“Xəyanət daha necə olur?” Azərbaycanda əsirlərin güllələnməsi videosu müzakirə edilir
Azərbaycanda güllələnmə videosu müzakirə edilir
Azərbaycanda sosial şəbəkələrdə yayılan əsirlərin güllələnməsini əks etdirən videonun müzakirəsi davam edir. Ölkənin Hərbi Prokurorluğu bu fakt üzrə araşdırma başladıb. Azərbaycan XİN bununla bağlı bəyanat yayıb. ABŞ Dövlət Departamentinin rəsmi nümayəndəsi güllələnmə kadrlarına dair fikrini ifadə edib. Eyni zamanda bu gün Azərbaycanda daha bir hərbi cinayətin – Gəncə şəhərinə edilən dörd raket hücumundan birincisinin ikinci ildönümü qeyd olunur.
- Bakıda “Siyasi partiyalar haqda” qanun əleyhinə etiraz aksiyası keçirilib
- Əfqan Muxtarlı Gürcüstanın daxili işlər nazirinin səlahiyyətlərinin dayandırılmasını istəyir
- Azərbaycandakı siyasi məhbusların yenilənmiş siyahısı 99 nəfərdən ibarətdir
Bir neçə gün əvvəl sosial şəbəkələrin Azərbaycan seqmentində əsirlərin güllələnməsini əks etdirən kadrlar yayılıb. Ermənistan tərəfi bildirir ki, video 13-14 sentyabrda Azərbaycan və Ermənistan silahlı qüvvələri arasında genişmiqyaslı sərhəd döyüşləri zamanı çəkilib və güllələnənlər Ermənistan SQ-nin hərbçiləridir.
Azərbaycanın Baş Prokurorluğunun yaydığı məlumatda qeyd olunur ki, video-kadrlar diqqətlə tədqiq edilir və Hərbi Prokurorluq tərəfindən faktla bağlı araşdırma aparır.
Azərbaycan XİN-in rəsmi nümayəndəsi Leyla Abdullayeva Ermənistan tərəfinin hərbi cinayət ittihamını şərh edib.
“Araşdırma hər hansı çağırışlara cavab olaraq deyil”
“Sosial şəbəkələrdə yayılan videolarla bağlı Azərbaycan tərəfini hərbi cinayətlərdə ittiham edən Ermənistan XİN-ə tərəfimizdən rəsmi açıqlama ilə münasibət bildirilib və mövqeyimiz diqqətə çatdırılıb”, – bu haqda XİN mətbuat katibi Leyla Abdullayeva deyib.
O xatırladıb ki, Azərbaycanın Hərbi Prokurorluğu tərəfindən hələ bir müddət öncə sosial şəbəkələrdə yayılan videolarla bağlı hərtərəfli araşdırmanın başlanılması haqda bəyanat verilib.
“Vurğulamaq istərdik ki, bu araşdırma hər hansı çağırışlara cavab olaraq deyil, məhz Azərbaycanın hər zaman beynəlxalq öhdəliklərinə ciddi yanaşması çərçivəsində başladılmışdı.
O ki, qaldı bəzi Qərb dövlətlərindən edilən çağırışlara, maraqlıdır bu şəxslər 30 il ərzində, habelə 2020-ci il 44 günlük müharibə zamanı dünya ictimaiyyətinin gözü qarşısında Ermənistan tərəfinin törətdiyi çoxsaylı hərbi cinayətlərlə bağlı, bu cinayətlərin araşdırılması, səbəbkarların cəzalandırılması ilə bağlı hansı çağırışları ediblər?
Günü bugün də Ermənistan istehsalı olan minaların Azərbaycan ərazilərində mülki insanların həyatına son verdiyini niyə görməzdən gəlirlər? Yoxsa hərbi əməliyyatların getmədiyi bir vaxtda digər dövlətin ərazisində mina basdırılmasını hərbi cinayət hesab etmirlər? Böyük əksəriyyəti mülki şəxs olmaqla, 250-dək şəxsin mina qurbanı olmasının məsuliyyəti birmənalı şəkildə Ermənistanın hərbi-siyasi rəhbərliyinin üzərindədir. Ancaq Ermənistanda hələ 90-cı illərin əvvəllərindən etibarən törədilən və indiyədək davam edən çoxsaylı hərbi cinayətlərə, insanlıq əleyhinə cinayətlərə görə indiyədək bir nəfər də olsun məsuliyyətə cəlb olunmayıb.
Azərbaycana çağırış edənlər qərəzsizlik və ədalətli mövqe nümayiş etdirmək istəyirlərsə, məsələyə hərtərəfli yanaşmalı, Ermənistan tərəfindən bugünədək törədilən çoxsaylı cinayətlərin araşdırılması və məsuliyyət daşıyan şəxslərin qanun qarşısında cavab verməsini tələb etməlidirlər: “Əks təqdirdə bu, erməni təbliğatı nəticəsində verilmiş birtərəfli açıqlamadan başqa bir şey deyildir”, – Abdullayeva deyib.
Ned Praysın tviti
“Azərbaycan əsgərlərinin silahsız erməni əsirlərini edam etməsi ilə bağlı son xəbərlər ABŞ-ni dərindən narahat edir. Biz məsələnin tam və qərəzsiz araşdırılmasına çağırırıq. İstənilən vəhşiliyə görə məsuliyyət daşıyanlar cavab verməlidir”, – ABŞ Dövlət Departamentinin rəsmi nümayəndəsi Ned Prays Twitter hesabında yazıb.
ABŞ-ın Bakıdakı səfirliyi bu tviti Azərbaycan dilinə tərcümə edərək yayıb.
Şərhlər
Baş verənlər sosial şəbəkələrin Azərbaycan seqmentində fəal müzakirə olunur.
“Əsirləri güllələyən Azərbaycan əsgərlərinə digər maddələrlə yanaşı vətənə xəyanət maddəsi ilə də iş açılmalıdır. Xəyanət başqa nə təhər olur ki?” – “Toplum TV”-nin baş redaktoru Xədicə İsmayıl Facebook-da yazıb.
Amma onun fikri ilə razılaşmayan sosial şəbəkə istifadəçiləri də var:
“Əsgərlərin psixoloji vəziyyətini anlamaq olar, ora hər şey göründüyü kimi deyil. Burda heç bir xəyanətdən söhbət gedə bilməz”;
“Xocalıda baş verənlərdən sonra bu, heç kimi narahat etməməlidir”.
Dinc şəhərə raket zərbəsinin ikinci ildönümü
İkinci Qarabağ müharibəsi zamanı 2020-ci il oktyabrın 4-ə keçən gecə Azərbaycanın ikinci böyük şəhəri Gəncənin əhalinin sıx olduğu rayonları Ermənistan SQ tərəfindən raket atəşinə tutulub.
Gəncənin dinc əhalisi dörd dəfə raket zərbəsinə məruz qalıb. Nəticədə 27 nəfər həlak olub, 120 yerli sakin yaralanıb.
Böyük Britaniyanın Bakıdakı səfiri Ferqus Ould bununla bağlı üzgünlüyünü bildirib.
“Bu gün 44 günlük müharibə zamanı Gəncənin ilk raket hücumuna məruz qalmasından 2 il keçir. Biz bu faciənin günahsız qurbanlarını dərin hüznlə anıb onların yaxınlarına başsağlığı diləyirik”, – səfir Twitter-də yazıb.
