არასამთავრობო ორგანიზაციები იუსტიციის მინისტრის გადადგომას ითხოვენ

მას შემდეგ, რაც საპროტესტო აქციების შედეგად საქართველოს მთავარი პროკურორი ირაკლი შოთაძე გადადგა, დაიწყო ამ თანამდებობაზე ახალი კადრის შერჩევის პროცესი.

მიტინგები თბილისში 31 მაისს დაიწყო, იმის შემდეგ, რაც სასამართლომ ორი 16 წლის მოზარდის – ლევან დადუნაშვილისა და დავით სარალიძის სასტიკი მკვლელობის საქმეზე განაჩენი გამოაცხადა.

გასული წლის 1 დეკემბერს სკოლის ორი მოსწავლე თავიანთ თანატოლებთან მომხდარი ჩხუბის დროს დანებით მიყენებული მრავლობით ჭრილობებით გარდაიცვალა. მკვლელობა დღისით, ხალხმრავალ ქუჩაზე, რამდენიმე მოწმის თვალწინ მოხდა. სასამართლომ დაადგინა, რომ დაკავებულთაგან არც ერთს დავით სარალიძე არ მოუკლავს. ამ გადაწყვეტილებამ გაამართლა მოკლულის მამის – ზაზა სარალიძის ეჭვები, რომელიც რამდენიმე თვის განმავლობაში ირწმუნებოდა,  რომ მისი ვაჟის ნამდვილი მკვლელები თავისუფლები არიან და პროკურატურა მათ ხელს აფარებს.

3-დღიანი პროტესტების შედეგად, მომიტინგეებმა საქართველოს მთავარი პროკურორის       გადადგომას მიაღწიეს და მომიტინგეებთან მოსალაპარაკებლად მისულ  ქვეყნის პრემიერ-მინისტრს სტვენით შეხვდნენ.

ხელისუფლება აცხადებს, რომ პროცესს გამჭვირვალედ წარმართავს და მზადაა ამ თემაზე საჯარო კონსულტაციები გამართოს. იუსტიციის მინისტრმა თეა წულუკიანმა 4 ივნისს საჯარო კონსულტაციებში მონაწილეობის მიღება შესთავაზა არასამთავრობო და საზოგადოებრივ ორგანიზაციებს, ასევე უმაღლეს სასწავლებლებს. იუსტიციის მინისტრმა სპეციალური წერილი გაუგზავნა რამდენიმე ათეულ ორგანიზაციას და პროცესში ჩართვისკენ მოუწოდა.

თუმცა, წულუკიანის მიერ წარმართული გამჭვირვალე პროცესის არ სჯერა არც ოპოზიციას და არც არასამთავრობო სექტორს. ისინი უარს აცხადებენ მთავარი პროკურორის შესარჩევ კონსულტაციებში მონაწილეობაზე, ვიდრე თეა წულუკიანი არ დატოვებს იუსტიციის მინისტრის პოსტს.

თხუტმეტზე მეტმა გავლენიანმა არასამთავრობო ორგანიზაციამ მიმართვა გაუგზავნა საქართველოს პრემიერ-მინისტრს, გიორგი კვირიკაშვილს. მიმართვაში ისინი იუსტიციის მინისტრის პოსტიდან თეა წულუკიანის გადადგომას ითხოვენ.

ფონდ „ღია საზოგადოება-საქართველოს“ ოფისში გამართულ პრესკონფერენციაზე არასამთავრობო ორგანიზაციების ხელმძღვანელებმა განაცხადეს, რომ თეა წულუკიანმა ვერ შეძლო მართლმსაჯულების სისტემის რეფორმირება და მისი მინისტრობის პერიოდში მთავარი პროკურორი ხუთჯერ შეიცვალა.

„ეს ადამიანი არ იქნება მიმართული იმისკენ, რომ მართლაც დამოუკიდებელი, მიუკერძოებელი და ღირსეული მთავარი პროკურორი აარჩიოს. ამიტომ, კონსულტაციების მაგიდასთან არ დავუსხდებით და უარს ვამბობთ ამ პროცესში მონაწილეობაზე,”- განაცხადა „საერთაშორისო გამჭვირვალობა-საქართველოს“ ხელმძღვანელმა, ეკა გიგაურმა.

მისი თქმით, თუ მთავრობას სურს კრიზისიდან გამოსავლის მოძებნა და რეალური ცვლილებები, საჭიროა იუსტიციის მინისტრის გადაყენება და მთავარი პროკურორის შერჩევის გამჭვირვალე პროცესის წარმართვა.

ამ პოზიციას იზიარებენ “ახალგაზრდა იურისტთა ასოციაცია,” “სამართლიანი არჩევნები,” “ადამიანის უფლებათა ცენტრი,” “კონსტიტუციის 42-ე მუხლი,” “ადამიანის უფლებების სწავლების და მონიტორინგის ცენტრი” და სხვა არასამთავრობო ორგანიზაციები.