ მთავრობაში “ახალი სახეები ნამდვილად იქნებიან”.

•   ფინანსთა მინისტრი მამუკა ბახტაძე მმართველმა გუნდმა “ქართულმა ოცნებამ” პრემიერ-მინისტრობის კანდიდატად 14 ივნისს დაასახელა, მას შემდეგ, რაც თანამდებობიდან გადადგა პრემიერი კვირიკაშვილი. კვირიკაშვილმა გადადგომის მიზეზად პარტიის თავმჯდომარესთან – ბიძინა ივანიშვილთან აზრთა სხვადასხვაობა დაასახელა.

•   კვირიკაშვილის გადადგომას დაძაბული ორი თვე უძღოდა წინ – რუსთაველის გამზირზე ერთი მეორეს მიყოლებით რამდენიმე მრავალრიცხოვანი აქცია გაიმართა. ივნისის დასაწყისში პარლამენტის შენობასთან პერმანენტული აქციები იმართებოდა ხორავას ქუჩაზე მოკლული მოზარდების საქმესთან დაკავშირებით. ამ აქციებზე ერთ-ერთი მთავარი მოთხოვნა სწორედ პრემიერ კვირიკაშვილის გადადგომა იყო. 

•  მას შემდეგ, რაც პრემიერმა კვირიკაშვილმა პოსტი დატოვა, კანონის თანახმად, მთავრობა მოვალეობის შემსრულებლად ითვლება, ვიდრე მას პარლამენტი არ დაამტკიცებს. ახალი პრემიერისა და მთავრობისთვის ნდობის გამოცხადებაზე პარლამენტი მიმდინარე კვირას იმსჯელებს.