Yevlaxda rəsmi Bakının nümayəndələri ilə Qarabağ erməniləri arasında görüş olub
Yevlax görüşü
Bu gün Azərbaycanın Yevlax şəhərində rəsmi Bakının nümayəndələri ilə Qarabağın erməni icmasının nümayəndələri arasında görüş keçirilib.
Azərbaycanın görüşdən əvvəl verdiyi bəyanata görə, danışıqlarda Qarabağın erməni əhalisinin Azərbaycan cəmiyyətinə reinteqrasiyası məsələləri müzakirə edilməli idi.
- Qarabağda müharibə. Azərbaycan antiterror əməliyyatı keçirir. CANLI
- Azərbaycan Qarabağda antiterror əməliyyatına başladı
- “Rusiyanın Azərbaycanla münasibətləri bəzən müttəfiqlik səviyyəsində olur, bəzən də olmur”. Bakıdan baxış
Qarabağ ermənilərinin nümayəndə heyətinə “Artsax Demokratik Partiyası”nın lideri David Melkumyan, Azərbaycan nümayəndə heyətinə isə Milli Məclisin deputatı Ramin Məmmədov başçılıq edib.
Görüş iki saatdan çox sürüb. Görüşün nəticələri ilə bağlı Ramin Məmmədovun verdiyi açıqlamada deyilir:
“Azərbaycanın Qarabağ bölgəsinin erməni sakinlərinin nümayəndələri sosial və humanitar xarakterli məsələlərin müzakirəsi kontekstində xüsusilə yanacağa ehtiyac duyulduğunu bildiriblər. Eyni zamanda, qida məhsulları olmaqla humanitar yardımın göstərilməsini xahiş ediblər.
Görüşün nəticəsi olaraq onların xahişi müsbət qarşılanıb.
Xüsusilə bağça və məktəblərin istilik sistemləri, təcili tibbi yardım və yanğınsöndürmə xidmətlərinin ehtiyacları təmin olunmaqla yanacağın tezliklə təchiz edilməsi və humanitar dəstəyin həyata keçirilməsi planlaşdırılır”.
Öz növbəsində Qarabağ ermənilərinin nümayəndəsi bildirib ki, “Bakı ilə yekun razılaşma yoxdur, detalları razılaşdırmaq lazımdır”.
“Yevlaxda keçirilən görüşdə Qarabağ ermənilərinin reinteqrasiyası formatları müzakirə olunub. Bütün məsələləri və problemləri bir görüşdə həll etmək olmaz.
Qarabağdakı ermənilərin sonrakı taleyi Azərbaycanın daxili işidir. İnanıram ki, Yevlaxda bugünkü danışıqlar daha sonra baş tutacaq çoxsaylı görüşlərin birincisidir”, – deyə Azərbaycan prezidentinin xüsusi tapşırıqlar üzrə nümayəndəsi Elçin Əmirbəyov Sky News Arabia telekanalının efirində bildirib.
Azərbaycan Prezidentinin Administrasiyasının bəyanatı
Azərbaycan Prezidentinin Administrasiyası Yevlaxda keçirilən müşavirənin yekunları haqda:
“Azərbaycan Respublikası Müdafiə Nazirliyinin antiterror tədbirlərinin dayandırılması üzrə 20 sentyabr tarixli bəyanatında əks olunmuş məsələlərin tez bir zamanda icrasının vacibliyi vurğulanıb.
Azərbaycanın Qarabağ bölgəsinin erməni sakinlərinin nümayəndələri sosial və humanitar xarakterli məsələlərin müzakirəsi kontekstində xüsusilə yanacağa ehtiyac duyulduğunu bildiriblər. Eyni zamanda, qida məhsulları olmaqla humanitar yardımın göstərilməsini xahiş ediblər.
Görüşün nəticəsi olaraq onların xahişi müsbət qarşılanıb. Xüsusilə bağça və məktəblərin istilik sistemləri, təcili tibbi yardım və yanğınsöndürmə xidmətlərinin ehtiyacları təmin olunmaqla yanacağın tezliklə təchiz edilməsi və humanitar dəstəyin həyata keçirilməsi planlaşdırılır.
Tezliklə növbəti görüşün keçirilməsi barədə razılıq əldə edilib”.
