Türkiyənin Şuşada məktəb tikintisi layihəsi niyə alınmadı?
Türkiyənin hakim koalisiyasına daxil olan Milliyətçi Hərəkat Partiyasının Şuşada məktəb tikintisi layihəsindən imtina edilib. Azərbaycan hakimiyyəti isə bu məktəbin inşasında qərarlıdır. Bəs əslində nə baş verib? Azərbaycan prezidenti səviyyəsində razılıq verilmiş məktəb tikintisi layihəsində dəyişiklik nədən irəli gəlib?
- Gürcüstanın əsas müxalifət qüvvəsi “Vahid Milli Hərəkat” parlamentə qayıdır
- “Cigit obrazını sındırırlar”: Dağıstanda məktəbdə keçirilən bayrama görə qalmaqal davam edir
- İlham Əliyev Qarabağda: “Biz daima bu torpaqda yaşayacağıq”
MHP: “Şuşada məktəb tikiləcək”
2021-ci ilin yanvar ayında Türkiyənin Milliyyətçi Hərəkat Partiyası (MHP) Azərbaycanın işğaldan azad edlmiş Şuşa şəhərində məktəb tikəcəyi ilə bağlı bəyanat verib.
Partiyanın rəhbəri Devlet Bahçeli əlavə edib ki, məktəb Üzeyir Hacıbəylinin adını daşıyacaq və təhsil ocağının təməlqoyma mərasimi 30 yanvar tarixində keçiriləcək.
“Ermənistanın işğalından azad edilən qədim mədəniyyət mərkəzimiz Şuşada məktəb tikintisi üçün münasib yer seçiləcək və bundan sonra məktəbin təməli qoyulacaq, xeyirli olsun!” – MHP sədri Devlet Bahçeli partiyasının qrup iclasında çıxışı zamanı bildirib.
O deyib ki, Şuşada Üzeyir Hacıbəyov adına məktəbin inşası ilə bağlı təklif Azərbaycan və Türkiyə dövlət başçıları tərəfindən razılıqla qarşılanıb.
“Bu həssas məsələyə diqqət göstərdiklərinə görə hər iki dövlət başçısına təşəkkür edirəm. Layihənin hər mərhələsi haqqında hörmətli prezidentlərimizə məlumat veriləcək”.
Bakıda İlham Əliyevlə görüş
Yanvarın sonunda Milliyətçi Hərəkat Partiyasının (MHP) nümayəndə heyəti Bakıya gəlib.
Heyətə MHP sədr müavini Mevlüt Karakaya, Ülkü Ocaqları başqanı Ahmet Yiğit Yıldırım, Isparta bələdiyyəsinin keçmiş rəhbəri, memar Yusuf Ziya Günaydın daxil olub.
Fevralın 2-də Azərbaycan prezidenti İlham Əliyev MHP-nin sədr müavini, Türkiyə parlamentinin Ankaradan deputatı Mevlüt Karakayanı qəbul edib.
Məktəb necə idarə olunacaqdı?
Azərbaycanlı jurnalistlərin suallarını cavablandıran Mevlüt Karakaya MHP tərəfindən Şuşada tikiləcək orta məktəbin hansı formada idarə ediləcəyi ilə bağlı məsələyə aydınlıq gətirib.
O qeyd edib ki, məktəbin hansı formada idarə edilməsi ilə bağlı qərarı Azərbaycan Təhsil Nazirliyi verəcək:
“Biz məktəbi tikib Azərbaycanın Təhsil Nazirliyinə təhvil verəcəyik. Məktəbin hansı formada və qaydada idarə edilməsinə isə Azərbaycan qərar verəcək. Bizim işimiz məktəbi tikib təhvil verməkdir, ondan sonrasına qarışmayacağıq. Biz çalışacağıq ki, Şuşanın tarixinə, mədəniyyətinə və atmosferinə uyğun bir məktəb tikib qardaş Azərbaycan tərəfinə verək”.
MHP məktəb tikintisindən imtina etdi
Lakin mayın 29-da MHP lideri Devlet Bahçeli özünün “Twitter” hesabında gözlənilməz bəyanatla çıxış etdi.
“16 yanvar 2021-ci il tarixində sosial şəbəkədə etdiyim açıqlamada Qarabağda qələbədən sonra Azərbaycanın düşüncə və sənət həyatında önəmli yeri olan Şuşada “Ülkü ocaqları təhsil və mədəniyyət fondu”nun dəstəyi ilə doqquz illik məktəb inşa edəcəyimizi bildirmişdik.
Bu məqsədlə layihəmizi hazırlayıb, ictimaiyyətə açıqlamışdıq. İnşa etməyi planlaşdırdığımız məktəbə Azərbaycan Dövlət Himninin bəstəkarı və Şuşada anadan olmuş mərhum Üzeyir Hacıbəylinin adını verməyi düşünürdük. Bu məktəbin təməlqoyma mərasiminin 30 yanvarda keçiriləcəyini planlaşdırmışdıq.
Ancaq Azərbaycan hakimiyyəti bizim layihəni uyğun bilməyib, yeni və fərqli məktəb layihəsi hazırlayıb. Əlbəttə, bu, onların təbii haqlarıdır, bizə də hörmətlə yanaşmaqdan başqa bir seçim qalmır.
Milliyyətçi Hərəkat Partiyası məktəb layihəsindən buna görə vaz keçib. Məktəbin inşasına dəstək verən qardaşlarımızdan yardım və hədiyyə kimi toplanmış pullar da gecikdirilmədən və eyni həcmdə geri qaytarılacaq”, – D.Bahçeli yazıb.
Azərbaycan hakimiyyətinin reaksiyası
Azərbaycan prezidentinin köməkçisi Hikmət Hacıyev bu bəyanatı şərh edərkən qeyd edib ki, prezident İlham Əliyev mayın 27-də Türkiyənin milli təhsil nazirini qəbul edən zaman prezident Rəcəb Tayyib Ərdoğanın Şuşaya gözlənilən səfəri çərçivəsində Türkiyə tərəfindən təklif edilmiş bir hədiyyə kimi, məktəbin təməlqoyma mərasiminin proqramda əksini tapdığını bildirmişdi.
“Mütəxəssislər səviyyəsində incəsənət məktəbi binasının memarlıq layihəsinin Şuşa şəhərinin özünəməxsus arxitektura üslubuna uyğunlaşdırılması məqsədilə işçi müzakirələrin aparılması təklif olunub.
Bu xoşniyyətli təşəbbüsün məqbul görülməməsi əsla müzakirə mövzusu deyildir. Məsələnin mahiyyəti barəsində tam dolğun məruzə olunmamasının anlaşılmazlığa səbəb olduğu istisna edilməyə bilər. Əminik ki, qarşılıqlı anlaşma şəraitində texniki memarlıq xarakterli məsələlər işçi səviyyədə həll olunaraq, Üzeyir Hacıbəyli adına Şuşa incəsənət məktəbinin tezliklə inşasına başlanılacaq”, – deyə prezidentin köməkçisi qeyd edib.
Ekspert rəyi
Məsələni şərh edən azərbaycanlı politoloq Şahin Cəfərlinin fikrincə, MHP-nin Şuşada məktəb inşa etməklə bağlı layihəsi Azərbaycan tərəfindən qəbul olunmayıb.
“Bahçeli məsələni ictimailəşdirməyə də bilərdi. Bunu etməsi, məncə, onun Azərbaycan hökumətinin davranışından narazı qalması ilə əlaqədardır.
Türkiyə hökuməti MHP-nin layihəsinə dəstək verirdi, ya yox? Bu barədə hər hansı məlumat yoxdur.
Başqa bir maraqlı fakt ondan ibarətdir ki, aprelin 17-dən Azərbaycandan Türkiyəyə ikitərəfli müqavilə çərçivəsində təbii qazın nəqli dayanıb. (TANAP qazı bura daxil deyil.) Halbuki müqavilənin müddəti gələn il bitir. Hazırda bununla bağlı danışıqlar aparılır”, – Ş.Cəfərli yazıb.
