აზერბაიჯანის ხელისუფლება ჩინოვნიკებსა და სამინისტროებს ანაცვლებს

აზერბაიჯანში ორი დღის განმავლობაში რამდენიმე სერიოზული საკადრო და სტრუქტურული ცვლილება მოხდა: პრეზიდენტის ადმინისტრაციის ხელმძღვანელის გადაყენებით დწყებული, საგადასახადო სამინისტროს გაუქმებამდე. 

კერძოდ რა მოხდა?

[yes_list]

• 81 წლის რამიზ მეჰტიევის  – 1995 წლიდან პრეზიდენტის ადმინისტრაციის უცვლელი ხელმძღვანელის გადაყენება. ჯერ კიდევ იქამდე, სსრკ-ს პერიოდში ის ანალოგიურ თანამდებობას ახლანდელი პრეზიდენტის მამის დროს იკავებდა. ახლა რამიზ მეჰტიევი მეცნიერებათა აკადემიის ხელმძღვანელი გახდა. თუ ვინ უხელმძღვანელებს პრეზიდენტის ადმინისტრაციას, ჯერჯერობით უცნობია.
• ეკონომიკის მინისტრის შაჰინ მუსტაფაევის გადაყენება, რომელიც პრემიერ-მინისტრის მოადგილედ დანიშნეს. მანამდე ამ თანამდებობას იკავებდა ჰაჯიბალა აბუთალიბოვი (ბაქოს აღმასრულებელი ხელისუფლების ხელმძღვანელი), რომელიც პენსიაზე გაუშვეს;
• ეკონომიკის მინისტრი გახდა გადასახადების ყოფილი მინისტრი მიქაილ ჯაბაროვი, რომელმაც მანამდე განათლების მინისტრობა და გადასახადების მინისტრობა მოასწრო, და ამ ორივე თანამდებობაზე საზოგადოებისთვის არცთუ მოსაწონი რეფორმები გაატარა;
• საგადასახადო სამინისტრო გააუქმეს და მისი ყველა თანამშრომლიანად ეკონომიკის სამინისტროს შეუერთეს. იქვე გააერთიანეს ასევე შემოსავლების სახელმწიფო კომიტეტი და სამომხამრებლო ბაზრის ზედამხედველობის ანტიმონოპოლიური სააგენტო;
• ვიცე-პრემიერ ალი გასანოვის გადაყენება. ამავდროულად ის ისევ აგრძელებს რამდენიმე თანამდებობის დაკავებას: საერთაშორისო ჰუმანიტარული დახმარების რესპუბლიკური კომისიის თავმჯდომარის, ნარკოტიკებთან ბრძოლის სახელმწიფო კომისიის თავმჯდომარის და მმართველი პარტიის „ენი აზერბაიჯანის“ თავმჯდომარის მოადგილის.

[/yes_list]

რა არის მომხდარში გასაოცარი?

 ყველა ეს გადანაცვლება მიზანსწრაფულად და მოულოდნელად მოხდა. ადამიანებს რამდენიმე საათში ერთი თანამდებობიდან ათავისუფლებდნენ და მეორეზე ნიშნავდნენ. ამან არამხოლოდ რიგითი მოქალაქეები, არამედ ექსპერტები და სპეციალისტებიც დააბნია.

თითქმის ყველა ეს „გადანაცვლებული“ – ხანში შესული ადამიანია. ამიტომ, ბევრმა ეს გადანაცვლებები პრეზიდენტის მხრიდან მთავრობის „გაახალგაზრდავების“ სურვილად აღიქვა.

არის ასევე მცდელობები, რომ ეს მოვლენები დაუკავშირონ ორ საპროტესტო აქციას (ოპოზიციის მიტინგსა და ფემინისტურ მარშს), რომლებიც უქმე დღეებში ჩატარდა. მაგრამ ზუსტად ვერავინ ამბობს, თუ როგორ შეიცვლება ხელისუფლების სამოქმედო ხაზი, ან შეიცვლება თუ არა საერთოდ.

თავად პრეზიდენტმა თქვა, რომ „საკადრო ცვლილებები გარდაუვალია, ეს აუცილებლად უნდა მოხდეს“. 

საზოგადოების რეაქცია

ადამიანები ჯერ კიდევ ვერ ხვდებიან, რა ხდება, და ამ ყველაფრის თაობაზე ჯერ მხოლოდ ხუმრობენ:

 „იქნებ საერთოდ ყველა სამინისტრო გააერთიანონ და „საგადასახადო, საბაჟო, ეკონომიკის, შინაგან, საგარეო საქმეთა, სოფლის, ქალაქის, კავშირგაბმულობის, მშენებლობის, ტექნოლოგიების, ჯანდაცვის, განათლების, ეკოლოგიის სამინისტრო“ დაარქვან, და მინისტრად მიქაილ ჯაბაროვი დანიშნონ. ჩემი აზრით, ქვეყნისთვის ერთი სამინისტრო და ერთი მინისტრი სავსებით საკმარისია“. 

ზოგიერთს რამიზ მეჰტიევის გადაყენება ახარებს, სხვები კი ამ სიხარულის მიზეზს ვერ მიმხვდარან. 

 „ნუთუ გაუგებარია, რომ ეს ყველაფერი თვალებში ნაცრის შესაყრელად კეთდება, თითქოს „რეფორმები“ ტარდება. ასეთი რეჟიმის პირობებში, საერთოდ არ აქვს მნიშვნელობა, ვინ რა თანამდებობას იკავებს“, – წერს აქტივისტი და ყოფილი პოლიტპატიმარი გიას იბრაგიმოვი.