Qətnamələrin qəbulu gözlənilir ki, bunlardan birində Qarabağ münaqişəsi haqqında müddəa olacaq" />

Frankofoniya sammitinə Ermənistana 80-dən çox dövlətdən nümayəndə heyətləri gəlib

Qətnamələrin qəbulu gözlənilir ki, bunlardan birində Qarabağ münaqişəsi haqqında müddəa olacaq

Yerevanda Beynəlxalq Frankofoniya Təşkilatının 17-ci sammiti öz işinə başlayıb. Tədbir iki gün davam edəcək. Sammit “Birlikdə yaşamaq” devizi altında keçirilir və aşağıdakı prinsipləri təsbit edir: həmrəyliyə, humanitar dəyərlərə və rəngarəngliyə Frankofoniya regionunda sülhün və çiçəklənmənin əsası timsalında hörmətlə yanaşmaq.

Frankofoniyanın 17-ci sammitinin loqotipi kimi Ermənistanın simvollarından biri olan nar seçilib. İştirakçılara belə bir izahat verilib ki, bu kontekstdə o, bütün Frankofoniya məkanında sülhü və çiçəklənməni simvolizə edir.

Sammitdə kim iştirak edir

Sammitin təntənəli açılış mərasimində qonaqları Beynəlxalq Frankofoniya Təşkilatının baş katibi Mikael Jan, Ermənistanın baş naziri Nikol Paşinyan və onun həyat yoldaşı Anna Akopyan qarşılayıblar.

Sammitdə iştirak etmək üçün Ermənistan paytaxtına 80-dən çox ölkədən nümayəndə heyətləri gəlib ki, bunlardan 38-i prezident və baş nazir səviyyəsində təmsil olunub.

Ələlxüsus, sammitdə Fransa prezidenti Emmanuel Makron və Kanadanın baş naziri Castin Trüdo iştirak edirlər.

Sammit Ermənistanda Frakofoniya həftəsinin əsas tədbiri olacaq. Həftə oktyabrın 7-də başlayıb və müstəqil Ermənistan tarixinin ən kütləvi hadisəsi ola bilər.

Nikol Paşinyan nə deyib

Özünün salamlama nitqində Ermənistanın baş naziri Nikol Paşinyan bütün dünyada məşhur olan şansonye Şarl Aznavuru xatırlayıb. Musiqiçi sammitdə iştirak etmək üçün Ermənistana gəlməyi planlaşdırırdı. Və Paşinyan onun ölümü ilə bağlı çox təəssüfləndiyini ifadə edib:

«Böyük şəxsiyyət, fransız dilinin səfiri. Özünün deməyi xoşladığı kimi, 100 faiz erməni, lakin eyni zamanda 100 faiz fransız, yanımızda olmaq istəyirdi».

Nikol Paşinyan çıxışının əhəmiyyətli hissəsini hazırda bəşəriyyət qarşısında duran çağırışlara, xüsusilə, təhlükəsizlik probleminə həsr edib. O, Qarabağ münaqişəsi mövzusuna toxunub və bildirib ki, Ermənistan məsələnin sülh yolu ilə həlli prinsipinə sadiqdir. Paşinyan növbəti dəfə vurğulayıb ki, Dağlıq Qarabağ danışıqlar prosesində iştirak etməlidir:

«Əminik ki, Dağlıq Qarabağ danışıqlar prosesində həlledici səsə sahib olmalıdır. Və Dağlıq Qarabağın statusu Dağlıq Qarabağ xalqının iradəsinin hüquqi qüvvəyə malik olan ifadəsi əsasında həll edilməlidir».

Emmanuel Makron nə deyib

Fransa prezidenti Emmanuel Makron da Şarl Aznavuru xatırlayıb:

«Bu yaxınlarda Şarlla görüşmüşdüm. O, Tokioya səfərə hazırlaşırdı və Ermənistana nəzərdə tutulan səfərlə bağlı səbirsizliyini ifadə edirdi. Bu, onun sevimli Ermənistanı ilə növbəti görüşü ola bilərdi. Aznavur həyatı, bizi birləşdirən hər şeyi simvolizə edir.

Heç bir şeyi – nə əlaqələri, nə əlindən tutanı olan qaçqın oğlu. Erməni dili onun ana dili idi, ikinci dili gürcü dili idi. İndi isə elə bir fransız yoxdur ki, Aznavurun adını dahi fransız şairlərinin sırasında çəkməsin».

Makron həmçinin qeyd edib ki, sammitin keçirilməsi Ermənistan üçün vacib tədbirdir, Ermənistan özü isə Frankofoniya təşkilatında vacib yer tutur.

«Minlərlə erməni Fransanı möhkəmləndirib və onu öz ölkəsi kimi müdafiə edib. Fransa Ermənistana qarşılıqlı sevgi ilə cavab verir. “Ermənistan” demək kifayətdir ki, Parisdə, Lionda, Marseldə və onlarla başqa şəhərdə insanlarda ən işıqlı hisslər oyansın. Fransa üçün Ermənistan yalnız çoxəsrlik mədəniyyət və tarix demək deyil. Bu həm də xalqının böyük faciəsindən sonra buraya gəlmiş minlərlə ermənidir. Onlar Fransaya bir çox artistləri, alimləri, idmançıları bəxş ediblər».

Frankofoniya sammiti nədir

Frankofoniya – fransız dilində danışan ölkələri birləşdirən iri beynəlxalq təşkilatdır. Hazırda təşkilatın 58 üzvü var. Təşkilata daxil olarkən əhalinin fransız dili biliklərinin səviyyəsi deyil, Fransa ilə mədəni əlaqələrin və əməkdaşlığın səviyyəsi əsas götürülür.

Həmçinin saytda oxuyun: Sammitin Yerevanda keçirilməsi faktı və Beynəlxalq Frankofoniya Təşkilatında Ermənistanın sədrliyi nə ilə unikaldır

Sammitin gedişində qonaqlar çıxış edəcək və iştirakçı ölkələr üçün əhəmiyyətli məsələlər üzrə müzakirələr aparılacaq.

Sammit çərçivəsində bir neçə sənəd qəbul ediləcək. Bunlardan başlıcası “Birlikdə yaşamaq” Yerevan bəyannaməsidir. Bundan əlavə, altı qətnamə qəbul olunacaq ki, onlardan biri münaqişələrin, o cümlədən Qarabağ münaqişəsinin tənzimlənməsinə aiddir.

Facebook Comments

More on JAMnews