Yerevan meriyası “Vernisaj” yarmarkasında aşağı səviyyəli şərq musiqisinin səslənməsini qadağan edib

Foto: Qrant Marinosyan, JAMnews

Yerevanın mərkəzindəki “Vernisaj” açıq incəsənət əsərləri yarmarkasında indən belə el arasında “muğam” adlandırılan şərq ladından aşağı səviyyəli musiqinin səsləndirilməsi qadağan olunub. Yerevan meriyası belə qərar qəbul edib.

“Vernisaj” Yerevanın mərkəzində yerləşir, burada unikal əntiq nümunələri, müasir rəssamların işlərini, suvenirlər, bəzək əşyaları almaq mümkündür. Bu məkanda əsl muğamla heç bir əlaqəsi olmayan “muğamı” qadağan etmək təşəbbüsü ilə Yerevan Ağsaqqallar Şurasının müxalif “Yelk” fraksiyasından olan üzvü Araik Arutunyan çıxış edib. O öz təklifini belə izah edib:

Söhbət əsasən sözləri erməni dilində, musiqisi isə şərq ladında olan mahnılardan gedir. Yerli mütəxəssislərin bildirdiyinə görə, bu mahnılar erməni ladında deyil, “Yelk” nümayəndələri də elə buna görə bu kampaniyaya başlayıb.

Məhdudiyyətlərin başqa hansı musiqi janrlarına aid ediləcəyi hələlik məlum deyil Həmçinin “Vernisajda” erməni mədəniyyətinə heç bir aidiyyəti olmayan başqa – rus, amerikan və Avropa pop-musiqisinin də qadağan edilib-edilməyəcəyi bəlli deyil.

JAMnews bir neçə ictimai xadimə bu yeni qadağanı şərh etməyi təklif edib. Ümumilikdə hamı təşəbbüsü dəstəkləyib, amma qeyd ediblər ki, məhdudiyyət siyahısını mütəxəssislər – “keyfiyyətli musiqini keyfiyyətsizdən ayırmağı bacaran insanlar” tərtib etməlidir.

Məsələn, yazıçı, publisist Vaqram Martirosyan qərarı təqdir edib və deyib ki, “Yerevan sakinlərinin şəhərdə gəzərkən xoş olmayan mahnıları eşitməmək haqqı var”. Onun sözlərinə görə, heç kimə “muğam” dinləmək qadağan olunmur, adamlar öz evində və ya qulaqcıq istifadə etməklə istənilən yerdə bu mahnıları rahatca dinləyə bilər.

Yerevan Kukla Teatrının bədii rəhbəri Ruben Babayan deyir ki, “İctimai yerlərdə zövqsüz musiqinin qadağan edilməsində pis heç nə yoxdur”. Babayan qeyd edib ki, məhdudiyyət tərəfdarı deyil, amma onun fikrincə, elə naxoş şeylər mövcuddur ki, onları məhdudlaşdırmaq lazımdır.

Ruben Babayan bildirib ki, kimsə muğam və ya rabisi bəyənirsə, öz evində dinləyə bilər, daha bu musiqini təbliğ etmək, bu musiqini dinləmək istəməyən insanların olduğu ictimai yerlərdə səsləndirmək yolverilməzdir.

S osial şəbəkələrdə qərar ümumilikdə dəstəklənib. Xarakterik arqumentlər:

“Nə gözəl! Nəhayət ki, orada rahat gəzmək olacaq”;

“Başlamışkən rabisi də yığışdırın, muğamdan çox da fərqlənmir. Bu, ən dəqiqi muğamın fərsiz ifasıdır”;

“Meriyanın qərarı ilə “Vernisajda” artıq muğam səslənməyəcək. Səs daşıyıcıları satanlara səsləndirilməsi məhdudlaşdırılan musiqilərin siyahısı təqdim olunacaq. Bəs, bu siyahını kim tərtib edəcək və onlar muğamı necə təsəvvür edirlər (əsl sual budur)? İnsanları əməkdar artist elan etməzdən əvvəl düşünün ki, axı onlar da klassika ifa etmirlər”;

“Sanki bu ölkədə hər şey yaxşı idi, biz də musiqiyə əncam çəkmişik. Həll olunası başqa məsələ yoxdur?”;

“Belə problemləri meriya qərarı ilə həll etmək ayıbdır”;

“Bəlkə də bir gün toylarda rabis sədaları altında əylənməyi də qadağan edəcəksiz…”;

“Bizi zibildən qurtaracaq istənilən kiçik addımı dəstəkləmək lazımdır”.