Yerevanın mərkəzində toqquşmalar - nə və niyə baş verib? Fotoreportaj
Ermənistanda iki əsas tələblə demək olar ki, bir aydır davam edən küçə etirazları mayın 30-da Yerevanın “Fransa” meydanında polislə şiddətli toqquşmalarla yadda qaldı. Tələblər isə bunlardır:
- baş nazir Nikol Paşinyan istefa verməlidir;
- tanınmamış Dağlıq Qarabağ Respublikası Azərbaycanın tərkibində olmamalıdır.
Müxalifətin mübarizəsinin aktiv mərhələsi mayın 1-də baş nazir Paşinyanın “beynəlxalq ictimaiyyət erməni tərəfinin Dağlıq Qarabağın statusu ilə bağlı barı aşağı salmasını gözləyir” bəyanatından sonra başlayıb. Bu, Ermənistan hakimiyyətinin Dağlıq Qarabağın Azərbaycanın tərkibində statusuna razılığı kimi qiymətləndirilib.
O vaxtdan bəri müxalifət “Fransa” meydanında çadırlar qurub, fasiləsiz etiraz aksiyası keçirir.
Etirazın liderləri Ermənistanın eks-prezidentləri Robert Köçəryan və Serj Sarkisyanla əlaqəli olan “Ermənistan” və “Şərəfim var” müxalif parlament fraksiyalarıdır. Bir çox ekspertlər hesab edirlər ki, bu siyasətçilər Moskva ilə bağlıdır və rusiyayönümlüdür.
Serj Sarkisyan 2018-ci ildə hazırkı baş nazir Nikol Paşinyanın rəhbərlik etdiyi “məxməri inqilab” nəticəsində hakimiyyətini itirib.
Müxalifət iyunun 3-də Milli Məclisin növbədənkənar iclasının çağırılmasını və aşağıdakı qərarların qəbul edilməsini tələb edir:
- Azərbaycanla sərhədin demarkasiyası üçün məcburi ilkin şərt hərbi əsirlərin geri qaytarılması və Azərbaycan qoşunlarının Ermənistan ərazisindən çıxarılması olmalıdır.
- Demarkasiya prosesində Ermənistanın ərazi bütövlüyünün pozulması istisna edilməlidir.
- Erməni-türk barışığının intensivləşdiyi prosesdə nəinki Ermənistanda, hətta dünyanın bir çox ölkələri tərəfindən belə tanınmış 1915-ci ildə Osmanlı Türkiyəsində baş vermiş erməni soyqırımını şübhə altına salacaq hər hansı razılaşma istisna edilməlidir.
Lakin “Vətəndaş Sazişi” iqtidar fraksiyası bu iclasda iştirak etməyəcəyini bəyan edib. Fraksiya katibi Artur Hovannisyan deyib:
“Aydındır ki, müxalifət yenə də Qarabağ məsələsindən sırf daxili siyasi məqsədlər üçün istifadə etməyə çalışır”.
- Ermənistanın ilk peyki kosmosa buraxılıb: buraxılış günü ictimailəşdirilməyib
- “Ermənistan və Dağlıq Qarabağ hərraca çıxarılıb”: Brüsseldə keçirilən Paşinyan-Əliyev danışıqlarına reaksiya
- “Qarda hər şey eyni olur”. Müharibə iştirakçılarının hekayələri
30 may hadisələri haqda
Mayın 30-da müxalifət nazirlərdən Dağlıq Qarabağın Azərbaycanın tərkibində qalması ideyasını dəstəkləyib-dəstəkləmədikləri haqda suala birbaşa cavab almaq niyyəti ilə üçüncü hökumət binasına yürüş edib.
Polis etirazçıların hökumət binalarına yaxınlaşmasına imkan verməyib, bu, aktiv toqquşmalara səbəb olub. 100-dən çox etirazçı saxlanılıb. İkisi polis olmaqla 4 nəfər xəstəxanaya yerləşdirilib. Onların həyati təhlükələrinin olmadığı bildirilir.
Müqavimət hərəkatının liderlərindən biri İşxan Saqatelyan bildirib ki, müxalifət bütün rəsmilərdən bu “çox aydın birbaşa suala” cavab tələb etməkdə davam edəcək. Hərəkat tərəfdarları yaxın günlərdə müxtəlif dövlət qurumlarına yürüş etmək niyyətindədirlər.
“Ermənistan Dağlıq Qarabağ xalqının öz müqəddəratını təyinetmə hüququnun tam həyata keçirilməsini dəstəkləyəcək. Dağlıq Qarabağ heç vaxt Azərbaycanın tərkibində olmayacaq. Ermənistanla Dağlıq Qarabağ arasında etibarlı quru əlaqəsi olmalıdır. Dağlıq Qarabağ anklav olmayacaq”, – Saqatelyan bildirib.
Onun sözlərinə görə, “bu, ermənilərin keçməyəcəyi qırmızı xətlərdir”.
